Gaurko Gobernu Kontseiluan onartu da 2026-2027 ikasturteko unibertsitate-ikasketetarako eta goi-mailako beste ikasketa batzuetarako beka-deialdia. 28,56 milioi euroko aurrekontua duen deialdi berriak beste urrats bat eman du aukera-berdintasuna indartzeko, errenta-atalase osagarri berri bat gehituta. Neurri horri esker, laguntzak ikasle gehiagorengana iritsiko dira, eta beste 1.500 ikasle inguruk izango dute onura, hau da, aurreko ikasturtearekin alderatuta %16 inguruko igoera.
Juan Ignacio Pérez Iglesias Zientzia, Unibertsitate eta Berrikuntzako sailburuak azpimarratu duenez, “deialdi honek helburu argi bati erantzuten dio: ikasle bakar batek ere ez dezala goi-mailako hezkuntzarako sarbidea galdu arrazoi ekonomikoengatik. Beka-sistema zabaltzen ari gara familien errealitatera hobeto egokitzeko eta erantzun bidezkoago eta malguago bat eskaintzeko”.
Deialdiaren berrikuntza nagusia errenta-atalase osagarri berri baten sorrera da; atalase hori egungo 3. atalasea baino %10 gorago kokatuko da. Horri esker, orain arte ezarritako mugak apur bat gainditu arren, goi-mailako ikasketen kostuari aurre egiteko zailtasunak dituzten familiek ere laguntzak eskuratu ahal izango dituzte.
5,8 milioi euro osasun-arloko ikerketa- eta garapen-proiektuetarako
Gobernu Kontseiluak onartu egin du osasunaren arloko ikerketa- eta garapen-proiektuetarako laguntzen 2026ko deialdia, 5,8 milioi euroko aurrekontua duena. Hala, abian jarri da osasun-laguntza eta bizi-kalitatea hobetzen duten proiektuetarako laguntzen deialdi hau.
Aurreko deialdietan osasun-arloko ikerketa-jarduera sustatzeko, areagotzeko eta indartzeko finantzatutako 3 laguntza-lerroez gain, aurten beste ildo bati heldu zaio Osasun Sistemen Eraldaketarekin eta Osasun Publikoarekin lotutako I+G+B proiektuak finantzatzeko. Zehazki, lau laguntza-lerro bereizten dira: Osasun-arloko ikerketa-jarduera sustatzea, Osasun-arloko ikerketa-jarduera areagotzea, Osasuneko ikerketa estrategikoa sustatzea, eta Ikerketa komisionatuko lanak.
1.033.000 euro familien elkarteen eta beste hezkuntza-erakunde batzuen jarduera laguntzeko
Gobernu Kontseiluak onartu du Helduen Hezkuntzako ikastetxe publikoetako ikasleen elkarteentzat, familien federazio eta konfederazioentzat eta hezkuntza-kooperatibentzat zuzendutako laguntzen deialdia. Deialdiak 1.033.000 euroko aurrekontua izango du.
Familien elkarteek, federazioek eta gainerako erakunde onuradunek ikastetxeen hezkuntza-lana osatzen duten jarduerak garatzen dituzte, eta hezkuntza-komunitatearen parte-hartzea sustatzen dute. Deialdi honen bidez, ekimen horiek babestu nahi dira, eta ikastetxeen hezkuntza-jarduerarekin duten lotura indartu.
Diruz lagunduko diren jarduerek ikastetxe bakoitzaren hezkuntza-proiektuarekin bat etorri beharko dute, eta hezkuntzaren lehentasunen artean dauden helburuak bultzatzen lagundu, hala nola bizikidetza positiboa, ikasleen ongizate emozionala, inklusioa, hezkidetza, euskararen erabilera kirol- eta aisialdi-jardueretan eta gaitasun digitalaren hobekuntza.
Erakunde interesdunek hilabeteko epea izango dute eskabideak aurkezteko, deialdia Euskal Herriko Agintaritzaren Aldizkarian argitaratu eta hurrengo egunetik aurrera. Izapidetzea bide elektronikoz egin beharko da, Eusko Jaurlaritzaren egoitza elektronikoaren bidez, dagokion prozeduraren fitxan.
Enoways, Euskadiko Enoturismoaren Nazioarteko Biltzarra 2026
Gobernu Kontseiluak Arabako Merkataritza, Industria eta Zerbitzuetako Ganbera Ofizialari zuzeneko dirulaguntza ematea onartu du, Enoways 2026 Euskadiko Enoturismoaren Nazioarteko I. Kongresua garatzeko, kongresu hori antolatzeko eta gauzatzeko lankidetza-hitzarmen eta guzti.
Dirulaguntza 266.200 €-koa da, eta kongresu hori antolatu eta gauzatzeko erabiliko da. Bertan, jardunaldi instituzionalak egingo dira Gasteizen, eta Arabako Errioxako, Bizkaiko eta Gipuzkoako upategiak eta bestelako esperientziak bisitatuko dira.
858.333 euro Bilboko Arte Ederren Museoa fundazioari
Gobernu Kontseiluak gaurko bileran onartu du Arte Ederren Bilboko Museoa fundazioari 858.333 euroko dirulaguntza zuzena ematea, 2026 urteko inbertsioen aurrekontua finantzatzeko.
Arte Ederren Bilboko Fundazioaren Patronatuak 2025eko abenduan aurkeztutako Jarduketa Planaren arabera, 2026ean egin beharreko inbertsioen kostua, guztira, 2.575.000 eurokoa da: ekipamendurako, 1.275.000,00 euro; funts artistikorako, 900.000,00 euro; eta Arteder, euskal artearen datu baserako, 400.000,00 euro.
Aurrekontu hori, Patronatuko kide diren hiru erakunde publikoen artean estali behar da: Eusko Jaurlaritza, Bizkaiko Foru Aldundia eta Bilboko Udala. Hala, erakunde bakoitzak 858.333 euroko dirulaguntza emango dio 2026ean Arte Ederren Bilboko fundazioari.
Eusko Jaurlaritzak, Patronatuko erakunde bezala, konpromisoa du beharrezko egitura -bai giza-baliabideena, bai baliabide tekniko eta finantzarioena- eta etorkizunean fundazioaren funtzionamenduari eta inbertsioei dagozkien gastuak finantzatzeko.
300.000 euro goi-mailako kirol-lehiaketak antolatzeko
Eusko Jaurlaritzak Euskadiko goi-mailako kirol lehiaketen antolaketa diruz laguntzen du eta, horretarako, 300.000 euroko dirulaguntza bideratuko du.
Gaur onartu du Gobernu Kontseiluak deialdia eta, bertan jasotzen denaren arabera, goi-mailako kirol lehiaketatzat joko dira nazioarteko eremua eta izaera duten lehiaketak. Bestalde, deialdi honetatik kanpo geratuko dira kirol-erakusketa edo ikuskizunak eta nazioarteko eremu eta izaera ez dutenak. Dirulaguntza eskatzeko epea hilabetekoa izango da deialdia Euskal Herriko Agintaritzaren Aldizkarian argitaratu eta hurrengo egunetik aurrera.
Gazteen arteko mugikortasun edo trukerako jarduerak garatzeko laguntzak
Gobernu Kontseiluak gazteen mugikortasunerako edo trukerako jarduerak 2026an garatzeko dirulaguntzen oinarriak eta deialdia onartu ditu. 2026an 175.000 euroko partida bat bideratuko du horrelako jardueretara, iaz baino 30.000 euro gehiago. Onartutako aurrekontuan diruz lagundu daitekeen gastuaren % 80ra iritsi ahal izango dira dirulaguntzak, eta Euskal Autonomia Erkidegoan egoitza duten irabazi-asmorik gabeko pertsona juridiko publiko edo pribatuak izan daitezke dirulaguntzen onuradun.
Gazteen mugikortasunerako edo trukerako jarduerek dirulaguntza jaso ahal izango dute, baldin eta honako baldintza hauek betetzen badituzte: 12 eta 30 urte bitarteko gazteak xede dituzten jarduerak; Interes komuneko gaiak eta parte-hartzaileen taldearentzat garrantzitsuak direnak; Ikaskuntza ez-formaleko metodoak aplikatzea; Proiektuan parte hartzen dutenen inplikazio aktiboa; Parte-hartzaileen gizarte- eta kultura-garapena sustatzea; Kulturarteko dimentsioa; Europa eta nazioartea; Gutxi gorabehera 6 egunetik 21 egunera bitarteko iraupena izango du; eta Talde bakoitzean gutxienez 6 parte-hartzaile egongo dira, eta gehienez 15.
Salgaien eta bidaiarien garraio publikoan teknologia berriak eta segurtasunekoak ezartzeko laguntzak
Gobernu Kontseiluak Euskadiko salgaien eta pertsonen errepideko garraio publikoan teknologia berriak eta segurtasun-sistemak eskuratu eta ezartzeko laguntza-programa bat deitzea eta arautzea onartu du. Laguntza hauek 2005ean hasitako programa batekoak dira, eta datozen bi hilabeteetan eskatu ahal izango dira. Laguntza horiek 10.000 eurora mugatzen dira diruz lagundu daitekeen jarduera mota bakoitzeko, eta 110.000 euroko aurrekontua dute.
Programaren helburua da flotak kudeatzeko, lokalizatzeko eta kontrolatzeko sistemak ezartzea, bai eta salgaien eta bidaiarien garraio publikorako ibilgailuetan segurtasun-elementuak ezartzea ere, besteak beste, kamioientzako artazi-efektuaren aurkako sistemak, suteak detektatzeko eta autoitzaltzeko sistemak, eta radarren eta sentsoreen bidez talkak prebenitzeko aukera ematen duten teknologiak. Era berean, gidaritza eraginkorra optimizatzeko eta erregai-kontsumoa murrizteko sistemak diruz lagunduko dira, besteak beste, gurutzaldi-abiaduraren kontrolatzaileak.
Migratzaileak euskal enpresetan laneratzeko bultzada
Gobernu Kontseiluak onartu du astearte honetan Confebaski 50.028 euroko dirulaguntza zuzena ematea, euskal enpresetan migratzaileak laneratzen laguntzeko programa bat burutzeko.
Euskal Enpresarien Konfederazioak aurkeztutako programaren helburua da enpresei, batez ere, txikiei eta ertainei, atzerritartasunaren arloko arau esparruaren ezagutza argia eta eguneratua ematea, bai eta migratzaileak kontratatzeko aholkularitza tekniko eta juridiko indibidualizatua ematea ere.
Gainera, proiektu horrek aurreikusten du material eta tresna praktikoak eskuragarri jartzea, enplegu eskaintzaren eta enplegu eskariaren arteko lotura mekanismoak bultzatzea eta arlo horretako etorkizuneko politika publikoak hobetzeko aukera emango duten oztopoak eta jardunbide egokiak identifikatzea.
