Eusko Jaurlaritzako Turismo, Merkataritza eta Kontsumoko sailburu Javier Hurtadok balantzea egin du Eusko Legebiltzarrean, Euskadik Fitur 2024 azokan izan duen presentziari buruz. Fitur 2024 Madrilen egin zen joan den astean, eta Europako turismo-azoka garrantzitsuenetako bat da. Euskadik Fiturren duen presentzia, sailburuaren hitzetan, 3 ardatz nagusitan oinarritzen da.
Lehenengo ardatza nazioan eta nazioartean gure turismo-eskaintza sustatzea da. Horretarako, “aldundien, eskualdeen eta udalen aldetik, beren produktu turistiko nabarmenenen 25 aurkezpen egin dira. Eta 12.000 pertsona baino gehiago artatu ditugu gure mahaietan”.
Bigarren ardatz garrantzitsua lan-bilerena da. FITUR funtsezko topagunea da beste autonomia-erkidego, eskualde, erakunde eta enpresekiko harreman instituzionaletarako.
Eta, hirugarren ardatza, “garrantzitsuena”, gure sektoreari zuzendutako babesa da. “FITUR plataforma bat da gurekin dauden euskal turismo-enpresentzat, eta stand horretan gune nagusi bat eskaintzen diegu bilera eta topaketa profesionalak egiteko. 167 enpresak lagundu digute, horietatik 148 pribatuak, eta 839 bilera egin dituzte 3 egun profesionaletan. Hau da, aurreko edizioan baino ia % 13 gehiago”.
Sailburuak gaineratu duenez, Euskadiko turismoarentzat oso agertoki positiboan gertatu da hori, “Euskadiko turismo-industriarentzat urterik onenean, ez bakarrik hazkunde kuantitatiboagatik (4,5 milioi bisita baino gehiago izan ditugu), baita nola hazten garen ikusita ere. Lehenik eta behin, modu desestazionalizatuan hazten ari gara. 2022tik % 8,3 hazi gara. Hazkundea % 12koa da udatik kanpoko hilabeteetan, baina % 0,4koa soilik uztaila eta abuztua hartzen baditugu. Bigarrenik, nazioarteko turismoa handitu dugu, egonaldiaren luzapenean eta desestazionalizazioan gehien laguntzen duena baita. Haren aldeko apustua egin dugu 2023an, sustapen-ahalegin handiarekin, % 15,6ko hazkunde-zifrek babestua estatuko % 3ren aldean. Eta, azkenik, modu orekatuan hazten ari gara lurralde osoan, eta horrek esan nahi du fluxuen mugimendua areagotu egiten ari dela”.
Amaitzeko, sailburuak gogorarazi du lankidetzak, gobernantzak eta elkarlanak berebiziko garrantzia dutela “100.000 familia baino gehiagori zuzeneko lana ematen dien industria baterako, hau da, Euskadiko enplegu guztiaren % 11. Eta, gainera, positiboki aktibatzen ditu beste sektore batzuk, tartean merkataritza, ostalaritza, garraioa edo kultura, adibide batzuk aipatzearren. Horregatik guztiagatik, enplegurako eta tokiko garapenerako funtsezko sektore baten aldeko apustua egiten jarraitzen dugu, turismo jasangarriaren, lehiakorraren eta arduratsuaren eredu batetik bultzatzen diharduguna”.
