Arrastatuetako sei espetxera eraman dituzte
Joan den uztailaren 26ko goizaldean Zornotzan gertatutako talde erasoaren ondoren Ertzaintzak bertako Udaltzaingoaren laguntzaz abian jarritako ikerketari esker, talde oldarkorreko hamalau kide atxilotu dituzte, oraingoz, jipoi basatia leporatuta. Jipoia jaso zuen gaztea oso larri zaurituta geratu zen. Arrastatuetako zazpi Adingabeen Fiskaltzaren esku utzi dituzte, adingabeak baitira, eta beste zazpi, 18 urtetik 38 urtera bitartekoak, Durangoko Epaitegira eraman dituzte. Epaileak horietako sei espetxean sartzeko agindua eman du, eta Basauriko espetxean daude preso. Biktimak oso larri jarraitzen du Gurutzetako ospitalean.
Erasoa uztailaren 26an, igandean, goizaldean gertatu zen Zornotzako Jauregibarria lorategietan. Hogei bat pertsonak, ongi antolatuta, gazte bat inguratu zuten, eta erabat babesgabe zegoenean, jotzen hasi ziren. Guztiek aktiboki parte hartu zuten erasoan. Jipoi basatian erasotzaileek makilak eta botilak ere erabili zituzten, biktima lurrean etzanda eta konorterik gabe utzi zuten arte. Erasotzaileek ankerkeriaz jarraitu zuten biktima jotzen, eta, azkenean, gauzak kendu eta alde egin zuten. Erasotzaileek grabatu egin zuten ekintza, eta handik ordu batzuetara sare sozialetan argitaratu zuten, gizartean alarma handia sortuz.
Ertzaintzak, Zornotzako Udaltzaingoarekin lankidetzan eta herritarren laguntzaz, egindako ikerketaren ondorioz, jakin zuen Koala Anaiak izeneko talde antolatu bat zela, eta Bizkaiko herri batzuetan elkartu ohi zela liskarrak sortzeko eta beste gazte batzuk beldurtzeko asmoz. Gau horretan bezala, gazteengana bereizi gabe hurbiltzen ziren, eta inguratu eta jo ondoren euren gauzak kentzen zizkieten.
Durangoko Ertzain-etxetik egindako ikerketan Bilboko eta Sestaoko ertzain-etxeek, SICTBek eta Inteligentzia Bulegoak ere parte hartu dute, eta ikerketa horren ondorioz hurrengo egunetan identifikatu zituzten inplikatuak. Orain arte delitugile taldeko hamalau kide atxilotu dituzte Ertzaintzak eta udaltzaingoek Bizkaiko hainbat herritan koordinatuta burutu dituzten jarduketetan. Erasotzaileetako bat Medina de Pomarren (Burgos) atxilotu zuen Guardia Zibilak.
Arrastatuetako zazpi adingabeak dira, eta Adingabeen Fiskaltzaren esku utzi dituzte, beraz. Beste zazpiak adinez nagusiak dira, 18 urtetik 38 urtera bitartekoak, eta Durangoko Epaitegira eraman dituzte eta epaileak horietako sei Basauriko espetxera eramateko agindua eman du.
Biktimak Gurutzetako ospitalean jarraitzen du egoera larrian, eta Ertzaintzak eta Zornotzako Udaltzaingoak ikerketa zabalik dute, eta ez dute baztertzen kasuarekin lotuta beste atxiloketa batzuk egitea.
