- Proiektuak 15 hilabeteko gauzatze-epea du, eta lanak uda honetan hasiko dira
Eusko Jaurlaritzako Mugikortasun Jasangarriaren Sailak, Euskal Trenbide Sarea erakunde publikoaren bidez, Bilboko tranbiaren geraleku berriaren eraikuntza-lanak esleitu ditu Los Cañoseko pasealekuan; Atxuri eta Abusuko geralekuen artean kokatuko da.
Obrak, Viuda de Sainz eta Copasa enpresek osatutako enpresa elkartealdiari 4.548.006,53 euroan esleitua izan dira eta 15 hilabeteko gauzatze-epea izango dute. Honek, egitura eta arkitektura elementu guztiak izango dituen tranbiaren beste geltoki bat sortzea ekarriko du. Igogailu berri bat eta goiko aldean egongo den pasabide bat izango ditu, nasaren planta Kañu pasealekuarekin eta Miraflores etorbidearekin lotzeko. Horrez gain, itsasadarraren aldeko nasa Kañu pasealekuarekin lotuko duen bidea ere izango du, eta Zamakola kalearen eta Kañu pasealekuaren artean dagoen oinezkoentzako pasabidea estali egingo da.
Bilboko Udalarekin sinatutako hitzarmenak jasotzen duenez, ETSk kostuaren % 65 finantzatuko du, eta Bilboko Udalak gainerako % 35a hartuko du bere gain, dagoen pasabidea estaltzeko erabilitako altzairu herdoilgaitzaren kostu osoaz gain. ETS arduratuko da obren kontratazioaz eta egikaritzeaz, baita lanak zuzentzeaz eta teknikoki ikuskatzeaz ere. Bestalde, Udalak beharrezko lurzoruak jarriko ditu eskura, jarduketak gauzatzen lagunduko du eta, jaso ondoren, udalaren erabilera publikoko azpiegituren titulartasuna eta mantentze-lanak bere gain hartuko ditu.
