Astelehenean, 19:00ak aldera, Gernikako Ertzain-etxeko patruilek gama altuko ibilgailu bat geldiarazi zuten BI-2120 errepidean, Mungiako udal-barrutian, egiten ari ziren prebentziozko kontrol batean. Ibilgailuan hiru gizon zihoazen, eta gidariak positibo eman zuen drogen zantzu-proban, eta, gainera, baliokoa ez zen atzerriko gidabaimen bat aurkeztu zuen. Hiru gizonek etxebizitzetan indarra erabiliz egindako lapurretekin erlazionatutako polizia-erreseinak zituzten.
Agenteak konturatu ziren bidaiariak zerbait ezkutatu nahian ari zirela, eta identifikatzeko unean, batek objektu bat bota zuen arbola baterantz. Korapiloa eginda zuen galtzerdi bat zen, eta barruan hainbat bitxi, besteak beste inizialak grabatuta zituzten dominak eta eskumuturrekoak aurkitu zituzten. Autoaren eta pertsonen prebentziozko miaketan, polizia-baliabideek bitxi gehiago eta lapurtutakoak izan zitezkeen objektuak zeuzkan gerriko poltsa bat aurkitu zuten.
Berrogei bat minutu lehenago, Ertzaintzak abisu bat jaso zuen Bakioko etxebizitza batean lapurreta egin zutela esanez. Agenteek lehen ikerketak egin zituzten, eta egiaztatu zuten ibilgailuko bidaiariei aurkitutako bitxiak etxebizitza horretan lapurtu zituztela, bizilagunak une batez kanpoan zirela aprobetxatuz. Hori dela eta, magrebtar jatorriko 30, 23 eta 20 urteko hiru gizonak atxilotu zituzten.
Ertzainek sakonago aztertu zuten atxilotuetako bat, eta bere oinetakoetako baten barne-zolaren azpian sarrailak irekitzeko aldatutako giltza bat, lapurreta gertatu zen etxeko giltzaren profil, tamaina eta pin berberak inprimatu zituena, aurkitu zioten.
Ertzain-etxeko eginbideak amaitutakoan, hiru atxilotuak atzo arratsaldean jarri zituzten Gernika-Lumoko Guardiako Epaitegiaren eskuetan, eta epaileak espetxeratzeko agindua eman zuen.
