- Gaur arratsaldean, Aritz Uriarte Eusko Jaurlaritzako Gobernantza eta Iraunkortasun Sanitarioko sailburuordea Javier Padilla Bernáldez Estatuko Osasun idazkariarekin bilduko da, «konpentsazio-funtsak kalkulatzeko sistemaren inguruan aurrera pausoak emateko»
- Euskadiko likidazioetan gertatzen den bidegabekeria onartezina saihesteko, auditoria bat eskatuko da likidazioen koherentzia eta sendotasuna kontrastatzeko, eta Laguntza Bermatzeko Funtsaren (FOGA) arau-garapena eskatuko da, Kontuen Auzitegiak ezartzen duen bezala
- Dagokion araudia zorrotz aztertu arte, Eusko Jaurlaritzako Osasun Sailak proposatuko du indarrik gabe uztea 2023. eta 2024. urteetako likidazioak
Eusko Jaurlaritzako Osasun Sailak gardentasuna eskatuko dio Osasun Ministerioari Kohesio Funtsari (FSC) eta Berme Funtsari (FOGA) dagozkien likidazioetan, eta, gainera, likidazio horien datuak eta kalkulu-prozedura sakon aztertzeko neurriak hartzea proposatuko du.
Gaur arratsaldean, Aritz Uriarte Eusko Jaurlaritzako Gobernantzako eta Iraunkortasun Sanitarioko sailburuordea Javier Padilla Bernáldez Estatuko Osasun idazkariarekin bilduko da, «konpentsazio-funtsak kalkulatzeko sistemaren inguruan aurrera pausoak emateko», orain arte egindako likidazioetan legezko estaldurarik egon ez daitekeelakoan.
Alberto Martínez Eusko Jaurlaritzako Osasun sailburuak azpimarratu du Euskaditik egiten ari diren likidazioetan bidegabekeria onartezina gertatzen dela, Mónica Garcia ministroari joan den astean formalki jakinarazi zion bezala, «Euskadik, Estatuko biztanleriaren % 5ekin, guztizkoaren % 60 ordaindu baitu». Horregatik, Eusko Jaurlaritzako Osasun Sailak beharrezkotzat eta premiazkotzat jotzen du «esertzea, zifrak aztertzea, horien trazabilitatea ikustea eta kalkulu berri bat bideratzea».
Egoera hori zuzentzeko eta bidegabekeria horiek saihesteko, Aritz Uriarte Eusko Jaurlaritzako Gobernantza eta Iraunkortasun Sanitarioko sailburuordeak gaur arratsaldean Madrilgo Osasun Ministerioan egingo den bileran eskatuko du auditoria bat egin dadila likidazioen koherentzia eta sendotasuna egiaztatzeko, bai eta gainerako autonomia-erkidegoek erabilitako irizpideak egiaztatzeko ere; gainera, Asistentzia Bermatzeko Funtsaren (FOGA) arau-garapena eskatuko du, Kontuen Auzitegiaren txostenak ezartzen duen bezala. Hori horrela, Eusko Jaurlaritzako Osasun Sailak proposatuko du 2023. eta 2024. urteetako likidazioak indarrik gabe uztea, harik eta dagokion araudia zorrotz aztertu arte.
