- Imanol Pradales Lehendakariak gaur eta bihar Donostiako Miramar Jauregian egingo den ‘Basque Segurtasun Foroa. Segurtasun integrala eta komunitatea’ Uda Ikastaroa inauguratu du
- Uda Ikastaro horrekin amaitutzat emango da Segurtasun Sailak urtebetez egin duen Basque Segurtasun Foroa
Eusko Jaurlaritzako Segurtasun Sailak duela urtebete hasi zuen Basque Segurtasun Foroa, erakundeek eta herritarrek segurtasunari eta etorkizuneko erronkei buruz dituzten kezken inguruan hausnarketa egiteko. Ordutik, azken hamabi hilabete hauetan, Foroak guztira 33 bilera egin ditu, ertzain-etxeek hartzen dituzten eskualdeetan banatuta. Bilera horietan mila pertsonak baino gehiagok parte hartu dute, eta bertan Segurtasun Sailak herritarrak kezkatzen dituzten gaiak eta etorkizuneko erronkak entzun ditu eta horiei buruz hausnarketa egin du segurtasun integralaren ikuspegitik.
Gaur goizean –eta joan den ekainaren amaieran foroak Donostian egindako azken bileraren ondoren–, Segurtasun Sailak amaitutzat eman ditu Basque Segurtasun Foroaren lanak, Miramar Jauregian egin den EHUren ‘Basque Segurtasun Foroa. Segurtasun integrala eta komunitatea’ Uda Ikastaroarekin.
Imanol Pradales Lehendakariak eman dio hasiera Uda Ikastaroari, eta bertan izan dira Bingen Zupiria Segurtasuneko sailburua, Ramiro González, Elixabete Etxanobe eta Eider Mendoza Arabako, Bizkaiko eta Gipuzkoako diputatu nagusiak, hurrenez hurren, Joxerramon Bengoetxea EHUko errektorea eta Segurtasun Saileko beste hainbat agintari eta arduradun ere.
Bere hitzaldian, Imanol Pradales Lehendakariak foroak urte honetan egindako lana azpimarratu du, foru ordezkarien, alkateen, ertzainen, udaltzaingoen, epaileen, fiskalen eta hezkuntza, enpresa, gizarte eta osasun arloetako ordezkarien ekarpenarekin aberastuta.
Lan horrek ondorio garrantzitsu bat ekarri du: euskal gizartea eta, oro har, mundua “azkar aldatzen ari dira, eta aldaketa horiek zaintza ez jaistera eta neurri berriak hartzera behartzen gaituzte”. “Gure helburua argi dago: gobernu gisa lanean jarraituko dugu euskal gizarteari aterpe bat eskaintzeko, ziurtasun eta segurtasun inguru bat, guztiok seguruago senti gaitezen”, ziurtatu du Lehendakariak.
Era berean, Imanol Pradalesek azpimarratu du Basque Segurtasun Foroak argazki gisa lan egiteko utzi duela autoritate-printzipioa zalantzan jarri dela edo balioak galdu direla. Kezka horrek Ertzaintzari eragiten diola esan du, baina baita irakasleei, autobus-gidariei edo osasun-langileei ere. Eta errespetua galtzea pertsona eta ondasun publiko edo pribatuekiko. “Foroek kezkak adierazteko ez ezik, proposamenak egiteko ere balio izan dute. Horrela, adibidez, Itun sozial eta politiko bat lortzea proposatu da, balio-sistema baten bidez, parte hartuz eta partekatuz”, amaitu du.
Inaugurazio-ekitaldian Christiane Kirketerp Europako Batzordeko Gizarte digital, Konfiantza eta Zibersegurtasunerako egungo zuzendari exekutiboak ere parte hartu du telematikoki.
Inaugurazio instituzionalaren ostean, Uda Ikastaroak hainbat hitzaldirekin jarraitu du aurrera, eta arrisku klimatikoaz eta open-dataz, bide-segurtasunaz eta balioez, hezkuntza-inklusioaz, zibersegurtasunaz edo herritarren segurtasun integralaz eta berrikuntzaz hitz egin dute beren esperientziak eta ikuspuntuak eman dituzten adituek.
‘Basque Segurtasun Foroa. Segurtasun Integrala eta komunitatea’ ikastaroak bihar jarraituko du adikzioei eta osasun mentalari, erresilientzia emozionalari eta desinformazioari eta deep-fakes deitzen direnei buruzko hitzaldiekin. Bingen Zupiria Segurtasuneko sailburuak emango dio amaiera Uda Ikastaroari, eta 2026-2030 Euskadiko Segurtasun Integraleko Plan Orokorraz mintzatuko da.
Basque Segurtasun Foroa
Basque Segurtasun Foroa 2025eko uztailean hasi zen, erakunde, elkarte eta herritarrekin segurtasunari eta gizarteak, ikuspegi integral batetik, aurre egin beharko dien etorkizuneko erronkei buruz gogoeta egiteko. Urtebetean, foroak 33 bilera egin ditu, eta 1.000 pertsonak baino gehiagok parte hartu dute Tolosaldea, Durangaldea, Arabako Lautada, Txorierri, Hernanialde, Urdaibai, Urola Garaia, Uribe Kosta, Urola Erdia, Vitoria-Gasteiz, Ibaizabal, Bidasoa, Mungialdea, Goierri, Debagoiena, Meatzaldea, Errioxa eta Arabako Mendialdea, Oarsoaldea, Bilbao, Aiaraldea, Urola Kosta, Lea-Artibai, Ezkerraldea, Debabarrena, Enkarterri eta Kuartango eskualdeetan, Araban, Gipuzkoan eta Bizkaian, eta gazteekin egin den beste batean.
Egindako dinamika parte-hartzaileetan segurtasunarekin lotuta aipatu diren kezka nagusiak izan dira herritarren segurtasuna, balioen galera, drogen kontsumoa eta trafikoa, autobabesaren kultura, indarkeria matxista, ziberdelinkuentzia, desinformazioa eta mehatxu klimatikoa. Hausnarketa horiek guztiak diagnostiko gisa erabiliko dira Eusko Jaurlaritzako Segurtasun Saila lantzen ari den eta urtea amaitu aurretik prest izango den 2026-2030 Euskadiko Segurtasun Integraleko Plana garatzeko.
