Nafarroako Gobernuak gaurko bilkuran adierazi du gelen errentamendua arautzen duen Foru Legearen proposamena aintzat hartzearekin ados dagoela. Lege-ekimen hori Contigo Navarra–Zurekin Nafarroa, Partido Socialista de Navarra, EH Bildu Nafarroa eta Geroa Bai talde parlamentarioek aurkeztu dute, garaiko kontratuak ere arautzearren.
Hirugarren lehendakariordea eta Etxebizitzako, Gazteriako eta Migrazio Politiketako kontseilaria den Begoña Alfarok bileraren ondorengo prentsaurrekoan azaldu duenez, “Nafarroako Gobernua erabat lerrokatuta dago duen helburuarekin; alegia, gaur egun zenbait enpresa eta errentari, logelak alokatzeko irudien bidez eta ohiko alokairu-kontratu iraunkorrak sasoiko kontratuetara desbideratuz, burutzen ari diren gehiegikeriak saihestea, merkatu tentsionatuko eremuetan prezioak ez mugatzearren”.
Alfarok honela nabarmendu du: “gure komunitatean alokairuko etxebizitzen egungo merkatuan funtsezkoak diren bi alderdi arautu nahi dira, batez ere egonkortasuna eta eskuragarritasuna izateko eta jabeei nahiz maizterrei segurtasun juridikoa eskaintzeko”.
Halaber, hirugarren lehendakariordeak argitu du erregulazio berri horrekin Exekutiboak “muga jarri nahi diola legea saihesten duenari” eta ez garaiko kontratuei. «Jakin badakigu justifikatuak ere badaudela, eta horien gainean ez da ezer egingo. Lege-iruzurraren kontra eta hori bultzatzen dutenen kontra jokatu nahi da”, zehaztu du.
Erregulazio berri honen helburua da Nafarroan gelen errentamenduari aplikatu beharreko araudi-esparrua ezartzea, hainbat modalitate arautzeko; hala nola, ohiko etxebizitzarako gelaren errentamendua edo garaiko gelaren errentamendua.
Jarraipena eta kontrola egiteko gaitasuna indartzea
Gelak alokatzeari dagokionez, lege-proposamenean ezartzen dira ohiko etxebizitzarako gelen errentariei babes handiagoa eman ahal izateko oinarriak; Hiri Errentamenduen Legearen arabera etxebizitza-errentamenduetarako jada aurreikusitako babes-erregimena aplikatuko baitzaie, bereziki kontratuaren gutxieneko iraupenari, luzapenei, errentaren zehaztapenari, fidantzari eta lotutako beste eskubide batzuei dagokienean.
Bestalde, erregulazioaren bidez aldi baterako gelen errentamendu-kontratuen iruzurrezko erabilerak saihestu nahi dira, maizterren eskubideak saihesteko. Horretarako, behin-behinekotasunaren arrazoia justifikatzea eskatzeaz gain, kontratu horien iraupena gehienez urtebetekoa izan beharko da, eta errentamendua ohikotzat joko da behin-behinekotasuna berariaz finkatuta geratzen ez bada.
Orobat, nabarmendu behar da bizitegi-merkatu tentsionatuko eremu deklaratutakoetan, gelen errentamenduaren prezioak mugatzearen gaineko aurreikuspena egin dela. Nafarroan, 21 udalerri dira, gelen errentaren batuketak ezingo baitu etxebizitza osorako gehienez baimendutako errenta gainditu.
Arauaren barnean, gelen errentamendu-kontratuak kontrolatzeko eta ikuskatzeko mekanismo ezberdinak ezartzen dira, Nafarroako Etxebizitza Errentamendu Kontratuen Erregistroan inskribatuta, Nafarroako Gobernuak jarraipena eta kontrola burutzeko duen gaitasuna indartzearren, sistemak segurtasun juridiko eta gardentasun handiagoa izan dezan.
Gainera, errentatzaileek errentariei aldez aurretik eman beharreko informazioaren betebeharrak zabalduko dira, azken horien babesa hobetuz eta kontratuaren funtsezko baldintzak hobeto ezagutzen direla bermatuz.
Era berean, denboraldi bakoitzeko etxebizitza ez den beste erabilera baterako kontratuei buruzko xedapen gehigarri bat gehitu da, eta horrek aukera emango du kontratu-modalitate horretan egon daitezkeen iruzur-egoerei aurre egiteko. Ildo horretan, honako hauek bete beharko dira: aldi baterako arrazoia zehatz-mehatz identifikatzea, dokumentu bidez egiaztatzea, errentariaren ohiko bizilekua zein den adieraztea eta kontratuaren iraupenaren eta alegatutako arrazoiaren arteko egokitasuna erakustea.
Foru Exekutiboak uste du “etxebizitza gizarte-ongizatearen oinarrizko zutabea dela, eta botere publikoen betebeharra dela etxebizitza duina eta egokia izateko eskubidea gauzatzeko beharrezkoak diren baldintzak sustatzea”. “Foru lege proposamen hau aukera bat da gelen errentamenduaren merkatuaren funtzionamendua hobetzera bideratutako mekanismoak eta tresnak ezartzeko, segurtasun juridikoa, gardentasuna eta errentarien babesa indartuz nahiz eskuratzeko moduko etxebizitza bat eskuratzea erraztuz”, adierazi du Nafarroako Gobernuak gaur hartutako akordioan.
