Nerea Melgosa Eusko Jaurlaritzako Ongizate, Gazteria eta Erronka Demografikoko sailburuak aldebiko bilera bat egin du gaur, urriak 1, osteguna, Elma Saiz Gizarteratze, Gizarte Segurantza eta Migrazioetako ministroarekin, bi administrazioen artean migrazioaren arloan interesa pizten duten gai nagusiak aztertzeko.
Eusko Jaurlaritza ordenan, zorroztasunean, plangintzan, eskumenen errespetuan eta administrazioen arteko koordinazioan oinarritutako planteamenduarekin joan da bilerara, estrukturaltzat jotzen duen eta erakunde-maila desberdinek kudeatutako eremuei eragiten dien migrazio-errealitate baten aurrean.
Besteak beste, ezohiko erregularizazioaren ezarpena, 2026-2030 Integrazio eta Herritartasun Plana, Migrazio eta Asilorako Europako Itunaren aplikazioa eta horrek Euskadin Iparraldeko Muga gisa dituen ondorioak eta bi gobernuen arteko aldebiko harreman-mekanismo egonkor bat ezartzeko beharra aztertzeko balio izan du bilerak.
Eusko Jaurlaritzaren helburua izan da bilerak aurrera egitea, ez bakarrik egiteke dauden gai zehatzetan, baizik eta aldebiko lan-metodo egonkor berri batean, solaskide politikoak eta teknikoak identifikatuko dituena, informazio-kanal iraunkorrak ezarriko dituena eta bi administrazioek hasieratik parte har dezaten ondoren elkarrekin kudeatu behar dituzten erabakietan.
Gizarteratze, Segurtasun eta Migrazio Ministerioaren egoitzan ordubete pasatxo bilduta egon ondoren, Eusko Jaurlaritzak Estatuaren konpromisoa lortu du Immigrazioari buruzko Bitariko Batzordea sortzeko, Euskadik migrazio-politiken gaitasun berriei buruz egindako proposamenari heltzeko.
Bileran Ongizate, Gazteria eta Erronka Demografikoko sailburu Nerea Melgosak, Gazteria eta Erronka Demografikoko sailburuorde Xabier Legarretak eta Etorkinen Harrera eta Integrazioko zuzendari Ignacio Fariñak hartu dute parte. Espainiako Gobernuaren aldetik, Elma Saiz Inklusio, Segurtasun eta Migrazio ministroak, Pilar Cancela Migrazioen Estatu idazkariak eta Aitor Juara Kabineteko zuzendariak hartu dute parte.
