- Bihar, irailaren 25ean (ostirala), Emergentziak Osakidetzak tailer praktikoak egingo ditu Bilboko Areatzan, 17:00etatik 21:30etara, oinarrizko bizi-euskarriko maniobrak egiten, larrialdiak hautematen eta laguntza-protokoloa aktibatzen irakasteko
- Jarduera adin guztietako pertsonei zuzenduta dago, eta ez da aurretiko ezagutza sanitariorik eduki behar. Horrez gain, Emergentziak Osakidetzaren BEA mugikor eramango du, jendeak bisitatzeko
- Emergentziak Osakidetzaren ekimenak prebentzioa, osasun-hezkuntza eta herritarren parte-hartzea sustatzen ditu, EAEko Osasun Itunaren lehentasunekin bat etorriz, hurbileko, prebentzioko eta pertsonengan oinarritutako osasun-eredurantz ekiteko
Emergentziak Osakidetzak prestakuntza-ekintza bat egingo du gaur arratsaldean Bilbon, herritarrei osasun-larrialdi baten aurrean modu egokian jarduteko ezinbestekoak diren ezagutzak transmititzeko. Emergentziak Osakidetzaren Zure esku dago bizitza bat salbatzea: ikasi nola egin BBBa jarduera 17:00etatik 21:30etara egongo da martxan etengabe eta emergentzietako 13 profesionalek hartuko dute parte. Horrez gain, BEA mugikor bat (Bizi Euskarri Aurreratuko anbulantzia) izango da bertan, zeina arratsalde osoan bisitatu ahalko den, egoera kritikoei arreta emateko erabilitako ekipamendua eta laguntza-baliabideak zuzenean ezagutzeko.
Ildo horretan, Osakidetzak adierazi du, herritarrak larrialdietarako oinarrizko teknika horietan trebatuz gero, ebidentzian oinarritutako osasun-ezagutza komunitate osora zabaldu daitekeela. Horretarako, Osakidetzak herritarren esku jarriko ditu bere baliabide eta profesionalak. Horri esker, gizartea hobeto prestatuta egongo da egoera kritikoen aurrean jarduteko, osasun sistema publikoarekin koordinatuta.
Emergentziak Osakidetzaren jarduera 17:00etatik 21:30etara egongo da martxan etengabe, Bilboko Areatzan jarriko duten karpa batean.
Prestakuntza praktikoa adin guztietarako
Jarduera adin guztietako pertsonei zuzenduta dago, eta ez da aurretiko ezagutza sanitariorik eduki behar. Edukiak eta hizkuntza parte-hartzaileen profiletara egokituko dira, eta, hala, helduen, gazteen eta familien parte-hartzea erraztuko da.
Prestakuntza-saioan, azalpen teoriko laburrak eta, batez ere, praktika konbinatuko dira, ikasitakoa berehala aplikatu ahal izateko. Hala, kasu simulatuen bidez, parte-hartzaileek ikasitako maniobrak eta prozedurak praktikatu ahal izango dituzte, Emergentziak Osakidetzako profesionalek une oro gidatuta.
Horrez gain, Emergentziak Osakidetzaren BEA mugikor eramango du jendeak bisitatu dezan, ekintza dibulgatibo gisa. Emergentziak Osakidetzako langileek bizi-euskarri aurreratuko ibilgailuaren ekipamendua erakutsiko dute, eta egoera kritikoetan dauden pazienteen arretan egunero esku hartzen duten laguntza-baliabideen funtzionamendua azalduko dute. Ekimena Ikertzaileen Europako Gauaren programazioaren parte da, hainbat hiritan ospatzen den Zientziaren Astearen esparrukoa, eta Europako zientzia-dibulgazioko ekitaldi nagusietako bat izango da.
Herritarren parte-hartzea eta osasun-hezkuntza, Osasunaren Euskal Itunaren helburuak
Emergentziak Osakidetzaren ekimenak Osasun Sailak eta Osakidetzak prebentzioarekin, osasunaren sustapenarekin eta herritarren osasun-hezkuntzarekin duten konpromisoarekin egiten du bat. Prestakuntza praktikoa, irisgarria eta adin guztietarako egokia denez, jarduerak lagundu egiten du herritarrek larrialdi-egoera bat garaiz antzemateko, laguntza-baliabideak behar bezala aktibatzeko eta oinarrizko laguntza-neurriak aplikatzeko duten gaitasuna indartzen.
Jarduera hori bereziki lotuta dago Osasunaren Euskal Itunaren zenbait ildo estrategikorekin: Osasunaren Prebentzioa eta Zaintza, Osasunaren Sustapena eta Ekintza Komunitarioa, Lehen Mailako Arreta eta Arreta Komunitarioa indartzea eta denboraren mendeko patologien arreta, zeinetan erantzun azkarra berebizikoa baiten pertsonaren eboluzioa egokia izateko. Era berean, Itunaren helburua da osasun-eredu prebentiboago, hurbilago eta pertsonengan zentratuago baterantz aurrera egitea, herritarren parte-hartzea eta osasunaren zaintzan erantzunkidetasuna sustatuko dituena.
Euskadiko Osasun Itunak ibilbide-orri partekatu bat ezartzen du, pertsonak ardatz dituen osasun-sistema unibertsal, jasangarri eta ekitatibo baterantz aurrera egiteko. Esparru horretan, Emergentziak Osakidetzak garatzen duena bezalako ekintzek beren helburuak gauzatzen laguntzen dute, osasunerako, prebentziorako eta parte-hartze komunitariorako hezkuntza-ekimenen bidez, eta herritarrek banakoen eta taldeen osasunaren babesean zeregin aktiboa izateko duten gaitasuna indartzen dute.
