- Lehendakariak azpimarratu du portuak erabakigarriak izango direla Euskadiren lehiakortasunerako eta posizionamendurako, aldakorra den testuinguru geopolitikoan
- Eusko Jaurlaritzak Bilboko eta Pasaiako portuak kudeatzeko gaitasun handiagoa aldarrikatzen du, arintasuna hobetzeko eta haien garapena indartzeko
Imanol Pradales lehendakariak gaur defendatu du beharrezkoa dela Bilboko eta Pasaiako portuen kudeaketan autonomia handiagoa lortzeko bidean aurrera egitea, Euskadiren lehiakortasuna indartzeko eta egungo erronka ekonomiko eta geopolitikoei gaitasun handiagoarekin erantzuteko.
Pradalesek Bilboko Portuan, Super Post Panamax kaiko garabi berriaren inaugurazioan, egin ditu adierazpen horiek. Ekitaldian Mikel Jauregi Industria, Trantsizio Energetiko eta Jasangarritasuneko sailburuarekin batera izan da.
Bere hitzaldian, lehendakariak portuen eginkizun estrategikoa nabarmendu du, herrialdearen hazkunde ekonomikorako eta nazioarteko proiekziorako funtsezko azpiegitura gisa. Alde horretatik, adierazi du oraindik ere garrantzi handiagoa izango dutela ziurgabetasunak eta eraldaketa geopolitikoek markatutako agertoki global batean.
Era berean, balioetsi du Bilboko Portu Agintaritza, elektrifikazioari, eraldaketa digitalari eta merkatu berriak irekitzeari lotutako ekimenen bitartez, portuaren posizionamendua indartzeko egiten ari den lana.
Pradalesek azpimarratu du Euskadik herrialde-helburu bat partekatzen duela: Bilboko Portua fatxada atlantikoko konexio-nodo nagusi gisa sendotzea, bai distantzia laburreko bai distantzia luzeko trafikoetarako. Horretarako, bere lehiakortasuna hobetuko duten eta bere gaitasun estrategikoak indartuko dituzten neurriak bultzatu behar direla defendatu du.
Testuinguru horretan, berretsi du kudeaketarako gaitasun handiagoak izateak aukera emango diola Euskadiri arintasun handiagoz jarduteko eta jarduera ekonomikoa eta inbertsioa erakartzeko nazioarteko lehian atzean ez geratzeko.
