- Lehendakariordeak eta Ekonomia, Lan eta Enplegu sailburuak bidaia instituzional bati ekin dio Bruselan, maila goreneko topaketak eginez hainbat ordezkarirekin, Euskadiko ekimen estrategikoak aurkezteko
Mikel Torres Lehendakariordea eta Ekonomia, Lan eta Enplegu sailburua Teresa Ribera Europako Batzordeko Trantsizio Garbi, Justu eta Lehiakorrerako presidenteorde exekutiboarekin bildu da astearte honetan Bruselan. Bilera horrekin, Torresek agenda instituzional bati ekin dio, Ekonomia, Lan eta Enplegu Sailak Europako erakundeekin enpleguarekin, trebakuntzarekin eta eraldaketa ekonomikoarekin lotutako gai estrategikoetan duen elkarrizketa indartzeko.
Torresek eta Riberak trantsizio ekologikoaren erronka nagusiei heldu diete Europako eta eskualdeko ikuspegitik. Ildo horretan, gizarte kohesioa bermatuko duen trantsizio garbi, justu eta lehiakor baterantz aurrera egiteko moduari buruzko planteamenduak trukatu dituzte, eskualdeek Europar Batasunaren klima helburuak lortzeko duten funtsezko zeregina azpimarratuz.
Bilera horri esker, halaber, industria lehiakortasunarekin, produktibitatearekin eta politika ekonomikoarekin lotutako gaietan sakondu ahal izan da trantsizio berdearen testuinguruan, eta produkzio ehuna eraldatzen laguntzeko beharrezko tresnak aztertu dira, lehiarako gaitasuna galdu gabe.
Kalitatezko enpleguaren sorrera eta deskarbonizazioaren ondorioz lan merkatuan izango diren aldaketak aurreratzeko beharra lantzeko balio izan du topaketak. Arlo horretan, esperientziak eta proposamenak partekatu ditu Lehendakariordeak trantsizio ekologikoak lan aukera duinak eta iraunkorrak sor ditzan bermatzeko. Halaber, gaur arratsaldean, Lehendakariordeak beste bilera bat izango du Europako Parlamentuan Jonás Fernández S&D Taldeko Ekonomia koordinatzailearekin.
Zainlab, eredu berritzaile eta eskalagarria enpleguan eta trebakuntzan
Asteazken honetan, Mikel Torresek ZainLab Trebetasunen Eskualde Aliantza aurkeztuko du Europako Parlamentuan. Ekonomia, Lan eta Enplegu Sailaren ekimena da, zaintzako enpleguaren profesionalizazioa, prestakuntza eta garapena sustatzeko, eta ehunka pertsonari esplotazio, prekarietate eta bakardade egoeretatik irteteko aukera eman die. Sailak Zainketen eta Bizitza Luzearen Ekonomiako enpleguan eta trebakuntzan eredu berritzaile eta eskalagarri hau aurkeztuko du.
Era berean, Mario Nava Europako Batzordeko Enplegu, Gizarte Gai eta Inklusioko zuzendari nagusiarekin bilduko da, eta enpleguari eta gizarte kohesioari buruzko erkidego politikak aztertuko ditu.
Halaber, María Teresa Fabregas Fernández Task Force RECOVEReko arduradunarekin bilera egingo du Torresek, Berreskuratze eta Erresilientzia Mekanismoaren ezarpena eta horrek Euskadin duen eragina aztertzeko, bai eta Christian Zingiersen Europako Inbertsio Bankuaren ordezkari iraunkorrarekin ere.
Bidaia instituzionala ekainaren 4an, osteguna, osatuko da Espainiak Europar Batasunean duen enbaxadore Marcos Alonsorekin, Europako Batzordeko Pertsonen, Trebetasunen eta Prestakuntzaren Presidenteordetza Exekutiboko kabineteburu Sonia Vilarekin eta Europako Ekonomia eta Gizarte Batzordeko Langileen Taldeko presidenteorde Mari Carmen Barrerarekin.
Aldi berean, Elena Pérez Barredo Lan eta Gizarte Segurantzako sailburuordea, Alfonso Gurpegui Enplegu eta Inklusio sailburuordea eta Sara Buesa Inklusio zuzendaria Espainiak EBn duen Ordezkaritza Iraunkorreko Enplegu eta Gizarte Segurantzako sailburuekin bilduko dira.
