- Lehen aldiz, Jaurlaritzako sail guztiak inplikatuta egongo dira 2018an onartutako soldata-arrakala murrizteko estrategiaren parte den planean
- Emakundeko zuzendaria Emakumeen eta Gizonen Berdintasunerako Sailarteko Batzordeko buru izan da gaur, eta orain arte egindako aurrerapenen berri eman du
Miren Elgarresta Emakundeko zuzendaria Emakumeen eta Gizonen Berdintasunerako Sailarteko Batzordeko buru izan da gaur. Batzorde horretan Eusko Jaurlaritzako sail guztiak daude ordezkatuta, eta bertan Soldata Arrakala Murrizteko III. Plan Operatiboa aurkeztu da. Plan hau datorren irailean onartuko da behin betiko eta 2018an onartutako Soldata-arrakala murrizteko Estrategiaren esparruan bultzatzen den hirugarren plan operatiboa da. Estrategia honek 2030ean Euskadi soldata-arrakala txikiena duen Europako herrialdeetako bat izatea du helburu.
Gaur aurkeztu eta irailean onartuko den dokumentua ebaluazio- eta diagnostiko-prozesu baten emaitza da. Prozesu hori ia ehun neurritan gauzatzen da, eta Eusko Jaurlaritzako sail guztiek ezarri beharko dituzte datozen urteetan, soldata-arrakala desagerrarazten laguntzeko.
Gobernu Estrategia onartu zenetik alor horretan egindako aurrerapenen berri emateko ere balio izan du bilerak. Estrategia horri esker, soldata-desberdintasuna agenda instituzionalean eta sozialean kokatu ahal izan da, eta hirugarren plan honetan, lehen aldiz, Jaurlaritzako sail guztiak inplikatuta egongo dira, bai eta Sailarteko Batzordean ordezkatuta dauden erakunde autonomoak eta Eusko Jaurlaritzaren erakunde publikoak ere. 2022-2025 azken planean 8 sail zeuden inplikatuta.
Gaurko bileran, orain arte egindako aurrerapen batzuen berri eman da. Horrela, aurreko bi planei esker, soldata-arrakala murriztea lortu da, 2016an % 24 izatetik 2023an % 12 izatera igaro baita. Zifra hori Europako batez bestekoaren azpitik badago ere, ez du esan nahi arazoa gaindituta dagoenik.
Gainera, gizarte- eta enpresa-sentsibilitatea, kontziliazioa eta erantzukidetasuna bultzatu dira, eta lan-ikuskaritza indartu da, ikuskaritzari esker hobetu diren 6.000 emakume-kontratu baino gehiagorekin.
Plan berriak aurreko estrategietan ezarritako ardatzei eusten die, baina neurriak homogeneizatzeko eta ekimen berriak diseinatzeko irizpide komunak ere jasotzen ditu. Hala, jarraibide zehatzak jasotzen ditu prestakuntzari eta sentsibilizazioari, araudiari eta soldata-arrailean eragina duten faktoreei buruzko azterketei buruz, baita kontziliazio erantzukiderako laguntzei edo berdintasun-diagnostikoak eta -planak egiteari buruz ere.
