Pedro Azpiazu Ekonomia eta Ogasuneko sailburuak aurrekontuaren ikuspegi orokorraren eta bere sailaren ikuspegi zehatzaren berri eman du aste honetan Euskadiko aurrekontuak azaltzeko Legebiltzarrean egin den lehen agerraldian. Horrela, Ekonomia eta Ogasun Sailak 139,1M € izango ditu, 2023an baino 1M € gehiago.
Finantzen Euskal Institutuaren baliabideak indartzeko apustuari eutsi zaio, 55M €-ko beste ekarpen bat eginez Gizarte Funtsari, FEIk Eusko Jaurlaritzaren finantza-beso bihurtu nahi baitu. 15,2M €-ko aurrekontua egin da finantza-kostua diruz laguntzeko, eta 1,3M €-koa, berriz, COVID-19a dela-eta Elkargirekin batera bultzatu zen finantza-laguntzako programan parte hartu zuten enpresa txiki eta ertainei abalaren kostua diruz laguntzeko. Aurrekontuen Legearen artikuluetan, hamabosgarren xedapen gehigarriak aurreikusten du Finantzen Euskal Institutuaren enpresa-ondarean sartuko direla SPRI – Garapenerako Euskal Agentziak «EZTEN, FCR» arrisku-kapitaleko funtsean dituen partaidetzak. Hori guztia finantza-tresnak arrazionalizatzeko helburuaren esparruan gertatzen da, eraginkortasun eta koordinazio handiagoa lortze aldera, finantza-inbertsioak Finantzen Euskal Institutuan zentralizatzeko.
Aseguru-polizetarako aurrekontua 4,6M €-koa izango da, eta diru-sarreretan 60M €-ko partida bat sartu da banku-gordailuen interesak kobratzeagatik.
EUSTATi dagokionez, 18,4M €-ko aurrekontua aurkeztu du, 1,5m €-tan finantzatua, bere diruzaintzako gerakinekin. Eustaten 2021-2024 Plan Estrategikoak Eustat Euskadiko datuaren ekosistemaren eragile nagusi bihurtzea planteatzen du. Horretarako, erakundearen eraldaketa digitalerako plana abiarazi behar zen. Plan hori 2023an hasi da, informazio-sistemak antolaketa-eredu berri eta eraginkor batean, e-Eustaten, eraldatzeko lanekin. Datozen urteetan, azpiegitura garatzeko inbertsioa egin beharko da, datuaren ekosistemaren arkitektura berria egin beharko da eta analitika aurreratuko ereduak garatu beharko dira. Horretarako, 2024ko ekitaldirako milioi bat euroko inbertsioa beharko da. Hori dela eta, Eustaten inbertsio-plana 600.000 eurotik 1,6m eurora igaroko da. Bestalde, LEHIAREN EUSKAL AGINTARITZAK 2M €-ko aurrekontua izango du.
«Ziurgabetasun globalaren testuinguru honetan, aurrekontua gure zerbitzu publikoak mantentzeko eta hobetzeko euskarri eta bermatzaile bihurtzen da, pertsonekiko, garapen ekonomikoarekiko, enpleguarekiko eta gure planetaren zaintzarekiko etorkizun konprometitua eraikitzeari begira», adierazi du Azpiazuk.
Amaitzeko, sailburuak adostasunerako deia egin du, ziurgabetasun globalek (pandemia, gatazka belikoak eta inflazio handia) markatutako legegintzaldiaren azken aurrekontuan, zalantzarik gabe gastu publikoa baldintzatu baitute.
Azpiazuk ostegun honetan bertan denei, VOXi izan ezik, balizko aliantzak aztertzeko kontraste-bilera batera deituko diela jakinarazi die taldeei. «Badakit hauteskunde urte honetan ez dela erraza babesa lortzea, baina konfiantza dut denok jakingo dugula egoeraren mailan egoten, eta Euskadi politika izan beharko lukeenaren isla bihurtu ahal izango dela», amaitu du.
