Eusko Jaurlaritzak positiboki baloratu du Familian Mugikorrik Gabeko Eguna ospatzea larunbat honetan, Bilbon eta Gasteizen. Ekimen hau familia-eremuko teknologiarekin harreman kontzienteagoa, orekatuagoa eta osasungarriagoa sustatzeko bultzatu da. Jardunaldia proposamen ireki, boluntario eta parte-hartzaile batean kokatu da, familien ongizate emozionala eta erlazionala bultzatzeko, denbora partekatua indartzeko eta mugikorrak eguneroko bizikidetzan duen eraginari buruzko hausnarketa sortzeko.
Casilda parkean eta Gasteizko Posta kalean prestatutako espazioei esker, familia asko hurbildu dira, proposamena ezagutu dute eta, kasu askotan, onartu egin dute telefonoak denbora batez gordetzea hitz egiteko, jolasteko, entzuteko eta elkarrekin gozatzeko, pantailarik gabe. Jardunaldiak, gainera, inpresioak, ohiturak eta erresistentziak biltzeko balio izan du, eta horiek baliagarriak izango dira pantailen erabilera arduratsuan sentsibilizatzeko eta laguntzeko ekintza publikoak diseinatzen jarraitzeko.
Lehen esperientzia honek uzten duen balorazioa bereziki esanguratsua da, dagoeneko eztabaida publikoaren parte den errealitate sozial bat berresten baitu: gero eta kontzientzia handiagoa dago mugikorrarekin dugun harremana berrikusteko premiari buruz, baina, era berean, oso argi ikusten da zenbateraino sartu den gure eguneroko bizitzan. Kalean sortutako elkarrizketak eta jardunaldiko oihartzun mediatikoak, hain zuzen ere, dimentsio bikoitz hori islatu dute: alde batetik, deskonexio-keinu txikiak probatzeko prestasuna; eta, bestetik, denbora luzez horiei eusteko benetako zailtasuna. Bilbon, adibidez, kazetaritza-estaldurak mugikorrik gabe ordu erdi irauteko erronkan jarri zuen arreta, eta Gasteizen, berriz, egun oso bat telefonorik gabe pasatzeko gai garen galdetu zen argi eta garbi.
Debeku gisa planteatu beharrean, ekimen honek berriro jarri du mahai gainean familiei teknologiaren erabilera positiboan laguntzearen garrantzia, helduen eredugarritasunetik, elkarrizketa partekatutik eta etxean akordioak eraikitzetik abiatuta. Horixe da, hain zuzen ere, ekintza honen indargune nagusia: hausnarketa konplexu bat esperientzia hurbil, sinple eta partekatu bihurtzea.
Donostian aurreikusitako jardunaldia maiatzean egingo da azkenean. Atzerapena hasierako data Errege Koparen amaierarekin bat etortzearen ondorio da, baina ekimen horrekiko konpromisoak bere horretan jarraitzen du, eta Gipuzkoako hiriburuak laster hartuko du bere edizioa, mezu argi bati jarraipena emanez: arreta-espazioak berreskuratzea, entzutea eta familian elkartzea, mugikorra alde batera uzten ikastea ere beharrezkoa da, ordu batzuetan bakarrik bada ere.
