2025eko maiatzak 9, Europaren eguna
Bihar, ostirala, maiatzak 9, Europaren eguna ospatuko da, eta Amaia Barredo Elikadura, Landa Garapen, Nekazaritza eta Arrantzako sailburuak nabarmendu du “Eusko Jaurlaritzak, lehen sektoreko erakundeekin eta organizazioekin batera, egiten duen lana Europar Batasuneko elikadura, landa-garapen eta arrantza politiken abangoardian”.
Barredoren ustez, “Euskadi Europako erakundeen lehen lerroan ari da lanean −Batzordea, Europar Batasuneko Kontseilua, Eskualdeen Batzordea eta nekazaritzarekin eta arrantzarekin zerikusia duten estatuz azpiko lan-taldeak−, landaren eta itsasertzaren garapena sustatzen duten politikak aurkeztuz eta garatuz, eta, bereziki, datozen hilabeteetan herrialde askok egingo duten bezala, gure gazteentzat belaunaldi-errelebo positiboa sustatuz”.
Sailburuak adierazi duenez, “hainbeste aldaketa hain azkar gertatzen ari diren eta nazioartean egoera ziurgabea dugun une hauetan, Europak lidergoan jarraitu behar du Europar Batasuneko herrialde eta estatu guztien eta, horren barruan, Euskadiren ezaugarri diren printzipio demokratiko, solidario eta jasangarrietan oinarrituta”.
Azken hilabeteetan, Amaia Barredo Europako nekazaritzako eta arrantzako komisarioekin, Chistopher Hansen eta Costas Kadis´ekin, elkartu da, eta Euskadin eta Europar Batasun osoan sektorea hobetzeko eta garatzeko kezkak eta proposamenak helarazi dizkie.
“Badakizue Euskadik, EBren Atlantikoko fatxadatik, Europar Batasunaren garapenean lan egiten duela eta laguntzen duela, kontuan hartuta Batasunaren egiturak arreta berezia eskatzen duen unea bizi duela beste kontinente batzuetako pertsonek sortutako egoeren ondorioz”, adierazi du Barredok.
“EB bidegurutze batean dago eta erantzun bateratua eta estrategikoa eskatzen duten erronkei, barnekoei eta kanpokoei, egin behar die aurre bere egonkortasuna eta garrantzia bermatzeko. Europar Batasunaren gure oinarrizko balioak giza duintasuna errespetatzea, askatasuna, berdintasuna eta giza eskubideak dira. Hori guztia, estatu kideek, herrialdeek, autonomiek eta eskualdeek partekatzen duten hori guztia, pertsona oinarri duen elkarbizitzaren gainean eraikitzen ari garen Europaren oinarria da”.
Hurrengo belaunaldia
“Europaren eguna gure proiektu europarraren lorpenei eta erronkei buruz hausnartzeko eta, ongizate komunarekin konpromisoa hartuta duen Europa demokratiko eta kohesionatu batean Euskadiko herritar guztien partaidetza-zentzua indartzeko erreferentzia da”.
“Organizazio ugarik lan egiten dute EB osoan nekazari gazteak ordezkatzeko eta nekazari jasangarrien hurrengo belaunaldia sustatzeko. Nekazari Gazteen Europako Kontseilua (CEJA), nekazari gazteen premiei buruz kontzientziatzeko eta jardunbide egokien adibideak nabarmentzeko hainbat ekimen abian jarri dituzten Landa Sare Nazionalak (RRNN), Europako lankidetza-ekimenak garatzen dituzten nekazari gazteen zortzi sare eta YOURuralnet praktika komunitatea (Italiako RRN) dira adibide batzuk”.
“Europako politikak sustatzea −gure kasuan lehen sektorearekin zerikusia dutenak− funtsezkoa da Europar Batasuna herritarrengana hurbiltzeko, kohesioa indartzeko eta bere printzipioak eta helburuak pertsonen eguneroko bizitzan islatu daitezen bermatzeko. Informazioa duten eta konprometituta dauden herritarrak izatea funtsezkoa da gure Europa indartsua, inklusiboa eta erronka globalei aurre egiteko prestatua eraikitzeko” adierazi du Barredok.
Horregatik guztiagatik, Amaia Barredok «Euskadiko eta Europar Batasuneko gazteak gure etorkizuneko nekazaritza, abeltzaintza eta arrantza eraikiko duten mugimenduetan parte hartzera eta horiek sortzera» animatu ditu. Norabide berri bat garai berri baterako».
