- Euskal Enpresarien Konfederazioak aurkeztutako programak atzerritartasunaren arloko aholkularitza juridikoa eta kontrataziorako tresna praktikoak eskainiko dizkie EAEko ETEei, bai eta enplegu eskaintzaren eta eskariaren arteko lotura mekanismoak sustatzea ere
Gobernu Kontseiluak, Mikel Torres Lehendakariordeak eta Ekonomia, Lan eta Enplegu sailburuak proposatuta, onartu du astearte honetan Confebaski 50.028 euroko dirulaguntza zuzena ematea, euskal enpresetan migratzaileak laneratzen laguntzeko programa bat burutzeko.
Euskal Enpresarien Konfederazioak aurkeztutako programaren helburua da enpresei, batez ere, txikiei eta ertainei, atzerritartasunaren arloko arau esparruaren ezagutza argia eta eguneratua ematea, bai eta migratzaileak kontratatzeko aholkularitza tekniko eta juridiko indibidualizatua ematea ere.
Gainera, proiektu horrek aurreikusten du material eta tresna praktikoak eskuragarri jartzea, enplegu eskaintzaren eta enplegu eskariaren arteko lotura mekanismoak bultzatzea eta arlo horretako etorkizuneko politika publikoak hobetzeko aukera emango duten oztopoak eta jardunbide egokiak identifikatzea.
Ekonomia, Lan eta Enplegu Sailak dirulaguntza hori zuzenean ematea erabaki du, salbuespen gisa. Izan ere, uste du proiektua unean unekoa eta berezia dela, eta egungo ezohiko erregularizazio prozesuari eta Euskal Autonomia Erkidegoan modu irregularrean dauden pertsonei lan egiteko baimenari lotuta dagoela. Egoera hori ezin da sartu Mikel Torresek zuzendutako sailak kudeatzen dituen deialdi orokorretan.
Dirulaguntza ematen denetik 2026ko abenduaren 31ra arte luzatuko da programa gauzatzeko epea.
Belaunaldien arteko erreleboa
Zeharkako ardatz giltzarria da belaunaldien arteko erreleboa 2030erako Enpleguaren Euskal Estrategian eta 2030erako Erronka Demografikorako Estrategian. Eurostaten datuen arabera, 2025eko urtarrilaren 1ean Europar Batasunean adinekoen mendekotasun tasa % 34,5era iritsiko da, eta horrek adierazten du gero eta presio handiagoa dagoela lan egiteko adinean dagoen biztanlerian eta horrek zuzenean eragiten duela eskulanaren eskuragarritasunean. Ildo horretan, ELGA, Cedefop eta EURES erakundeek ohartarazi dute Europan egiturazko eskulan eskasia ez dela soilik lanerako prest dauden pertsonen faltagatik gertatzen, baita enplegu eskaintzaren eta -eskariaren arteko doikuntza arazoengatik ere.
Orkestra – Lehiakortasunerako Euskal Institutuak egindako 2024ko Euskal Autonomia Erkidegoko Lehiakortasun Txostenaren arabera, belaunaldien arteko erreleboa eta talentuen eskuragarritasuna dira Euskadiren etorkizuneko lehiakortasunerako erronka nagusietako bat. Azterlanaren arabera, jatorri atzerritarreko pertsonak EAEko biztanleriaren % 12 dira dagoeneko, baina oraindik ere okupazio tasa txikiagoak eta enplegua lortzeko zailtasun handiagoak dituzte, prestakuntzara eta esperientziara egokituta.
Euskal enpresen sektore nagusia ordezkatzen duen empresa elkartea da Confebask, sektorez gaindikoa eta Euskal Autonomia Erkidego osoan jarduten duena.
