Ertzaintzaren helikoptero batek 61 urteko gizon bat erreskatatu du gaur eguerdian Muskizen, Itsaslur bide berdetik gertu dagoen harkaitz-eremu batean erorita. Zauritua, ondoren, Gurutzetako ospitalera eraman dute anbulantzian.
Eguerdiko hamabietan jakin da gizon bat erori dela Itsaslur bide berdeko harkaitz-eremu batean, Kobaron inguruan. Bertara joan dira Udaltzaingoa, Bizkaiko suhiltzaileak, Ertzaintza eta osasun-langileak.
61 urteko zaurituak arrakala bat zuen buruan, eta esku-ohe batean immobilizatu ondoren, Ertzaintzaren Zaintza eta Erreskate Unitateko helikoptero batek erreskatatu du. Jarraian, anbulantzia batera eraman du, eta Gurutzetako ospitalera eraman dute.
