Jaurlaritzaren Kontseiluak Gizarteratzeko eta Diru Sarrerak Bermatzeko Euskal Sistemaren Lege-proiektua onartu du gaur. Proposamen arinagoa, modernoagoa eta argiagoa da, eta haren bidez, estaldurak handitu eta zenbatekoak hobetu nahi dira, kudeaketa sinplifikatu eta arindu nahi da, eta eraginkortasun handiagoa lortu nahi da euskal herritarren gizarteratzean eta laneratzean.
Lehendakariordeak eta Lan eta Enpleguko sailburuak, Idoia Mendiak, azpimarratu du “euskal babes-sistema gure gizarte-inbertsiorik onena izan dela azken hogeita hamar urteetan”, eta adierazi du proiektu honen “modernizazio-konpromisoa” aurreko legegintzaldian egin zela, finantza-krisiaren ondorengo susperraldi batean. Hala ere, gaineratu duenez, “pandemia-krisiak sortutako ziurgabetasun guztien erdian idatzi da. Eta Jaurlaritzan onartu genuen, gure ongizate-sistemarako mehatxu berrien erdian”. Hala ere, “sail honen bokazioa ez da aldatu, esperientziak erakutsi baitigu proiektu sendo eta adostasun zabalek aukera eman dutela segurtasun-sare hori edozein unetan edukitzeko, eta eraginkortasunez egiteko”.
Kontseiluak Gobernu Programan jasotako lege baten aurreproiektua berretsi du, azken hilabeteetan erakundeen, kolektiboen, sindikatuen, legebiltzar-taldeen eta onuradunen iradokizunak eta ekarpenak aintzat hartu dituena, eta orain Legebiltzarrean izapidetzen hasi dena, eztabaidatzeko eta behin betiko onartzeko. Aurreko legegintzaldian zehar garatutako adostasun zabalarekin iritsi zen, nahitaezko txosten guztiekin barne-prozedura zorrotz bat gainditu ondoren.
Gizarteratzeko eta Diru Sarrerak Bermatzeko Sistemaren Legeak hiru hamarkadatan arrakasta izan duen eredu bat du abiapuntu; babes-sistema hori eraginkorra dela frogatu da gizarte-bazterketako poltsak arintzeko, eta haren erabilerak eragin positiboa izan du gizarte osoan.
Lege berriak:
-
- Diru-sarrerak bermatzeko euskal ereduan integratzen du Biziarteko Gutxieneko Diru-sarrera
-
- Sistemaren estaldura zabaltzen du eta bermatutako zenbatekoen nahikotasuna hobetzen du, batez ere adingabeak dauden kasuetan.
-
- Prestazio ekonomikoen kudeaketa sinplifikatzen eta arintzen du, segurtasun juridiko handiagoarekin eta identifikazio- eta kontrol-tresnak hobetuz.
-
- Gizarteratzean eta laneratzean eraginkortasun handiagoa bilatzen du, batez ere Gizarte Zerbitzuen eta Enplegu Zerbitzuen lan koordinatuaren bitartez.
-
- Diru-sarrerak Bermatzeko eta Gizarteratzeko Euskal Sistemaren gobernantza hobetzen du, administrazioen arteko koordinazio handiagoarekin.
-
- Gizarte-ekintzako hirugarren sektorearen parte-hartzea errazten du.
Azken batean, egoera kaltebera guztietan hobetzen da. % 40rainoko adingabeak dituzten familien kasuan, eta % 17rainoko pentsiodunen kasuan, estaldura hobea eskaintzen du tratu txarrak jasan dituzten edo esplotatuta dauden emakumeen, desgaitasunen bat duten pertsonen, errefuxiatuen, eta alde egitera behartuta eta itzuli nahi duten terrorismoaren biktimen kasuetan.
