Gaurko Gobernu Kontseiluak IES Astigarraga BHI berria eraikitzeko baimena eman du, 22,8 milioi euroko inbertsioarekin guztira. Aurreikusitako obren iraupena 24 hilabetekoa izango da. Obrek 24 hilabeteko iraupena izango dutela aurreikusten da.
Astigarragak, horrela, lehen aldiz izango du Derrigorrezko Bigarren Hezkuntzako institutu propioa. Gaur egun, Lehen Hezkuntza amaitzen duen ikasleriak Martuteneko institutuan edo inguruko beste udalerri batzuetan jarraitzen ditu ikasketak. Azken urteotan Astigarragak izan duen hazkunde demografiko handiak hezkuntza-beharrak areagotu ditu, eta Bigarren Hezkuntzako ikastetxe propio baten beharra indartu du.
Institutu berria Derrigorrezko Bigarren Hezkuntzako lau lerro oso hartzeko diseinatuko da, eta DBHko 16 unitate izango ditu. Horrez gain, berariazko gelak, gimnasioa, jangela, espazio osagarriak eta ikasleei kalitatezko hezkuntza eskaintzeko beharrezko gainerako instalazioak izango ditu.
Era berean, proiektuak etorkizuneko ikuspegia du, eta aurrerago Batxilergoko sei gela eta espazio espezializatu berriak gehitzeko aukera aurreikusten du. Horrela, udalerriaren bilakaera demografiko eta hezitzaileari egokitzeko gaitasuna bermatuko da.
Euskal arrantza-sektorearen plangintza, merkaturatzea eta modernizazioa indartzea
Era berean, Gobernu Kontseiluak Euskadiko arrantzako eta akuikulturako ekoizleen erakundeentzako laguntzen deialdia onartu du, 2026rako 3,35 milioi eurokoa, Euskadiko arrantza-sektorearen plangintza-, merkaturatze- eta modernizazio-gaitasuna indartzeko.
Bi laguntza-lerro aurreikusten dira. Lehenengoak, ekoizpen- eta merkaturatze-planak prestatzea eta gauzatzea finantzatuko du. Tresna estrategiko horien bidez, erakundeek beren jarduera planifikatzen dute, berrikuntza bultzatzen dute, produktuen trazabilitatea hobetzen dute, sustapen-, prestakuntza- eta merkaturatze-ekintzak garatzen dituzte edo kudeaketa efizienteagoa lortzeko tresna berriak sartzen dituzte. Bigarren lerroak berregituraketa-prozesuen ondoren sortutako ekoizle-erakundeak finkatzen lagunduko du, jardueraren lehen urteetan haien funtzionamendua erraztuz eta ekonomia- eta ingurumen-erronkei aurre egiteko sektore indartsuago, koordinatuago eta prestatuago bat bultzatuz.
Erakunde interesdunek 2026ko irailaren 30era arte aurkeztu ahal izango dituzte eskabideak, soilik bide elektronikoz, euskadi.eus egoitza elektronikoaren bidez.
Handitu Innova, berrikuntza teknologikoko inbertsioa nekazaritza-ekoizpen primarioan
Gobernu Kontseiluak onartutako beste puntu bat Handitu Innova 2026 programa da, Euskadiko nekazaritza-ekoizpen primarioan berrikuntza teknologikoan inbertsio handiak bultzatzeko laguntza-lerro berri bat. Programak 1,25 milioi euroko zuzkidura izango du, eta aukera emango du nekazaritza-ustiategiak eraldatzeko gai diren proiektu estrategikoak laguntzeko, teknologia aurreratua txertatuz.
Laguntzak nekazari profesionalei, familia-ustiategiei, kooperatibei, nekazaritza-sozietateei, CUMAri eta beste elkarte batzuei zuzenduta daude, baldin eta beren jarduera Euskadin garatzen badute eta berrikuntza teknologikoan oinarritutako 300.000 eurotik gorako inbertsio-proiektuak aurkezten badituzte.
Deialdia agindua Euskal Herriko Agintaritzaren Aldizkarian argitaratzen den unean irekiko da, eta 2026ko urriaren 15era arte egongo da irekita. Eskabideak elektronikoki aurkeztu beharko dira Eusko Jaurlaritzaren egoitza elektronikoaren bidez, proiektuaren memoria tekniko eta ekonomikoarekin eta oinarri arautzaileetan eskatutako dokumentazioarekin batera.
2,7 milioi euro Eibarren trenbidea integratzeko
Gobernu Kontseiluak baimena eman du 2,7 milioi euro bideratzeko Euskal Trenbide Sareari, Eibarren egiten ari diren trenbide-azpiegituraren hiri-integrazioko jarduketetarako. Euskal Trenbide Sareak Estaziño eta Azitain arteko trenbide-trazadura estali du. Eibarren egin den ezaugarri horietako hirugarren proiektua da, Ardantzako geltokia eta Amaña eta Ardantza arteko atzeko geltokia estali ondoren trenbide-sarea bertan hobeto integratzeko egin dena.
Esku-hartze hau Europar Batasunak finantzatutako Gobernu zentralaren Next Generation EU Suspertze, Eraldatze eta Erresilientzia Planaren barruan sartzen da.
700.000 euro kirolarien parte-hartzea sustatzeko nazioarteko lehiaketetan eta maila goreneko estatuko emakumezko ligetan
Gobernu Kontseiluak 700.000 euro bideratzea onartu du 2026. urtean egin edo hasten diren nazioarteko lehiaketetan kirolarien parte – hartzea sustatzera. Zehazki, bi lerro lagunduko dira deialdi honetan: lehena, nazioarteko eremua eta izaera duten kirol-lehiaketa ofizialetan kategoria absolutuan lehiatzen diren kirolarientzat izango da; eta bigarrena, emakumezkoen taldeko kiroletan liga nazionaletan kategoria absolutuan parte hartzen duten kirolarientzat.
Deialdi honetara aurkeztu nahi duten klub, kirol-elkarte edo erakundeek honako irizpide hauek bete beharko dituzte: Nazioarteko federazio baten, Europako federazio baten edo nazioarteko liga profesional baten egutegi ofizialean sartuta egon beharko dute. Eta, emakumezkoen liga estatalak kategoria absolutuko federazioaren edo liga profesionalaren egutegi ofizialean sartutako maila gorenekoak izango dira.
Agindu honetan araututako dirulaguntzetarako eskabideak aurkezteko epea hilabetekoa izango da, agindua Euskal Herriko Agintaritzaren Aldizkarian argitaratu eta hurrengo egunetik hasita.
GIB/hiesa, C hepatitisa edo sexu-transmisiozko infekzioak prebenitzen eta kontrolatzen lan egiten duten irabazi-asmorik gabeko erakundeentzako laguntzak
Gainera, Gobernu Kontseiluak 2026an GIB/hiesak, C hepatitisak edo sexu-transmisiozko infekzioek (STI) eragindako infekzioak prebenitzeko eta kontrolatzeko jarduerak Euskadin egiten dituzten ekimen sozialeko eta irabazi-asmorik gabeko erakundeentzako laguntzen deialdia onartu du, 300.000 eurokoa.
Horrela, deialdi honetan, Euskal Autonomia Erkidegoan garatutako proiektu-mota hauek lagunduko dira:
- a) Gizonekin sexua duten gizonen kolektiboari zuzendutako esku-hartze proiektuak, kontuan hartuta kolektibo horretan GIBak, C hepatitisak eta STIek egun duten garrantzi epidemiologikoa.
- b) GIBari, C hepatitisari eta STIei dagokienez kalteberak diren beste kolektibo batzuei zuzendutako proiektuak: etorkinak, drogak bide parenteraletik hartzen dituzten pertsonak, prostituzioan aritzen diren pertsonak, eta, oro har, gizarte-bazterketako egoeran daudenak.
- c) C hepatitisaren, GIBaren eta sexu-transmisiozko infekzioen diagnostiko goiztiarrera bideratutako proiektuak.
- d) GIBarekin bizi diren pertsonei laguntza psikologikoa eta soziala emateko proiektuak.
Eskaerak aurkezteko epea hilabetekoa izango da, agindua Euskal Herriko Agintaritzaren Aldizkarian argitaratu eta hurrengo egunetik aurrera.
Euskarazko ikerketari bultzada, Administrazio Publikoari buruzko azterlanak egiteko
Gobernu Kontseiluak Administrazio Publikoari eta Administrazio Publikoarekin lotutako Zuzenbide Publikoari buruzko azterketak eta ikerketak egiteko 2026-2027 deialdia onartu du. Deialdi honen bidez, euskal erakunde eta administrazioei buruzko ezagutza eta hausnarketa zientifikoa sustatu nahi da. Deialdiak 20.000 euroko bi laguntza aurreikusten ditu, baina jaso beharreko azken zenbatekoa egindako lanaren balorazioari lotuta egongo da.
Ikerketak edozein ikuspegi zientifikotatik egin ahal izango dira, ondorengo gaiak ardatz hartuta: eskumenen, erakundeen edo arauen esparrua; administrazioen antolaketa, egitura eta funtzionamendua; erakundeen eta gobernuen arteko harremanak; kudeaketa edo/eta zerbitzu publikoak; edo eredu, proposamen eta esperientzia berritzaileak ekartzea.
Gainera, aurtengo edizioan euskarazko ikerketari emandako laguntza indartuko da, laguntzetako bat euskaraz egindako lanetara bideratuko baita, egungo inpaktu zientifikoa baloratzeko sistemek hizkuntza gutxituetan egindako argitalpen eta ikerketetan sortzen duten eragin kaltegarria zuzentzeko.
Merkataritzako Lankidetza Protokoloa, tokiko merkataritza bultzatzeko
Era berean, Turismo, Merkataritza eta Kontsumo Sailak Gobernu Kontseiluan jakinarazi du lankidetza-hitzarmen bat sinatu duela Sailak, Bilboko Udalak, Bizkaiko Foru Aldundiko Enplegu, Gizarte Kohesio eta Berdintasun Saileko Enplegu eta Ekintzailetzako Foru Agentziak (DEMA), Bizkaiko Merkataritza Elkarte eta Federazioek (Bizkaidendak eta CECOBI) eta Bilbao Dendak Hiri Merkataritzako Plataformak.
Protokoloaren helburua da aldeen arteko lankidetza-esparru bat ezartzea, interes komunak lortzeko balioko duten ekimenak elkarrekin bultzatu eta garatzeko, besteak beste, enpresa-transmisioaren formula indartzea, Bilboko udalerriko merkataritzan eragina duten politika instituzionalen koordinazioa eta eraginkortasuna hobetzeko aukera emanez.
Protokoloaren koordinazioa eta jarraipena errazteko, jarraipenerako batzorde tekniko bat sortuko da, gutxienez alderdi bakoitzeko ordezkari banak osatua. Batzorde horrek inplementatu beharreko ekimen eta ekintzen jarraipena egingo du, eta protokoloaren betetze-maila ebaluatuko du, besteak beste.
Protokolo honek bi urteko iraupena izango du hasieran, eta ondoz ondoko aldietarako luzatu ahal izango da, alderdi sinatzaile guztiek aho batez eta idatziz hala adostuz gero.
Lankidetza-hitzarmen berria Euskal Mendizale Federazioarekin
Gobernu Kontseiluak ontzat eman du Segurtasun Sailaren eta Euskal Mendizale Federazioaren arteko lankidetza-hitzarmen berri bat sinatzea. Federazioa Larrialdiei Aurre Egiteko eta Babes Zibileko Euskal Sistemaren erakunde laguntzailea da, eta gaur egun 40.000 pertsona federatu baino gehiago ditu; mendiarekin lotutako jarduerak egiten dituzten pertsonen segurtasunaren arloan erreferentziazko erakundea da. Hitzarmenak lau urteko iraupena izango du formalizatzen denetik aurrera, eta, aldeek berariaz hala erabakita, beste lau urtera arteko aldi gehigarri baterako luzatu ahal izango da.
Akordioaren arabera, Federazioak konpromisoa hartzen du Segurtasun Sailarekin lankidetzan aritzeko mendiko arriskuei, sorospenei eta jarduketa seguruei buruzko prestakuntza teknikoko jardueretan; segurtasuna sustatzeko, herritarrak kontzientziatzeko, komunikatzeko eta zabaltzeko ekintzetan; segurtasun-politikak eta aholkularitza garatzeko bileretan eta lantaldeetan; eta mendiko dispositiboetan, Larrialdiei Aurre Egiteko eta Meteorologiako Zuzendaritzak haren parte-hartzea eskatzen duenean.
Bestalde, Segurtasun Sailak konpromisoa hartzen du Federazioaren urteko jarduera-programan jasotako ekintzak finantzatzeko, ekitaldi bakoitzerako Euskal Autonomia Erkidegoko Aurrekontu Orokorretan erakundearen aldeko dirulaguntza izendun gisa jasotako zenbatekoetan.
Larrialdien kudeaketan koordinazioa indartzea hiru foru-aldundiekin
Azkenik, Gobernu Kontseiluak Segurtasun Sailaren eta Araba, Bizkaia eta Gipuzkoako foru-aldundien arteko hiru lankidetza-hitzarmen berri sinatzea baimendu du larrialdien kudeaketaren arloan, zehazki, ahotsaren eta datuen transmisiorako azpiegituren esparruan.
Akordio horien helburua da SOS Deiak-en, aginte- eta kontrol-zentroen eta larrialdien, suteen prebentzio eta itzalketaren eta salbamenduaren arloan eskumena duten foru-zerbitzuen arteko lankidetza eta koordinazioa indartzea.
Hitzarmenek administrazio sinatzaileak Eusko Jaurlaritzak kudeatzen duen TETRA irrati mugikorreko sare digitalean —ENBOR SAREA— integratzea antolatzen dute, eta ahotsa eta datuak informazio- eta komunikazio-sistemen bidez trukatzea errazteko mekanismoak aurreikusten dituzte. Horrela, baliabideak mobilizatzea eskatzen duten larrialdien eta gorabeheren aurrean erantzun eraginkorragoa eta koordinatuagoa ematea errazten da.
Horrela, Segurtasun Sailak doan emango die hiru foru-aldundietako taldeei TETRA ENBOR SAREA sarean sartzeko aukera, larrialdien kudeaketa eta arreta esklusiboki gauzatzeko dituzten eginkizunetan beharrezkoak diren komunikazioetarako. Hitzarmenek lau urteko hasierako indarraldia izango dute sinatzen direnetik aurrera, eta, aldeek aho batez hala erabakita, beste lau urtera arteko aldi gehigarri baterako luzatu ahal izango dira.
