Ukrainako 769 haur eta nerabek matrikulazioa eskatu dute Euskadiko ikastetxeetan; 360 Gipuzkoan, 271 Bizkaian eta 138 Araban. Haien egokitzapena ahalik eta errazena izan dadin, bai familia biologikoak bai harrerakoak azken hilabeteetan erabili dute horretarako abian jarritako baliabideak eta laguntzak.
Aukerak Suspertzen Ukraina Aukerak Suspertzen programaren luzapena da. 2020an jarri zen martxan, COVIDen pandemiak eragindako arrisku, bazterketa edo pobrezia egoerei erantzuteko. Guztira, 2123 adingabek jaso zuten onura eskolaz kanpoko hezkuntza-laguntzako zerbitzu horretatik. Familien eta Haurren Zuzendaritzak sustatu zuen zerbitzu hori, eta Agintzari gizarte-ekimeneko kooperatibak kudeatzen du. Haren helburua da eten digitala murriztea eta gizartean desabantailan dauden neska, haur, nerabe eta familien gaitasunak indartzea.
Agintzari erreferentetzat hartuta, hogei bat gizarte-erakundek parte hartzen dute ekainaren amaieratik Aukerak Suspertzen Ukraina programaren garapenean. Jatorrizko ereduaren ildotik, ekimen honek eskolaz kanpoko hezkuntza-errefortzua eskaintzen die, presentziazkoa nahiz birtuala, Ukrainako gerra dela eta lekualdatutako lehen edo bigarren hezkuntzako adingabeei.
Abian jarri zenetik, 62 eskaera jaso dira programa honetan sartzeko, eta gaur egun 35 dira eskolaz kanpoko hezkuntza-laguntza jasotzen ari diren Ukrainako haurrak eta nerabeak.
Aukerak Suspertzen bezala, Aukerak Suspertzen Ukraina tokiko sare komunitarioa aktibatuz ematen den zerbitzua da; Hirugarren Sektoreko erakundeek, Ukrainatik datozen adingabeei udan harrera egiten dieten elkarteek, esku-hartze sozialaren esparruko profesionalek eta boluntarioek eskola-lanak egitean, ikasketa-teknikak ikastean edo gaitasun digitalak garatzean sortutako beharrei erantzuten diete.
Programan, halaber, haurren, nerabeen eta haien familien hizkuntza-gaitasunak garatzen dira, euskal hezkuntza-sistemara errazago egokitzeko. Gainera, helburu horrekin, zerbitzua erabiltzen duten pertsonek gailu elektronikoak eta konektibitate-txartelak erabil ditzakete.
Isuri Funtsa
Aukerak Suspertzen Ukraina programa Isuri Funtsaren zati bat da, Ukrainaren inbasioaren ondorio ekonomiko eta sozialei aurre egiteko Eusko Jaurlaritzak abian jarri duen premiazko neurrien multzoa.
Errusiak herrialdea inbaditu eta hurrengo egunetan abian jarri ziren berehalako neurriei, Gobernuak neurri osagarriak gehitu zizkien apirilean, biztanleriako sektore ahulenen beharrei erantzuteko, lehendik zeuden programak berraktibatuz edo indartuz; programa horiek frogatu zuten eraginkorrak zirela munduko pandemiaren ondorioen aurkako borrokan.
Erreskate sozialeko funts honek 15,1 milioi euro ditu guztira, eta Aukerak Suspertzen eredua handitzea barne hartzen du. Eredu horrek, Ukrainatik datozen adingabeak sartu eta haien integrazio akademikoa errazteko, 300.000 euroko aurrekontua gehitu du.
Programak martxan jarraituko du ikasturtean zehar, eskaria handitzea aurreikusten denean.
