Gobernu Kontseiluak, gaurko bileran, Euskal Autonomia Erkidegoko Ogasun Nagusiak konkurtso-prozesuetan akordioak eta hitzarmenak sinatzeko aplikatu beharreko araudia eguneratzen duen dekretua onartu du. Arauak 1996tik indarrean zegoen Dekretua ordezten du. Arauak haren edukia egungo errealitatera egokitzen du eta segurtasun juridikoa eta efizientzia indartzen ditu kreditu publikoen kudeaketan. Kaudimengabezia-egoeran dauden enpresek edo pertsonek Ogasun Publikoarekin dituzten zorrak dira konkurtsoetako kreditu publikoak, eta Administrazioak zor horiek ordaintzeko baldintzak erabaki ditzake, hala nola geroratzeak edo kitatzeak.
Dekretu berriaren helburu nagusia da duela ia hiru hamarkadatatik indarrean zegoen arau-esparrua modernizatzea, eta, horretarako, eskumenak zehazteko irizpide argiagoak sartzea eta goragoko organoen esku-hartzea eskatzen duten zenbatekoak eguneratzea. Horrekin, Eusko Jaurlaritzak sistemaren koherentzia indartzen du, eta testuinguru ekonomiko konplexuago eta dinamikoago honetan erabakiak hartzea errazten du.
Berritasun nagusien artean, arauak berariaz bereizten du akordioen eta hitzarmenen tratamendua, eraginpeko kredituen titulartasunaren arabera. Euskal Autonomia Erkidegoko Administrazio Orokorraren eta haren organismo autonomoen titulartasuneko kredituen kasuan, akordioak edo hitzarmenak sinatzeko eskumena finantza-arloan eskumena duen zuzendaritzako titularrarena izango da. Esleipen hori konfiguratu da goragoko organoek, hala badagokie, eraginpean dagoen zenbateko ekonomikoaren arabera eman behar dituzten baimenak alde batera utzi gabe.
Ildo horretan, dekretuak baimen horiek zehazten dituzten atalase ekonomikoak eguneratu ditu. Ezartzen da milioi bat eurotik gorako kredituei eragiten dieten akordio edo hitzarmenek ogasun-arloko eskumena duen sailburuaren baimena behar dutela. Zenbatekoa bost milioi eurotik gorakoa bada, Gobernu Kontseiluak berak eman beharko du baimena. Eguneratze horrek ahalbidetuko du mugak egungo errealitate ekonomikora egokitzea, eta garrantzi handieneko eragiketen kontrola eta ikuskapena hobetzea.
Bestalde, arauak berariaz arautzen ditu zuzenbide pribatuko ente publikoen titulartasuneko kredituekin lotzen diren akordioak eta hitzarmenak. Kasu horietan, beren estatutuak zehaztu dituzten organoei dagokie horiek sinatzea eta, hala badagokio, baimentzea. Hartara, dekretuak entitate horien antolaketa-autonomia aitortzen du, eta haien araubide juridikoa errespetatzen du.
Dekretu hau onartzea aurrerapen nabarmena da konkurtso-egoeretako kreditu publikoen kudeaketari aplika dakiokeen arau-esparrua eguneratzeko bidean. Eusko Jaurlaritzak, beraz, kontrol-mekanismoak indartzen ditu, eta Administrazioari egungo beharretara egokitutako tresna arinagoak ematen dizkio, baliabide publikoen kudeaketa efikazagoa eta gardenagoa izan dadin.
