- Hiru terminaletan egiten diren lanetan instalazio elektrikoak, aireztapena, seinalizazioa eta komunikazioak lantzen ari dira orain
Eusko Jaurlaritzako Mugikortasun Jasangarriaren Sailaren Euskal Trenbide Sarea entitate publikoak amaitu egin du Kontxako geltokiko obra zibila. Geltoki hori izango da Topoaren pasabidea, Amarako eta Bentaberrikoarekin batera, osatuko duen azkena. Aurrerapauso honen bidez, topoaren Donostiako lurpeko pasabide berriaren obra zibila amaitu da. Hortaz, trenen zirkulazioa arautzen dituzten instalazio elektrikoak, aireztapenak, seinalizazioak eta komunikazioak, eta zenbait urbanizazio eta sarbide kudeatzen arituko da Euskal Trenbide Sarea datozen hilabeteetan.
Susana García Chueca Mugikortasun Jasangarriaren sailburuak tren-azpiegitura bisitatu du gaur goizean, Miguel Angel Páez Azpiegituretako sailburuordearekin eta Antonio López ETSko zuzendari nagusiarekin batera. Geltokian sartu aurretik, joan den astean Loiola eta San Martin kaleetan martxan jarritako urbanizazio-lanak bisitatu dituzte. Ondoren, Loiolako sarbidetik lur azpira sartu eta atartera jaitsi dira. Bertatik, terminalaren panoramika eta hainbat gremio elkarrekin lanean ikusi dituzte.
Baldosa osorik duen nasan zehar, egiaztatu dute beste nasa osatzeko gutxi falta dela, eta geltokiaren altzairu beiraztatuzko estaldura ikusi dute. Alderdi teknikoa amaituta, orain instalazio elektrikoak, aireztapenak eta seinaleak muntatzen ari dira. Geltoki horretan, Loiolako kanoia ia amaituta dagoen bitartean, Xabier Zubirirenean eskailera mekanikoak eta altzairu beiraztatuzko estaldura muntatzen ari dira.
Amarako geltokian, obra zibila eta Autonomiako kanoia bukatuta, Errondoko kanoitik behin-behineko larrialdietako irteera egiten hasiko dira. Terminal horretan dagoeneko muntatuta daude ekipamendu elektriko nagusiak, argiztapen-sistemak eta suteen aurkako babes-sistemak, eta luminariak.
Bentaberriko geltokian, obra zibila duela hiru urte amaitu zen, eta instalazioak, igogailuak eta eskailera mekanikoak ere amaituta daude, akaberak baina ez dira falta. Argiztapen-sistema eta suteen aurkako babes-sistemak bukatuta daude tunelean, terminalean bertan eta larrialdietako irteeretan. Katenariaren euskarri guztiak ere muntatuta daude. Aireztapen-ekipoak instalatzeke daude nasaren azpian eta larrialdietakoak, baina materiala bertan dago jada.
“Obrak amaitzear dauden honetan, nabarmendu nahi dut Donostiako lurpeko pasabideak, haren 4,2 kilometro eta hiru geltoki berrien bidez, aukera emango duela Gipuzkoako hiriburua beste era batera lotzeko. Horrez gain, metroa maizago pasa ahal izango da: astegunetan zazpi minutu eta erdiko maiztasunak izango ditu Añorga eta Pasaia artean, Amarako geltokian trenen errebote-puntua kendu delako”, adierazi du sailburuak.
“Topo berria etorkizuneko Gipuzkoaren sinboloa da: datozen 100 urteetara begira diseinatutako obra eta zerbitzua da, eta garraio publiko jasangarriaren bidez konektatutako Gipuzkoako mugikortasuna aldatuko du. Non bizi ez da hain erabakigarria izango, trena erabiltzeko aukera gehiago eta hobeak egongo direlako —azpimarratu du— eta, beraz, orain arte urrun zeuden aukeretara hurbiltzeko aukera gehiago eta hobeak. Obrak herritarren ohiturak aldatuko ditu. Alde batetik, autoa garajean utz dezaten, eta, bestetik, baita oinezkoentzat ere, metro karratu asko irabazi baitituzte Topoa lurperatzeari esker hainbat kale oinezkoentzat bihurtuta”.
“Une egokia da hau ETSren profesionaltasuna eta lana aldarrikatzeko. Izan ere, entitate publiko horrek, oztopo geologikoak izan arren, hiri osoak eta lurralde historiko osoak gozatuko duen azpiegitura eraikitzeko irtenbideak aurkitu ditu”, adierazi du García Chuecak, eta “Eusko Jaurlaritzak oso-osorik, bestelako laguntzarik gabe, egindako apustu iraunkorra eta ahalegin handia (teknikoa zein inbertitzailea)” nabarmendu ditu.
