- Kanonaren bidez bildutako dirua eragindako eremuetan ingurumenaren kontserbazio, berreskuratze eta berriztatze proiektuetara zuzenduko da, baita energiaren erabilera arrazionala sustatzera, energia berriztagarriak ezartzera edo klima-aldaketaren ondorioetara lurraldea egokitzera ere.
- Orain arte, kanonari esker urtean 655.600 euroko diru-bilketa sortu da, 2025eko eta 2026ko ekitaldiei dagokiena: guztira, 1.311.200 euro. Zenbateko hori eragindako eremuen artean banatuko da, onartzen den metodologiaren arabera.
- Trantsizio Energetikoaren eta Klima Aldaketaren Euskal Legeak energia berriztagarrien bidezko sorkuntzarako instalazioentzako kanon baten ordainketa ezarri zuen, parke eolikoak eta fotovoltaikoak dituzten eremuetan jarduerak finantzatzeko.
- Karga honek 5MW baino gehiagoko potentzia duten instalazioei eragiten die, eta kanpoan uzten ditu industria-lurzoruan kokatutako instalazioak eta autokontsumorakoak. Kanon horren helburua da instalazio mota horiek kokatzen diren eremuetan sortzen dituzten inpaktuak konpentsatzea.
- Banaketa-metodologia horrek 2025eko abenduan onartutako araudia osatzen du. Araudi horren bidez hasi zen energia berriztagarrien instalazioen titularrek ordaintzen duten kanonaren diru-bilketa jasotzen.
Eusko Jaurlaritzak aldez aurreko kontsulta-prozesua abiatu du energia berriztagarriak sortzeko instalazioei ezarritako kanonaren bidez lortutako baliabideak banatzeko metodologia ezartzeko. Ekimen horren xedea da gardentasun-irizpideekin zehaztea nola itzuliko diren kanon horretatik eratorritako diru-sarrerak garapen eoliko eta fotovoltaiko handiak kokatzen diren eremuetara.
Horrez gain, Kanon horrek eragindako Euskadiko Parke Eolikoen eta Fotovoltaikoen Erregistroaren funtzionamendua ere zehaztuko da.
Kontsultak irekitzen du parte-hartze espazio bat, banaketa-sistema orekatu bat diseinatzen lagunduko duten ekarpenak jasotzeko eta tokiko eremuan trantsizio energetikoak eragiten dituen onurak indartzeko. Horrela, urrats berri bat ematen da Euskadiko klima- eta energia-politikaren barruan aurreikusitako tresnak garatzen jarraitzeko, energia berriztagarrien hedapena lurraldearen garapen jasangarriarekin bateragarri egiteko.
Urtero 655.000 eurotik gora, ingurumen, energia- eta klima-egokitzapenerako jarduerak babesteko eragindako eremuetan
Orain arte, kanonari esker urtean 655.600 euroko diru-bilketa egonda, 2025eko eta 2026ko ekitaldiei dagokiena: guztira, 1.311.200 euro. Zenbateko hori eragindako eremuen artean banatuko da, onartzen den metodologiaren arabera.
Baliabide horiek garatzen lagunduko dute Euskadik sustatzen dituen jasangarritasunaren, trantsizio energetikoaren eta klima-aldaketara egokitzearen helburuekin bat datozen ekimenak.
Araudiak aurreikusten du bildutako diru-kopuruak lehentasunez bideratzea ingurumenaren kontserbazioarekin, berreskuratzearekin eta berriztapenarekin lotutako jardueretara, baita energiaren erabilera arrazionala eta energia berriztagarria sustatzera eta klima-aldaketaren ondorioetara egokitzeko ekimenetara ere.
Baliabide horiei esker, eremu hartzaileek bultzatu ahalko dituzte beren ingurumen-kalitatea hobetuko duten proiektuak, energiaren kudeaketa eraginkorragoa duten eta klima-aldaketaren ondoriozko inpaktuen aurrean erresilientzia indartuko dutenak. Horrela, kanona da energia-trantsizioak onura partekatuak sor ditzan laguntzen duen tresna, energia-sistema jasangarriago baterantz aurrera egiteko beharrezkoak diren energia berriztagarrien azpiegiturak hartzen dituzten lurraldeentzat.
Legeak aurreikusitako kanon bat
Trantsizio Energetikoaren eta Klima Aldaketaren Euskal Legeak energia berriztagarrien bidezko sorkuntzarako instalazioentzako kanon baten ordainketa ezarri zuen. Tresna horren helburua da azpiegitura horiek sortzen dituzten diru-sarreren zati bat zuzenean haien presentzia jasaten duten eremuetan interes publikoko ekimenak finantzatzera bideratzea.
Mekanismo hau trantsizio energetikoari lotutako onurak lurraldera itzultzearen printzipioan oinarritzen da. Horrela, parke eoliko eta fotovoltaiko handien presentzia duten eremuek baliabide gehigarriak izango dituzte beren ingurunea hobetzeko, proiektu jasangarriak sustatzeko eta azpiegitura horiek lurraldean modu orekatuan integratzea errazteko.
Kanonak instalazio handietan du eragina
Energia Berriztagarrien Kanona 5 megawattetik gorako (MW) potentzia duten instalazioei aplikatuko zaie. Bere aplikazio-eremutik kanpo geratzen dira industria-lurzoruan kokatutako instalazioak, autokontsumorako direnak eta 5 megawattertik beherako sorkuntza-potentzia duten proiektuak.
Muga horren helburua da tresna dimentsio handieneko instalazioetan zentratzea, eta aldi berean autokontsumora bideratutako ekimenen garapena babestu.
Orain kontsulta publikoan jartzen den metodologiak 2025eko abenduan onartutako araudia osatzen du; une horretan hasi zen eragindako energia berriztagarrien instalazioen titularrek kanona modu eraginkorrean ordaintzen.
Helburua da lortutako baliabideak modu eraginkorrean banatu ahal izatea energia berriztagarrien garapen handiak dauden eremuen artean, haien presentzia eta lurraldean duten eragina kontuan hartzen dituzten irizpideen arabera.
