- Akordioari esker, Enkarterrin eredu berritzaile bat ezarri ahal izango da, 16 eta 34 urte bitarteko gazteei emantzipazio-prozesuetan laguntzeko, lurraldean duten sustraitzea indartzeko eta Euskadiren erronka demografikoari ematen zaion erantzunean aurrera egiteko
Gobernu Kontseiluak Eusko Jaurlaritzaren eta Enkarterriko Mankomunitatearen arteko lankidetza-hitzarmena onartu du gaur, eskualdean gazteen emantzipaziorako proiektu pilotu integral bat abian jartzeko. Ekimen honen bidez, bi erakundeek erantzun praktikoa eman nahi diote Euskadiren erronka handietako bati: erronka demografikoari.
Proiektua funtsezko ideia batekin sortu zen: landa-ingurunean etorkizuna izateko, gazteentzako benetako aukerak egon behar dira. Geratzeko, itzultzeko eta hemen bere bizi-proiektua garatzeko aukerak. Helburu horretan, gazteen emantzipazioa ez da soilik gazte-politika bat; lurralde-orekari eusteko, landa-eskualdeak indartzeko eta biztanleriaren zahartzeari aurre egiteko funtsezko tresna ere bada.
Hitzarmenak aukera emango du eskualdean bizi, ikasi edo lan egiten duten edo egin nahi duten 16-34 urteko gazteei laguntzeko eredu integral bat hedatzeko Enkarterrin. Ekimenak gazteen bizi-ibilbideei laguntzeko aurrez aurreko zerbitzu bat abian jartzea aurreikusten du, Eusko Jaurlaritzaren GAZ zerbitzuarekin konektatuta, informazioa, orientazioa, aholkularitza, bitartekaritza eta laguntza pertsonalizatua eskaintzeko hainbat arlotan, hala nola etxebizitzan, enpleguan, prestakuntzan, mugikortasunean edo gizarte-baliabideetan.
Zerbitzu horrekin batera, proiektuak Enkarterri Gaztea 2025-2028 Eskualdeko Gazteria Planaren hedapena jasotzen du. Plan honek 27 neurri biltzen ditu, hiru ardatzetan antolatuta: gazte emantzipatuak, gazte aktiboak eta gazte parte-hartzaile eta konprometituak. Asmoa da baliabide horiek guztiek modu konektatuan funtzionatzea, begirada integralarekin eta gazteen zuzeneko parte-hartzearekin.
Jarduketak 873.000 euroko inbertsioa izango du 2026tik 2028ra bitartean. Zenbateko horretatik, Enkarterriko Mankomunitateak 567.000 euro jarriko ditu (guztizkoaren % 64,95), eta Eusko Jaurlaritzak gainerako 306.000 euroak ( % 35,05).
Eskualde mailan duen eraginaz gain, esperientzia Euskadiko beste udalerri eta eskualde batzuetarako ere baliagarria izatea nahi du Eusko Jaurlaritzak. Hitzarmenak Enkarterriri ematen dio gazte-politika publikoetan berritzeko laborategiaren eginkizuna, ebaluatu, sistematizatu eta mailakatuko den eredu batekin, Gazteen Emantzipaziorako Euskal Sarea eraikitzeko bidea irekitzeko.
Ekimena Gazteen 2/2022 Legearen eta Eusko Jaurlaritzaren konpromisoaren barruan kokatzen da, hots, udal eta aldundiekin lankidetzan, gazteei emantzipatzeko informazioa, orientazioa eta laguntza pertsonalizatua emango dieten baliabideak abian jartzeko konpromisoa.
Akordio honekin, Eusko Jaurlaritzak eta Enkarterriko Mankomunitateak azpimarratu dute erronka demografikoaz hitz egitea gazteriaz hitz egitea dela. Eta honako hau azpimarratzen du: «gazteez hitz egitea landa-eremuan bizi nahi duenak etxebizitza, enplegua, ongizatea, parte-hartzea eta komunitatea lortzeko benetako baldintzetan bizi ahal izatea bermatzea da». Gogoratu behar da gazteak lurraldean errotzea Euskadiren etorkizuna beren herri eta eskualdeetatik eraikitzea dela.
