Visesak eta Abanto Zierbenako Udalak hitzarmen bat sinatu dute gaur udalerriko San Fuentes eremuan alokairuko babes publiko ofizialeko 38 etxebizitza inguru sustatzeko. Udalerriko alkate Maite Etxebarriak eta Eusko Jaurlaritzako Lurralde Plangintza, Etxebizitza eta Garraio Saileko sozietate publikoaren zuzendari nagusi Carlos Quindósek akordio hori berretsi dute, etxebizitza-politiken garapena sustatu eta etxebizitza-premia dutela egiaztatzen dutenei etxebizitza bat eskuratzea errazteko.
Etxebizitzak eraikitzeko bi erakundeen arteko akordioari esker, Abanto Zierbenako Udalak doan eskualdatuko dizkio Visesari erregistro-finkaren titulartasuna eta hirigintza-eraikigarritasunaren % 100a. Sustapena eraiki aurretik, Visesak eremua garatuko du urbanistikoki, eta hiri-antolamenduko plan berezia (HAPB), hirigintzako jarduketa-programa (UJP), birpartzelazio-proiektua eta urbanizazio-proiektua zehaztuko ditu.
Aurretiazko lan horiek egin ostean, Eusko Jaurlaritzaren sozietate publikoak babes publiko ofizialeko 38 etxebizitza eraikiko ditu, eta babestutako alokairura bideratuko dira. Visesak, halaber, partzela urbanistikoki garatuko du. Espazio horiek Udalari eskualdatuko zaizkio sustatutako eta etxebizitzekin lotu gabeko partzelekin batera.
Adjudikazio-prozedura
Sustatuko diren alokairurako etxebizitza babestuak eskuratzeko, Abanto Zierbenan gutxienez urtebetez erroldatuta egon behar izango da etenik gabe, edo azken bost urteetan hiru urtez aldizka. Gainera, beste betekizunetako bat da Etxebiden alta emanda egon behar dela etxebizitza-eskatzaile gisa. Uneotan, Abanto Zierbenan 205 eskatzaile daude, % 74,6 alokairu-erregimenean.
