- Tresnak eguneroko ohituren eragin klimatikoa aztertzen du, bost esparru nagusitan: etxea, mugikortasuna, elikadura, kontsumoa eta emisioen konpentsazioa
- Pertsona bakoitzak bere emaitzak Euskadiko batezbestekoarekin aldera ditzake, eta emisio gehienak non sortzen diren identifikatu
- Kalkulagailuak ohitura aldaketak errazteko eta Euskadi klimatikoki neutroa izan dadin laguntzeko gomendio eta konpromiso pertsonalizatuak eskaintzen ditu
- Herritarrei zuzendutako kalkulagailu hau urriaren 24an mundu osoan ospatuko den Klima Aldaketaren Aurkako Nazioarteko Egunaren barnean dago kokatuta, eta bat egingo du Euskadiko ASTEKLIMA-Klimaren eta Energiaren Astearekin.
Ihobek, Eusko Jaurlaritzako Ingurumena Kudeatzeko Sozietate Publikoak, herritarren karbono aztarna kalkulatzeko makina bat jarri du abian, edozein pertsonak aukera izan dezan bere bizimoduarekin lotutako emisioak modu errazean neurtzeko, klima inpaktu handiena duten ohiturak identifikatzeko eta hori murrizteko gomendio pertsonalizatuak eskuratzeko.
Ihoberen webgunean herritar guztientzat eskuragarri dagoen tresnak etxearekin, mugikortasunarekin, elikadurarekin, kontsumo ohiturekin eta emisioen konpentsazioarekin lotutako informazioa aztertzen du, eta klima aldaketaren inguruko kezka hori Euskadi klimatikoki neutroa izan dadin lortzeko ekintza zehatz eta neurgarri bihurtzen laguntzen du. «Neurtu, ulertu eta jardun» mezuan oinarrituta, kalkulagailuak aukera ematen du lurraldearen karbono aztarnan banakako erabakiek nola laguntzen duten jakiteko, eta berotegi efektuko gasen emisioak murrizteko konpromiso pertsonalak hartzea bultzatzen du.
Helburutzat azken datu bat ematea duten beste tresna batzuek ez bezala, Ihobeko kalkulagailuak emaitzak interpretatzen eta emisioen sorreran pisu handiena duten erabakiak ulertzen laguntzen du. Horrela, erabiltzaile bakoitzak zenbat igortzen duen ez ezik, hobetzeko ahalmen handiena duten bere errutinaren alderdiak zeintzuk diren ere jakin dezake.
Tresnak, gainera, emaitzak testuinguruan kokatzeko funtzionaltasun bereziki erabilgarria du: lortutako aztarna pertsonala Euskadiko erreferentzia balioekin alderatzeko aukera ematen du. Informazio horrek erraztu egiten du pertsona bakoitzak bere emisioak lurraldearen errealitatean koka ditzan eta hobeto uler dezan nola laguntzen dioten hainbat bizi ohiturek deskarbonizazioaren erronka kolektiboari.
Kalkulagailuaren balio nagusia diagnostikoa ekintza bihurtzeko duen gaitasunean datza. Kalkulua osatu ondoren, erabiltzaileek klima inpaktua murrizteko gomendio espezifikoak jasotzen dituzte, eta beren eguneroko errealitatearekin lotutako konpromiso zehatzak aukera ditzakete. Mugikortasun eta kontsumo energetikoaren aldaketak, elikadurarekin edo erosketekin lotutako erabakiak… tresnak aukera eskuragarriak eskaintzen ditu, karbono aztarna txikiagoa duten bizimodu estiloetarantz pixkanaka aurrera egiteko.
Euskadiko karbono aztarna
Eskualde bateko karbono aztarna ingurumen adierazle bat da. Mundu osoan sortzen diren berotegi efektuko gasen emisioak neurtzen ditu, ondasunen eta zerbitzuen azken eskaria asetzeko, emisio horiek non sortzen diren kontuan hartu gabe.
Euskadiko karbono aztarna 10,4 tona CO2 baliokidea da biztanleko, Europako batezbestekoa (10,9) baino pixka bat txikiagoa. Euskal herritarren eguneroko jarduerek ingurumenean duten inpaktua islatzen du neurri horrek. Kopuru horretatik 7,8 tona CO2 baliokide etxeetako kontsumoari dagozkio, eta garraioa, elikadura eta etxebizitza nabarmentzen dira emisio iturri nagusi gisa.
Ekintza klimatikorako egun bat
Ihoberen karbono aztarnaren kalkulagailua martxan jartzea bat dator urriaren 24an mundu osoan ospatuko den Klima Aldaketaren aurkako Nazioarteko Egunarekin, eta egun horrek bat egingo du Euskadiko ASTEKLIMA-Klimaren eta Energiaren Astearekin.
Tresna honek ideia sinple bati erantzuten dio: erabaki oro da garrantzitsua. Emisioak murriztea erronka kolektiboa da, baina norbanakoaren ezagutza eta ekintzarekin hasten da. Hori dela eta, kalkulagailua tresna praktikoa da herritarrek klima aldaketa neurtzeko, ulertzeko eta hari aurre egiteko, eta, beren erabakietatik, Euskadik datozen hamarkadetarako izango dituen klima neutraltasunaren helburuak lortzen lagunduko du.
ASTEKLIMA 2026
ASTEKLIMA 2026-Klimaren eta Energiaren Astea, hain zuzen, Eusko Jaurlaritzako Industria, Trantsizio Energetiko eta Jasangarritasun Sailak Ihoberekin eta Energiaren Euskal Erakundearekin (EEE) batera antolatutako ekimena da, eta urriaren 16tik 25era egingo da lurralde osoan. Jasangarritasunarekin lotutako urteroko hitzordu honek herritarren eta ekintza klimatikoarekin konprometitutako erakundeen (ikastetxeak, udalak, etab.) parte hartzea bilatzen du. Aurten ASTEKLIMAk 42 eragilek bultzatutako 130 jarduera biltzen ditu, udal, enpresa, elkarte, ikastetxe eta Ekoetxea-Euskadiko Ingurumen Zentroren Sarearen artean, eta «Zure arrastoa keinu bakoitzean hasten da» lelopean egingo da.
