- Gobernu Kontseiluak 2026ko ISV Sustapena deialdiaren aldaketa onartu du, upategietara zuzendutako Europako laguntzaren intentsitatea %50etik %60ra handitzeko
- Neurriak euskal ardogintza sektorearen nazioartekotzeari emandako laguntza publikoa indartzen du eta upeltegiek beraiek helarazitako eskaerari erantzuten dio
Gobernu Kontseiluak 2026ari dagokion beste herrialdeetan Sustapen eta Komunikaziorako laguntzen deialdiaren aldaketa onartu du, Mahastizaintza eta Ardogintzako Sektore Interbentzioaren (ISV Sustapena) programaren barruan, Europako finantzaketa-portzentajea egokitzeko helburuarekin, duela gutxi Nekazaritza eta Landa Garapeneko Sektore Konferentzian adostu zenaren ildotik.
Aldaketak Europar Batasuneko laguntzaren gehieneko intentsitatea %50etik %60ra igotzea ahalbidetuko du, nazioarteko merkatuetan ardogintzaren sustapen eta komunikazio-ekintzetarako, eta, horrela, euskal upeltegiek beren nazioartekotze-estrategietan, merkataritza-posizionamenduan eta merkatu berrien irekitzean duten laguntza publikoa indartu egingo da.
Aldaketa horren ondorioz, laguntza hauetara bideratutako guztizko zenbatekoa 8.500.000 eurotik 9.844.560,88 eurora igoko da, sektoreari ematen zaion laguntza instituzionalaren gaitasuna handituz, nazioarteko lehia gero eta handiagoa den eta upeltegi askok aurre egin beharreko merkataritza-zailtasunak dituen testuinguru batean.
Finantzaketa-intentsitatearen igoera 2026ko martxoaren 27an egindako Nekazaritza eta Landa Garapeneko Sektore Konferentziaren saioan adostu zen, ardogintza sektoreak berak egindako eskaerari erantzunez, kanpo-sustapenerako gaitasuna indartzeko eta merkatuetako lehiakortasuna hobetzeko helburuarekin.
Aldaketa honekin, Eusko Jaurlaritzak euskal upeltegien nazioarteko presentzia erraztera, Euskadiko ardoen kanpo-komertzializazioa bultzatzera eta agroelikadura sektorera bideratutako Europako baliabideen aprobetxamendua handitzera bideratutako laguntza-ildo bat indartzen du.
Neurriak upeltegiek hirugarren herrialdeetan garatzen dituzten sustapen-ekintzen estaldura publikoa zabaltzea ahalbidetuko du, eta, horrela, jarduera ekonomikoa, enplegua, balio erantsia eta Euskadin lurralde-sustraipena sortzeko gaitasun handia duen sektore estrategiko bat indartu egingo da.
