María Jesús San José sailburuak eta Mikel Mancisidor ararteko izendatu berriak partekatutako lan-ildo nagusiak aztertu dituzte
María Jesús San José Justizia eta Giza Eskubideetako sailburua Mikel Mancisidor Ararteko izendatu berriarekin bildu da gaur, bi erakundeen arteko koordinazio teknikorako mekanismoak indartzeko eta herritarren eskubideen defentsan partekatutako lan-ildo nagusiak aztertzeko.
Bilera horretan Jose Maria Bastos Justizia zuzendariak eta Jose Luis Iparragirre Arartekoaren idazkari nagusiak ere parte hartu dute, eta duela hilabete eskas Mancisidorrek kargua hartu ondoren egin den lehena da.
Harreman arin eta eraikitzailea sendotzeko ez ezik, interes partekatuko hainbat gai errepasatu dituzte. Espetxeen arloan, besteak beste, gai hauek jorratu dira: Zubietan Gipuzkoako espetxea laster irekiko denez, preso dauden pertsonak lekuz aldatzea, eta Arabako espetxean plaza gehiago jartzea, etorkizunean lehen graduko modulua irekiko baita, Euskadin dauden pertsonak errotzea lehenetsiz.
Bilerak balio izan du, halaber, bisitetan eta ikuskapenetan izandako lankidetzaren balioa nabarmentzeko, Arartekoaren gomendioei kasu egiteko eta pertsona ahulenak — adingabeak, biktimak, desgaituak edo sistema penalaren mendekoak — babesteko konpromiso partekatua hartzeko, giza eskubideen ikuspegitik eta genero-ikuspegiarekin.
Bi aldeak bat etorri dira elkarrizketarako bide iraunkor bat mantentzean, hurbileko justizia bermatzaile batean eta zerbitzu publikoak etengabe hobetzera bideratutako justizia batean aurrera egiten jarraitzeko.
