Pipper, turista-txakurtxo, Euskadin barrena dabil eta bideo erreportajeekin erakutsiko ditu gure dog-friendly helmugak

0

Pipper, eragin handiena duen txakur turistikoa, eta Pablo Muñoz Gabilondo donostiarra Euskadin izango dira udazkenean, Turismo, Merkataritza eta Kontsumo Sailaren kanpaina batean, gida berria eta dog friendly baliabideak sustatzeko. Gaurtik aurrera, hainbat erreportajeren protagonista izango da, sare sozialetan partekatuko diren hainbat euskal helmugatan. Bidaia Arabako Errioxan hasi da.

Pipperrek maskotek lagunduta bisita daitezkeen lekuak erakusten dizkie bere jarraitzaileei, eta konpainiako animaliak garraioetan, ostalaritzan eta baliabide turistikoetan integratzea sustatzen du.

2018ko maiatzetik, Pipperrek ehun helmuga baino gehiago egin ditu 50.000 kilometro, eta Espainiari bira ematen dion lehen txakur turista bihurtu da. Bidaietan maskotarekin mugitzen diren familiek zer egin dezaketen eta zer ez aztertzen du, ondoren http://www.pipperontour.com webgunean eta sare sozialetan dituen 100.000 jarraitzaile baino gehiagori kontatzeko. Pipperren zereginen artean, maskotak espazio publikoetara sartzeko arauak dibulgatzea dago, bizikidetza ona sustatzeko eta negozio-jabeek jakin dezaten nola erraz diezaieketen beren negozioen erabilera bidaiari-segmentu berriei.

Txakurra duten bidaiarien segmentuak turismoa sustatzeko duen garrantzia datu honekin laburbiltzen da: Espainian, 4 etxebizitzatatik 1ek gutxienez txakur bat du. Jabe gehienentzat txakurra familiako beste kide bat da, eta hori kontuan hartzen da aisialdia edo oporrak bezalako erabakiak hartzerakoan. Euskadin gero eta garraio, ostatu eta ostalaritza-establezimendu gehiagok hartzen dute erabiltzaile-profil gorakor hori.

Pipper komiki formatuko Donostiako gida berriaren protagonista

Bisitaldiak maskoten bidezko turismoa sustatzeko Turismo Sailaren estrategia indartzeko balio izan du; izan ere, 2018an gida eta landing page «EUSKADI TXAKURRAREKIN» argitaratu zen, Gasteizko baliabideetan ardaztutako «TXAKUR HIRITARRAK» izeneko argitalpenarekin jarraitu zuen, eta Donostiako hirian maskotarekin bidaiatzen duten turistentzako leku irisgarriak ikusi ditu orain.

Pipper komiki formatuko argitalpen berri baten protagonista da. Basquetourrek editatu du, eta honako izenburu hau du: « ‘DOGGYETORRI’ DONOSTIARA». Komikiak jarraipena ematen die Alfaguarak argitaratzen dituen eleberri grafiko batzuei (Las Aventuras de Pipper). Eleberri horien bidez, hezitako maskotak espazio publikoetan integratzea eta arduraz edukitzea sustatzen da.

Donostiari eskainitako komikian, Pipperrek hiriko hainbat toki irisgarri zeharkatzen ditu, abenturak bizitzen ditu, gastronomiaz gozatzen du, erosketak egiten ditu eta, azken finean, Donostiaren aurpegirik onena erakusten du, hiri atsegina, abegikorra eta kosmopolita bisitetarako eta baita bere lagun ez gizatiarrentzat ere. @pipperontour sareetako milaka jarraitzaileen artean zozketaz hautatutako beste 25 txakur donostiarrek ere lagunduko diote binetetan.

Gidaren amaieran, txakurrek erabil ditzaketen baliabideak (garraioa, negozioak, aisialdirako guneak), portaera-arauak eta Donostian txakurrak arduraz adoptatzeko baldintzak zehazten dituen atal bat dago.

 

Gida hemen kontsulta eta deskarga daiteke: https://labur.eus/FSYJg