- Eusko Jaurlaritzako Zientzia, Unibertsitate eta Berrikuntzako sailburuak planaren eguneraketa aurkeztu du Eusko Legebiltzarrean
- Estrategiak Euskal Ikerketa eta Berrikuntza Gunea sendotzen du, Komunitatea zutabe berria txertatzen du eta Berrikuntzaren Itsasargiak abian jartzen ditu
Eusko Jaurlaritzako Zientzia, Unibertsitate eta Berrikuntzako sailburu Juan Ignacio Pérez Iglesiasek gaur aurkeztu du Eusko Legebiltzarrean Euskadi 2030 Zientzia, Teknologia eta Berrikuntza Planaren (Euskadi 2030 ZTBP) eguneraketa. Euskal zientzia eta berrikuntza estrategiaren berrikuspena da, datozen urteetako erronka ekonomiko, teknologiko eta sozialei erantzuteko.
Eguneraketak ardatza argia du: zientzia, teknologia eta berrikuntza herritarren ongizatearen zerbitzura jartzea, eraldaketa digital, energetiko eta demografikoek markatutako testuinguru batean. Helburu horrekin, planak jakintza-arlo guztietan ezagutza aurreratua sortzea sustatzen du, eta lehentasuna ematen die oparotasun ekonomikoa indartzeari, pertsonen osasuna hobetzeari eta komunitate-sentimendua nahiz gizarte-kohesioa sendotzeari.
Zientzia, Unibertsitate eta Berrikuntza Batzordean egindako agerraldian, Pérez Iglesiasek azpimarratu du Euskadik gaitasun zientifiko, teknologiko eta industrial sendoak dituela, eta gaitasun horiek aukera berriak sortzeko, herritarren bizi-kalitatea hobetzeko eta euskal gizartearen erresilientzia indartzeko motor bihurtu behar direla.
Eguneraketa honen berritasun nagusietako bat Berrikuntzaren Itsasargiak abian jartzea da. Ekimen horien helburua da eraldaketa-proiektuak bizkortzea eta zientziaren, teknologikoaren, enpresen eta gizartearen arteko lankidetza sustatzea. Itsasargi horiek arlo estrategikoetan jardungo dute, hala nola digitalizazioan, deskarbonizazioan, osasun pertsonalizatuan, erronka demografikoetan eta elikadura osasungarri eta jasangarrian.
Ekonomiaren arloan, Euskadi 2030 ZTBPren eguneraketak berretsi egiten du Eusko Jaurlaritzak ikerketarekin eta berrikuntzarekin duen konpromisoa, lehiakortasunaren eragile nagusi gisa. Horretarako, 2026 eta 2030 bitartean I+G+b arloko inbertsioa handitzeko helburuari eusten dio. Horri esker, energia, mugikortasun jasangarria, fabrikazio aurreratua eta bio-osasunaren arloa bezalako sektore estrategikoen aldeko apustua sendotuko da.
Aldi berean, estrategiak indartu egiten du adimen artifiziala, konputazio kuantikoa eta zibersegurtasuna bezalako teknologia emergenteen garapena, Euskadiren etorkizuneko lehiakortasunerako giltzarri izango direlako.
Osasunak ere toki nabarmena hartzen du estrategia berrian. Planak ikerketa eta berrikuntza indartzea proposatzen du, besteak beste, medikuntza pertsonalizatuan eta doitasunezko medikuntzan, prebentzioa eta tratamenduak hobetzeko datuen erabilera aurreratuan eta terapia berritzaileen garapenean.
Halaber, One Health ikuspegia txertatzen du, giza osasuna, animalien osasuna eta ingurumenaren osasuna modu integratuan lantzen dituena. Ikuspegi horrek gero eta konplexuagoak diren erronkei erantzuten lagunduko du, hala nola mikrobioen aurkako erresistentziari, elikagaien segurtasunari eta klima-aldaketak osasunean dituen ondorioei.
Eguneraketaren berrikuntza nagusietako bat IV. Zutabe berria da: Komunitatea. Dimentsio horrek berrikuntza-politiken ikuspegia zabaltzen du, komunitate-sentimendua eta gizarte-kohesioa ongizatearen funtsezko osagai gisa txertatuz. Helburuen artean daude ongizate emozionala, zahartze osasungarri, gizarteratzea eta erronka demografikoekin lotutako ekimenak sustatzea, baita parte-hartzea, konfiantza eta bizikidetza bezalako balioak indartzea ere. Testuinguru horretan, estrategiak euskararen eta euskal kulturaren balioa ere aitortzen du, ezagutza, sormena eta berrikuntza sustatzen laguntzen duten aktibo gisa.
Eguneraketa honen bidez, Euskadik zientziaren, teknologiaren eta berrikuntzaren ikuspegi bat sendotzen du, hazkunde ekonomikoa sustatzeaz gain, osasuna eta bizi-kalitatea hobetzea, gizarte-kohesioa indartzea eta herrialdeak etorkizuneko erronkei arrakastaz aurre egiteko duen gaitasuna handitzea helburu dituena.
