- Euskal LHk 74.963 plazarekin hasi du 2026-2027 ikasturtea (iaz baino 7.920 gehiago), eta prestakuntza pertsona bakoitzaren beharretara egokitzeko bide berriekin
- Imanol Pradales Lehendakaria buru izan da gaur Gasteizko Mendizabala LHIIn Lanbide Heziketako 2026-2027 ikasturteari hasiera emateko ekitaldian
Euskadik Lanbide Heziketako 2026-2027 ikasturteari ekin dio, 74.963 plaza eskainita (aurreko ikasturtean baino 7.920 gehiago), eta heziketa-zikloetan eta espezializazio-ibilbideetan matrikulatutako 51.785 ikaslerekin.
Ikasturte berri honen irekiera ofiziala, gaur goizean, Gasteizko Mendizabala LHIIn izan da. Imanol Pradales Lehendakaria izan da ekitaldiaren buru, ondoan zituela Begoña Pedrosa Hezkuntzako sailburua, Jon Labaka Lanbide Heziketako sailburuordea eta Unai Otxoa de Aspuru ikastetxeko zuzendaria.
Bisitan, Lehendakariak ikastetxeko instalazioak ibili ditu eta bertatik bertara ezagutu du bere haren prestakuntza-jarduera, ikasleak eta irakasleak agurtzeaz gain. Mendizabalak 1.129 ikasle ditu; horietatik 837k industriaren eta automobilgintzaren arloan ikasten dute, eta 292k zerbitzuen arloan. Ikastetxea Gasteizko Lanbide Heziketako sarearen parte da. Sarea 23 ikastetxek osatzen dute (14 sare publikokoak eta 11 itunpeko sarekoak) eta Arabako hiriburuko 7.476 ikasle baino gehiagori erantzuten die.
Lehendakariak Euskal Lanbide Heziketa «herriaren palanka» eta lehiakortasuna, gizarte-kohesioa eta integrazioa uztartzen dituen eredu gisa aldarrikatu du, hainbat hamarkadatan egindako apustu iraunkorraren eta erakundeen, hezkuntza-komunitatearen eta enpresen arteko lankidetzaren ondorioz. Pradalesek nabarmendu du sistemak «bultzada berri bat» emateko erronkari aurre egin behar diola orain, eraldaketa sozial, ekonomiko eta teknologikoei erantzuteko, Europa berrindustrializatzen laguntzeko eta Euskadira iristen diren pertsonak enpleguaren bidez integratzeko. Ildo horretan, «ez dago arrakastarako bidezidorrik» defendatu du, eta ikasleei ziurtatu die euskal LH leku egokia dela «hazteko eta zuen etorkizuneko proiektua eraikitzeko».
Ikastaro berriak, gainera, Lanbide Heziketa ikasteko eta osatzeko aukera berriak eskaintzen ditu. Lehen aldiz, bi gradu bikoitz jarriko dira abian. Eskaintza erdipresentzialak ere gora egin du, 20 ziklotara iritsita, eta batez ere langileei eta langabeei zuzendutako prestakuntza-eredu egiaztagarri berri bat jarri da abian.
Ikasle gehiago, plaza gehiago eta aukera gehiago izango dituen LH bat
Lanbide Heziketak bilakaera positiboa izan du Euskadin. Gaur egun 51.785 ikasle daude matrikulatuta D eta E graduetan, eta oraindik gehiago izango dira datozen asteetan, matrikulatzeko epea urriaren 16ra arte egongo baita zabalik. Aurreikuspenen arabera, azken zifra 55.000 pertsona ingurukoa izango da ikasturtean, A, B eta C graduetako ikasleak sartuko baitira.
Ikasturte honetan eskainitako 74.963 plazak aurrekoan baino 7.920 gehiago dira. Gehienak goi-mailako zikloetakoak dira, eta % 69 sare publikoan biltzen dira. Hazkundea hiru lurraldeetara hedatu da: 7.371 ikasle Araban, 23.982 Bizkaian eta 19.447 Gipuzkoan; hau da, aurreko ikasturtean baino % 3,6 gehiago.
Era berean, emakumeen presentziak gora egiten jarraitzen du. Gaur egun, ikasleen % 35,75 dira, eta 2025-2026 ikasturtean, berriz, % 35,22; hau da, ehuneko 0,5 puntuko igoera izan da. Erronka nagusietako bat haiek industria-zikloetan sartzea da. Horietan, emakumeen matrikula % 12,49tik % 12,85era igaro da.
Helburu horretan aurrera egiteko, ikasturte honetan, lehen aldiz, plazen % 50 erreserbatu da zikloetako sarrera-kuota guztietan emakumeentzat, eta neurri horri eutsiko zaio datozen ikasturteetan ere.
Hizkuntzaren arloan, eskaintzak aniztasun handiagoa ere badakar. D ereduko matrikulak % 7,62 egin du gora, eta ingelesa hizkuntza gehigarri gisa sartzen duten zikloek, berriz, % 14,9 igo dira. Gaur egun, 947 ikasle ditugu ziklo eleaniztunetan matrikulatuta.
Erdi-mailako zikloei dagokienez, lehen kurtsoko matrikulak % 3,55 egin du gora. Europak prestakuntzaren tarteko mailak sustatzearen aldeko apustua egiten du. Euskal LHko sistemak orientazio hori erdi-mailako zikloen eta 2. mailako lanbide-ziurtagirien bidez garatzen du. Azken horien matrikula ikasturtean zehar egingo da, 2026ko hirugarren hiruhilekoan hasiko baitira ematen.
Bi gradu bikoitz berri eta prestakuntza-ibilbide gehiago
2026-2027 ikasturtean, lehen aldiz, bi gradu bikoitz izango dira. Biek hiru ikasturteko iraupena izango dute eta bi titulazio hauek lortzeko aukera emango dute:
- Goiko mailan, Galdakao Ostalaritza LHIIk Sukaldaritza Zuzendaritzako eta Sukaldaritza Zerbitzuen Zuzendaritzako tituluak konbinatzen dituen ibilbidea eskaintzen du.
- Erdiko mailan, Iurreta LHIIk Instalazio Elektriko eta Automatikoak eta Telekomunikazio Instalazioak konbinatzen ditu.
Lanbide Heziketaren eta Unibertsitatearen arteko pasabideak ere finkatuko dira. Gaur egun, goi-mailako 75 ziklok eta espezializazioko 5 ikastarok kredituak errekonozitzen dituzte 59 unibertsitate-gradutan: errekonozitutako 6 eta 66 kreditu artean (egindako ikasketen eta hautatutako unibertsitate-graduaren arteko kidetasunaren arabera).
BirtLHren bidezko prestakuntza erdipresentziala (Ikaskuntza Birtual eta Digitalizatuen LHko Ikastetxe Integratua) 20 zikloraino zabaldu da. Hedapen horrek 379 ikasle gehiago izatea ekarri du, 2.132 ikaslera iritsi arte, hau da, % 21,62 gehiago daude aurreko ikasturteko aldibereko datuekin alderatuta.
Langile eta langabeentzako prestakuntza-eredu egiaztagarri berria
Ikastaroaren berrikuntza nagusietako bat da langileentzako prestakuntza-eredu egiaztagarri berria abian jartzea, batez ere langileei eta langabezian daudenei zuzenduta.
Ikastetxe publikoek kolektibo horrentzako eskaintza garatu eta indartu dute ikasturte honetan, eta, berritasun gisa, prestakuntza hori Hezkuntzak egiaztatu ahal izango du. Lanbide-ziurtagirien, C graduen (eta horien azpiprogramen) eta A eta B graduen bidez, parte-hartzaileek zatika eta pixkanaka egin ahal izango dute aurrera, beren interesen, premien eta inguruabar pertsonalen arabera.
Sistema berriak aukera ematen du A, B edo C gradu bat egiten dutenek LHko ikasleekin bat egiteko eta ibilbide espezifiko eta pertsonalizatu bat hasteko. Errekonozimenduak, ziurtagiriak eta bitarteko egiaztapenak lortzeaz gain, aurrera egin ahal izango dute Lanbide Heziketako titulu bat lortu arte.
Hedapena ikasturte honetan hasiko da, eta ikastetxe publikoek A, B eta C graduak eskainiko dituzte zuzenean. 2027-2028 ikasturtean, eskaintza hori itunpeko ikastetxeetan txertatzen jarraituko da, eta Hezkuntza Sailak baimendutako entitateen bidez, Lanbiderekin lankidetzan, egiaztatu ahal izango den prestakuntza osatuko da.
C graduen eskaintza, LHko ikastetxeen sarean, 6.340 plazakoa da ikasturte honetan (aurreko ikasturtean baino 4.520 gehiago), eta planifikatutako 185.956 prestakuntza-ordu aurreikusten ditu. Horrela, eredu berriak eskuragarri dauden aukerak zabaltzen ditu, eta bidea ematen du prestakuntza-ibilbidea pertsona bakoitzaren ezaugarrietara eta proiektura egokitzeko.
Beste berrikuntza bat da prestakuntza horretarako matrikula ikasturte osoan zehar egongo dela zabalik. Neurri horrek aukera ematen du laneratzea langileen beharretara egokitzeko, eta LHko ikasleen kopurua pixkanaka handitzea ekarriko du, aurreikusitako 55.000 pertsonara hurbildu arte.
Enpleguari eta sare produktiboari lotutako LH bat
Lanbide Heziketa euskal ekonomiaren zutabeetako bat da, sektoreek behar duten talentua prestatzeko duen ahalmenagatik. Ikasleen % 41,5 industria-esparruetan prestatzen da, % 56 zerbitzuetan eta % 2,5 nekazaritzaren, itsasoaren eta arrantzaren sektoreetan.
20.000 enpresak baino gehiagok modu egonkorrean kolaboratzen dute LHko euskal sistemarekin. Lan-munduarekiko lotura horrek, Prestakuntza Duala eta Tkgune bezalako berrikuntza aplikatuko programak bultzatzearekin batera, % 90 inguruko enplegagarritasuna lortzen laguntzen du.
Enpresekiko konexioak bidea ematen du ikastetxeetan lantzen diren profilak eta konpetentziak produkzio-sektoreen beharretara egokitzeko eta jarduera ekonomikoa eraldatzen ari diren aldaketa teknologikoei erantzuteko.
Ereduak, gainera, pertsona sortzaile, berritzaile eta ekintzaileak prestatu nahi ditu, proiektu propioak garatzeko eta Euskadiko produkzio-sarea indartzen laguntzeko gai izango direnak.
Erronkei aurrea hartzeko 2030 estrategia
Hezkuntza Sailak Euskadiko Lanbide Heziketako 2030 Estrategia hedatzen jarraitzen du. Ibilbide-orri bat da, eta bideratuta dago Herrialdeak dituen erronka nagusiei aurrea hartzera, hala nola jasangarritasunari, eraldaketa digitalari, zahartze demografikoari, lurralde-kohesioari eta gizarteratzeari.
Estrategia honen garapenak oinarri hartzen ditu, era berean, Euskal Hezkuntza Sistemaren Eraldaketa Digitalerako Plana (Adimen Digitala), baita Hasierako Prestakuntza Plana eta Bizialdi Osoko Ikaskuntza Plana ere. Plan hori ikasturte honetan argitaratzea aurreikusten da.
Berrikuntzaren aldeko apustua, berriz, honako hauen bidez egituratzen da: Tknika, berrikuntza aplikatuko zentro gisa; iTlent, metodologiaren bidez talentua garatzeko eragile gisa; eta EIEI, Lanbide Heziketako curriculuma garatzeko eta eguneratzeko erreferente gisa.
Egitura horren bidez 350 berrikuntza-proiektu baino gehiago garatzen dira, horietatik 87 Europakoak, eta gehienak enpresekin eta euskal industria-sarearekin lankidetzan. Ikasle eta irakasleen nazioarteko mugikortasuna ere bultzatzen da, eta ikastetxeetan ekintzailetza indartuko da, Lanbide Heziketatik bertatik abiatuta enpresa berriak sortzen laguntzeko. Joan den ikasturtean, mugarri bat lortu zen, 97 enpresa sortu baitziren.
Lanbide Heziketak ere zeregin garrantzitsua du ekitatearen eta gizarte-kohesioaren arloan. Ikasturte honetan 7.000 plaza baino gehiago eskainiko dira Hasierako Lanbide Heziketan zailtasun akademikoak dituzten ikasleentzat, oinarrizko graduen ibilbide arrunt, egokitu eta malguen eta ibilbide integratuen bidez. Horiek oinarrizko gradutik espezialitate bereko erdiko gradurako jarraitutasuna errazten dute.
Hasierako LH berriak aukerak zabaltzen ditu eta ikastetxeetako orientazio psikopedagogikoa eta profesionala indartzen du, ikasleen beharretara egokitutako erantzunak eskaintzeko helburuarekin.
