Osasunbidea-Nafarroako Osasun Zerbitzuko (NSS-O) Profesionalen Zuzendaritzak 2025en Lan Giroari buruzko Inkestaren emaitza nagusiak aurkeztu ditu azken asteotan osasun-sistema publikoko zentro eta esparru guztietan. Inkesta hori iazko azarotik abendura bitartean egin zen, eta sistemako estamentu eta esparru guztietako 3.694 profesionalek parte hartu zuten, langile guztien %27,44k.
Inkestaren helburua da sistemako profesionalek laneko giroaren inguruan zer-nolako pertzepzioa duten jakitea, hobetu beharreko alderdiak identifikatu eta landu ahal izate aldera. Azken inkesta 2023an egin zen.
Arlo guztietako langileek pertzepzio hobea dute 2023ko inkestan azaldutakoarekin alderatuta, eta ondoen baloratu direnak garapen profesionala, gizonen eta emakumeen arteko aukera-berdintasuna eta laneko giroa izan dira. Bestalde, hobetu daitezkeen arloak, hurrenkera honetan, berrikuntza, prestakuntza eta ordainsariak dira.
23 arlotan multzokatutako 55 galderarekin osatu zen inkesta, 1etik 5era bitarteko erantzunak emateko aukerarekin, eta garapen profesionalarekin eta asebetetze-maila orokorrarekin loturiko gaiei buruzkoa zen, lantokiari eta Osasunbideari dagokienean. Neurtutako arlo bakar batean ere ez dira emandako puntuazioak 5etik 2,7ren azpitik geratu.
Osasunbideako gogobetetzeari dagokionean, oro har, 5etik 3,68koa izan da puntuazioa (2023an, 3,63koa izan zen). Lizarraldeko langileek, Osasun Mentalekoek eta Zerbitzu Zentraletakoek erakutsi dute gogobetetze-maila handiena, 3,4 baino handiagoa. Estamentuen arabera, asebetetze handieneko kategoriak osasun-laguntzaileak (4), zeladoreak (3,91) eta erizaintza (3,79) izan dira, eta txikienekoak, berriz, fakultatiboak (3,21). Aldi baterako langileak langile finkoak baino gusturago daude, eta, erantzukizun-karguren bat izatearen aldagaia kontuan hartzen bada, profesional horiek gusturako sentitzen dira.
Prestakuntza espezialisten emaitzei erreparatzen badiegu, asebetetze orokorra 3,43koa da. Ondoen baloratzen diren arloak gainerako kolektiboen berberak dira. Apur bat hobeto baloratzen direnak parte-hartzea, talde-lana, lidergoa, barne-komunikazioa, laneko giroa eta enplegurako sarbidea dira.
Asebetetzean gehien eragiten duten alderdiak
Gogobetetze profesionalean gehien eragiten duten alderdiak, hurrenkera honetan, lan-baldintzak, ordainsariak eta laneko giroa dira.
Ondoen baloratutako aldagaiei dagokienez, puntuazio handiena honako hauek izan dute: garapen profesionala; berdintasuna (gizonen eta emakumeen aukera-berdintasunari dagokionean); laneko giro ona -gogobetetze orokorrean eragin handiena duen faktoreetako bat-; lankideek eta erabiltzaileek egindako lana aitortzea; lidergoa, bereziki nagusi hurrenarena; eta lan-baldintzak, asebetetzean gehien eragiten duen faktorea.
Bestalde, langileek erakundeari eskatzen dizkioten hobekuntza-puntuak honako hauek dira: berrikuntza, eraginkortasuna eta efizientzia hobetzeko beharrezkoak diren aldaketei dagokienean; prestakuntza, gehien hobetu den dimentsioetako bat izan arren, prestakuntza-aukerak ez direla betetzen uste baita, eta hori ez da lana garatzeko egokitzat jotzen; ordainsaria, egiten den lanerako egokitzat hartzen ez delako, NOZ-Otik kanpoko antzeko lanpostuekin alderatuta; eta lanerako informazioa.
Eta hobetzeko proposamen gisa, langileek aipatu dute prestakuntzaren eta lanerako informazioa hobetzearen eta komunikazioaren inguruan garatutako ekintzekin jarraitu behar dela eta berrikuntzaren inguruko prestakuntza jasotzea beharrezkoa dela.
Balorazio hobea eta txarragoa duten galderak
Balorazio onena duten galderei dagokienean (hau da, elkarrizketa egindakoen %60 baino gehiagok 5etik 4 puntu edo gehiago eman ditu), honako hauen ingurukoak izan dira: arduradunaren tratua eta haren trebakuntza, laneko giroa, lankideen errekonozimendua eta lanarekiko eta NOZ-Orekiko gogobetetzea, nahiz gizonen eta emakumeen arteko berdintasuna eta ordutegi-erregistroa ezartzearen egokitasuna.
Okerren baloratutako galderen artean (%30 baino gutxiagok 4 edo gehiago erantzun du), hobekuntzarako eta zerbitzu hobea emateko egindako aldaketak eta beste unitate batzuetako gaiei buruzko informazioa (lanari eragin badiezaioke) ageri dira, eta bat datoz 2023ko inkestan okerren baloratutakoekin.
Profesionalen Zuzendaritzak datuak aurkezteko hainbat bilera egin ditu Zerbitzu Zentraletan, Nafarroako Ospitale Unibertsitarioan, Tuterako Sofia Erregina Ospitalean, Lizarrako Garcia Orcoyen Ospitalean, Osasun Mentalean eta Lehen Mailako Arretan. Gainera, arlo ezberdinetako arduradunei jakinarazi zaizkie emaitzak eta hobetzeko ildoei buruzko informazioa eta proposamenak, balorazio txikieneko alderdiei dagokienean, horiek lantzen hastearren.
