Gobernu Kontseiluak lau ikerketa-bekaren deialdia onartu du. Guztira 40.000 euroko zuzkidura izango dute, eta Euskadiko Artxibo Historikoan gordetzen diren dokumentu-funtsak ikertzea sustatzea dute helburu. Ekimenaren bidez, Euskadiren historiaren ezagutza sakontzen lagunduko duten ikerketa berriak eta zabalkunde-proposamenak bultzatu nahi dira, dokumentu-ondare hori herritarrengana hurbiltzeko.
Deialdi honen bidez, Eusko Jaurlaritzak ikerketaren aldeko laguntza-ildo bat sendotzen du, Euskadiko Artxibo Historikoa ezagutza sortzeko gune bizi bihurtzen laguntzen duena. 10.000 euroko lau bekei esker, zentro honek gordetzen duen dokumentu-ondarea ezagutarazi, interpretatu eta herritarrekin partekatzen lagunduko duten ikerketa berriak eta zabalkunde-ekimenak garatu ahal izango dira.
Euskadiko Artxibo Historikoa, Kultura eta Hizkuntza Politikako Sailaren menpekoa, herritarren zerbitzura dagoen artxibo-zerbitzua eta zentro kulturala da, eta Euskadiko dokumentu-memoriaren zati esanguratsu bat zaintzen du. Bere eginkizunen artean daude euskal dokumentu-ondarea ezagutaraztea eta balioan jartzea, bai eta haren ikerketa eta zabalkundea sustatuko duten ekimenak bultzatzea ere.
