- Eusko Jaurlaritzaren ordezkaritza batek garapen jasangarriari buruzko Nazio Batuen urteko foro nagusian parte hartuko du uztailaren 13tik 16ra, Euskadik gobernantzan, berrikuntza sozialean eta GJHen lokalizazioan duen esperientzia partekatzeko
- Ander Caballero Kanpo Harremanen eta Euskadi Globalaren idazkari nagusiak hitz egingo du Local and Regional Governments Forumean, eskualdeetako eta tokiko gobernuek 2030 Agendan duten eginkizunari eskainitako High-level Political Forumeko (HLPF) gune nagusian
- Eusko Jaurlaritzak, Agirre Lehendakari Centerrekin eta Columbiako Unibertsitatearekin batera, Agirre lehendakariaren legatuari eta demokraziaren etorkizunari buruzko jardunaldi bat antolatuko du lehen Eusko Jaurlaritzaren 90. urteurrenaren esparruan
Uztailaren 13tik 16ra bitartean, Eusko Jaurlaritzaren ordezkaritza batek, Ander Caballero Kanpo Harremanen eta Euskadi Globalaren idazkari nagusia, Asier Aranbarri Berrikuntza Sozialaren eta 2030 Agendaren zuzendaria eta Conchi Aranguren, Euskadik Estatu Batuetan eta Kanadan duen ordezkaria, buru direla, High-level Political Forum on Sustainable Development (HLPF) foroan, 2030 Agendaren eta Garapen Jasangarrirako Helburuen (GJH) jarraipena egiteko Nazio Batuek NBEren New Yorkeko egoitzan antolatu duen urteko foro nagusian, parte hartuko du.
Eusko Jaurlaritzak, parte-hartze horren bidez, Euskadiren nazioarteko proiekzioa indartu nahi du hainbat arlotan, hala nola, gobernantzan, 2030 Agendan eta berrikuntza sozial eta demokratikoan. Horrez gain, lankidetza sendotu ahal izango du Euskadirekin harreman egonkorra duten nazioarteko erakunde eta sareekin, eta horien artean daude Coalición Local2030, ONU-Habitat, OCDE, CGLU, Regions4 eta ORU-FOGAR.
Agendaren mugarri nagusietako bat Ander Caballerok Local and Regional Governments Forum (LRGF) foroan egingo duen esku-hartzea izango da. Foro hori HLPFren programa ofizialeko topaleku nagusia izango da, Estaturik gabeko nazioek eta eskualdeetako eta tokiko gobernuek Garapen Jasangarriko Helburuak lortzean betetzen duten eginkizunari eskainia.
Esko Jaurlaritza foro horretan egotea Euskadik azken urteetan 2030 Agendaren lokalizazioan eta maila anitzeko gobernantzaren arloan egindako lanaren aitorpena da. Topaketan agintari politikoak, nazioarteko erakundeak eta adituak bilduko dira, lurraldeak eraldaketa jasangarriaren protagonista gisa kokatuko dituen gobernantza-eredua bultzatzeko.
Eusko Jaurlaritzak defendatuko du 2030 Agenda bizkortzeko ezinbestekoa dela Estaturik gabeko nazioen, eskualdeetako eta tokiko gobernuen, eginkizuna indartzea; izan ere, estrategia globalak lurraldeetan bihurtzen dira politika publiko zehatzak, eta lurraldeetan sortzen dira administrazioen, enpresen, unibertsitateen eta herritarren arteko lankidetza-modu berriak ere.
Lan egiteko modu horren adierazle nagusietako bat Euskadi Local2030 Hub da, Eusko Jaurlaritzak bultzatua, erakunde publikoen, sektore pribatuaren, unibertsitateen eta gizarte-zibilaren arteko aliantzen bidez GJHen lokalizazioa bizkortzeko lankidetza-espazio gisa. Hub hori ezagutza partekatua sortzeko, lankidetza bultzatzeko eta garapen jasangarriaren arloko Euskadiko esperientzia nazioartera proiektatzeko plataforma gisa finkatu da.
Euskadiko ordezkaritzak Coalición Local2030 plataformak antolatutako Local2030 Coalition Special Event ekitaldian ere parte hartuko du, eta bertan Euskadi Local2030 Hubaren aurrerapenak aurkeztuko ditu eta nazioarteko erakundeekin eta 2030 Agendaren lurralde-ezarpenarekin konprometituta dauden beste lurralde batzuekin aliantzak indartzen jarraituko du.
Agirre lehendakariaren legatua abiapuntu gisa
HLPF egiten den egun horietan, Eusko Jaurlaritzak, Agirre Lehendakari Centerrekin (ALC) eta Columbiako Unibertsitatearekin batera, lehen Eusko Jaurlaritzaren 90. urteurrenari lotutako topaketa bat antolatuko du.
Uztailaren 14an, High-level Political Forumaren esparruan, ‘Agirre lehendakaria eta demokraziaren etorkizuna. Polarizazio politikoari heltzeko tresna digital berriak’ mintegia egingo da Columbiako Unibertsitatean. Bertan nazioarteko hainbat aditu bilduko dira demokrazia garaikideek aurre egin beharreko erronkak aztertzeko.
Parte-hartzaileen artean, Peter T. Coleman nabarmentzen da, Columbiako Unibertsitateko irakaslea eta nazioarteko erreferente nagusietako bat gatazkak konpontzean, polarizazioan eta bakea eraikitzean.
Jaurlaritzaren ustez, 2030 Agendan aurrera egiteak politika publiko eraginkorrak garatzea ez ezik konfiantza sortzeko, herritarren parte-hartzea sustatzeko eta administrazioen eta gizartearen arteko lankidetza indartzeko gai diren erakundeak indartzea ere eskatzen du. Mintegiak polarizazioa, desinformazioa eta desberdintasunak jorratuko ditu berrikuntza demokratikoaren eta komunitatea eraikitzearen ikuspegitik.
Laburbilduz, Eusko Jaurlaritzak New Yorken izango duen agendak bi ildo estrategiko osagarri uztartuko ditu: batetik, Euskadiren nazioarteko proiekzioa indartzea 2030 Agendaren lokalizazioaren eta gobernantza kolaboratiboaren erreferente gisa; eta, bestetik, erronka global nagusiei aurre egiteko ezinbesteko baldintza gisa, demokrazia indartzeari buruzko nazioarteko hausnarketa sustatzea.
Presentzia sendoa Nazio Batuetan
High-level Political Forum on Sustainable Development (HLPF) 2030 Agendaren betetze-maila ebaluatzeko Nazio Batuen foro Nagusia da. Urtero, gobernuak, nazioarteko erakundeak, eskualdeetako eta tokiko agintariak, gizarte zibila eta sektore pribatua biltzen ditu New Yorken, aurrerapenak partekatzeko eta aliantza berriak sustatzeko.
Eusko Jaurlaritzak etenik gabe parte hartu du foro horretan 2017tik. 2018an, orduan Kanpo Harremanen idazkari nagusia zen Marian Elorzak Agenda Euskadi Basque Country 2030 eta maila anitzeko gobernantzako euskal esperientzia aurkeztu zituen. 2022an, Iñigo Urkullu lehendakariak Euskadi Coalición Local2030en Idazkaritzaren egoitza izateko hautagaitza aurkeztu zuen. Jonan Fernandezek, bere garaian Trantsizio Sozialaren eta 2030 Agendaren idazkari nagusia izan zenak, eta Euskadiren Estatu Batuetarako Ordezkaritzaren arduradunek ere parte hartu izan dute beste edizio batzuetan.
Urte hauetan zehar, Euskadik 2030 Agendaren ezarpenean egindako aurrerapenak partekatu ditu, Estaturik gabeko nazioek, eskualdeetako eta tokiko gobernuek GJHak betetzea bizkortzeko funtsezko eragile gisa duten eginkizuna defendatu du eta Nazio Batuekin eta garapen jasangarriarekin konprometitutako nazioarteko sare nagusiekin duen lankidetza sendotu du.
