- Euskal ekonomiaren erresilientzia azpimarratu du Lehendakariordeak eta Ekonomia, Lan eta Enplegu sailburuak, urte arteko % 2,2ko hazkundea izan baita, enplegua sortu da, inoiz baino pertsona gehiago baitaude lanean, eta defendatu du kalitatezko enpleguan eta lurralde errotzean oinarritutako produkzio eredua
Mikel Torres Lehendakariordeak eta Ekonomia, Lan eta Enplegu sailburuak astelehen honetan azpimarratu duenez, Euskadiko lan merkatuaren indarra euskal ekonomiaren zutabe nagusietako bat da: “Euskal lan merkatua indartsu dago, eta horrek kontsumo pribatua bultzatzen du, eta ekonomia hazten du, eta trakzio ona izan dezan laguntzen du».
Torresek nabarmendu du enpleguaren dinamismoak eragin zuzena duela kontsumoan eta, horrekin batera, euskal ekonomia osoaren “oinarri sendo eta erresilienteetan”, urte arteko
% 2,2ko hazkundea izan baitu lehen hiruhilekoan, 1.042.000 kotizatzaile baino gehiago izan baititu Gizarte Segurantzan, inoizko kopururik handiena. “Langabezia tasa % 6,5ean dago, eta 2026an 10.000 lanpostu berri sortzea aurreikusten da”, ziurtatu du.
Zentzu horretan, enpleguari buruzko eztabaida ezin dela soilik “kuantitatiboa” izan adierazi du Lehendakariordeak. “Gutxiago hitz egin behar dugu enpleguaren zifraz eta gehiago kalitateaz: eskubidedun enplegua, enplegu txukuna, enplegu segurua, uztartzea ahalbidetuko duena, bizitza pertsonala eta profesionala egitea ahalbidetuko duena”, azpimarratu du Radio Euskadiko Boulevard saioan egindako elkarrizketa batean. Torresek ohartarazi du gaur egun lan bat izateak ez dituela beti baldintza horiek bermatzen, eta adierazi du hori dela Ekonomia, Lan eta Enplegu Saila lanean ari dela gizarte eragileekin elkarrizketa sozialaren esparruan.
Herri estrategia
Testuinguru horretan, Torres Lehendakariordeak gizarte ekonomiak Euskadin duen zeregin estrategikoa aldarrikatu du, “herri estrategia” gisa. Azken urteotan izan duen hazkunde “ikusgarria” jarri du balioan, baita teknologia, industria eta deskarbonizazio proiektuak bultzatzeko gaitasuna ere. “Ez gara ari bigarren mailako ekonomiaz, baizik eta proiektu teknologiko handiekin, garapen industrialarekin eta puntako proiektuekin apustu egiten ari diren enpresa, kooperatiba eta lan sozietate handiez”, adierazi du.
Era berean, Ekonomia, Lan eta Enplegu sailburuak nabarmendu du eredu horrek “pertsona erdigunean jartzen duela, ez dela deslokalizatzen, lurraldean sustraitzen dela”. Zuzentzen duen sailaren helburua da gizarte ekonomiak Euskadiko enpleguaren % 20 izatean 2040an.
Hala ere, nazioarteko testuingurutik eratorritako arriskuez ohartarazi du Torresek. Ormuzeko itsasartearen krisia eta ziurgabetasun energetikoa “epe ertainean gehiago” nabarituko direla adierazi du, eta EAEko ehun industriala Frantzia eta Alemaniaren ahultasunaren eraginpean dagoela azpimarratu du, Euskadiko esportazioen % 40 ingururen helmuga baita.
Industria sektoreak EAEko BPGaren % 24 baino gehiago osatzen du, eta produkzioaren zati handi bat automobilgintzarekin eta ekipamenduko ondasunekin lotuta dago; horrek bereziki sentibera egiten du ekonomia horien dezelerazioarekiko. Hala ere, Torresek azpimarratu du industria enplegua mantentzen ari dela Industria Plan berriari, industria ezkutuari eta Eusko Jaurlaritzaren lan politikei esker.
Parte hartze Instituzionalari buruzko Legea
Torres Lehendakariordeak berretsi du elkarrizketa sozialak funtsezko zeregina duela lan harremanen euskal ereduan, eta etorkizuneko Parte hartze Instituzionalaren Legea defendatu du, erakundeen, sindikatuen eta enpresen arteko lankidetza indartzeko tresna gisa. “Elkarrizketa soziala erakundeen arteko lankidetzaren irudia izateaz gain, lan baldintzak hobetzeko beharra ere bada. Elkarrizketak denak funtzionatzen du. Elkarrizketa sozialik ez badago, oso zaila da lan-harremanak hobetzea”, adierazi du.
Era berean, Mikel Torresek transferitzeke dauden eskumenen prozesuan izandako aurrerapena nabarmendu du, azken urteetan lortutako “erritmo ona2 azpimarratuz, baina oraindik negoziatzeke dauden gaiak “konplexuenak” direla onartu du, hala nola Gizarte Segurantzaren kudeaketa ekonomikoa edo FOGASA.
Ildo horretan, Eusko Jaurlaritza Espainiako Gobernuarekin akordioak lortzeko modu 2diskretu eta bizian2 lanean ari dela ziurtatu du, legealdia amaitu baino lehen transferentzia berriak sendotzeko helburuarekin. Lehendakariordeak prozesu hau osatzeko egonkortasun instituzionala mantentzearen garrantzia azpimarratu du, «legegintzaldia eteten bada, prozesu hau guztia eten egiten delako. Espainiako Gobernuaren jarrera oso ona da, eta, zentzu horretan, espero dugu legegintzaldia amaitu ahal izatea transferentziak lehenago etor daitezen», gaineratu du.
