Ertzainek 22 urteko gazte bat atxilotu dute genero-indarkeriako ustezko delitu bat leporatuta, biktimarengandik aldentzeko kautela-neurria urratu eta Pasaiako etxebizitza batean behin baino gehiagotan eraso egin ondoren. Atzo Donostiako Emakumearen aurkako indarkeriaren arloko epaitegiaren eskuetan jarri zuten, eta epaileak atxilotua espetxeratzeko agindu zuen.
Errenteriako Ertzain-etxeko agenteek joan den igandean jakin zuten gizon batek bere bikotekide ohiarengandik aldentzeko agindu judiziala urratu zuela Pasaiako etxebizitza batean.
Polizia-atestatuan biktimak urraketa horretan jasan zituen eraso fisikoak eta mehatxu larriak jaso zituzten, eta Donostiako Unibertsitate Ospitalean osasun-arreta jaso behar izan zuen.
Indarkeria matxistaren kasu honen jarraipena egin duten ertzainek igandean bertan aurkitu eta atxilotu zuten Hernanin gertakari horien egilea. Atxilotua atzo, astelehena, jarri zuten Donostiako Emakumearen aurkako indarkeriaren arloko epaitegiaren eskuetan, eta epaileak atxilotua Martuteneko espetxean sartzeko agindu zuen.
