Joan den ostegunean, eguerdiko hamabiak aldera, Ertzaintzak jakin zuen istilua sortu zela kalean, Irungo Iparralde Etorbidean. Ertzainak adierazitako lekura iritsi zirenean, bi emakumerekin zeuden bi gizonek ihes egin zuten polizia ikustean. Ertzainek atzetik jarraitu zieten eta Pikoketa kalean harrapatu zituzten. Bertan lesio-delitu bat eta agintaritzaren agenteei aurre egitea eta desobeditzea leporatuta atxilotu zituzten.
Susmagarriek, eztabaidan ari zirela, motorreko kaskoekin jo zuten gazte bat, eta anbulantzia bateko osasun-zerbitzuek artatu behar izan zuten. Erasotzaileek eta erasoa jasan zuen gazteak dirudienez elkar ezagutzen zuten. Atxilotuek 27 eta 22 urte dituzte, eta agintari judizialaren aurrera agertu beharko dute datozen egunotan.
Adierazi behar da erasoa jasan zuen gaztea aste honetan bertan, asteazkenean, atxilotu zutela Irungo Pio XII.a auzoan kalean liskarra sortu ondoren, trafikoa eten baitzuen eta auto bat eta bertan zihoazen bidaiariak jo baitzituen. Arrastatu behar zutenean, matxete batekin eraso egin zion polizia-dotazioari. Istiluan ez zen inor zauritu.
