- Itziar Fernández Politika Ekonomikoaren eta Europako Kohesioaren zuzendariak EGF+ funtsaren kudeaketan Euskal Autonomia Erkidegoak duen esperientzia partekatu du, eta erakundeen eta gizarte-entitateen arteko lankidetzak inklusioa eta enplegua sustatzeko duen garrantzia nabarmendu du.
Eusko Jaurlaritzak Atenasen aldarrikatu du garrantzi handikoa dela Europako funtsek orientazio praktikoa izatea, pertsonengandik gertu egotea eta Europako eskualdeek dituzten gizarte-erronka handiei erantzuteko gai izatea, hala nola zahartze demografikoari, kolektibo zaurgarrien inklusioari edo enplegua lortzeari. Hori izan da Itziar Fernández Marrón Politika Ekonomikoaren eta Europako Kohesioaren zuzendariak urteroko ESF+ Social Services Hub topaketan helarazitako mezu nagusietako bat. Gaur Atenasen amaitu den European Social Network (ESN) erakundeak antolatutako topaketaren ardatz nagusia izan da Europako Gizarte Funts Plusek (EGF+) Europako gizarte-zerbitzuak indartzeko betetzen duen zeregina.
Itziar Fernández zuzendariak hizlari gisa esku hartu du EGF+ funtsak kudeaketa-agintarien ikuspegitik nola funtzionatzen duen aztertzeko egindako osoko bilkuran. Europako tresna horren bidez finantzatutako programen diseinuan eta betearazpenean Euskadik duen esperientzia partekatu du. Foroan, Europako Batzordeko ordezkariak, nazioko eta eskualdeko programen arduradunak eta Europako hainbat herrialdetako gizarte-zerbitzuak egiten dituzten entitateak bildu dira.
Fernandezek nabarmendu du finantzaketa-lehentasunen identifikazioa abiatu behar dela gizartearen benetako premien diagnostiko zorrotzetik. Euskal Autonomia Erkidegoaren kasuan, prozesu hori zenbait faktoreren etengabeko azterketan oinarritzen da, hala nola lan-merkatuaren bilakaera, pobrezia, gizarte-bazterketa, gazteen enplegua, biztanleriaren zahartzea edo lanbide-prestakuntzaren premiak. Ebaluazio horretatik abiatuta, lehentasunak finantzaketa-aukera zehatz bihurtzen dira, baita herritarrentzat emaitza ukigarriak sortzera bideratutako proiektu ere.
Politika Ekonomikoaren eta Europako Kohesioaren zuzendariak azaldu duenez, Euskadiko ereduaren elementu bereizgarrietako bat da programazio fase guztietan eragile publikoek eta sozialek parte-hartze zabala izatea. Eusko Jaurlaritzak, Lanbidek, tokiko administrazioek, unibertsitateek, gizarte-eragileek eta hirugarren sektoreko erakundeek elkarlanean jarduten dute premien definizioan, esku-hartzeen diseinuan eta proiektuen inplementazioan. Ikuspegi parte-hartzaile horri esker, programak lurraldearen errealitatera egokitu daitezke, erakundeen arteko koordinazioa indartu daiteke eta Europak finantzatutako jardueren eragina maximiza daiteke.
Euskadin bultzatutako ekimenak
Atenasen aurkeztutako adibideen artean, Itziar Fernándezek Euskadin familia-erreferenterik gabeko gazte migratzaileak helduarora igarotzea errazteko bultzatutako ekimenak nabarmendu zituen, baita adingabe, gazte eta egoera zaurgarrian dauden familien inklusioa indartzeko programak ere. Jarduera horiek islatzen dute Europako Gizarte Funts Plusek zernolako gaitasuna duen politika publikoak osatzeko eta premia espezifikoak dituzten kolektiboengana iristeko.
Euskadik partekatutako esperientzia emaitza zehatzetan oinarritzen da. 2026ko ekainera arte, EGF+ Euskadi Programak 103 eragiketa hautatu zituen, eta 216 milioi euro baino gehiago konprometitu. Jarduketa horiei esker, 40.000 langabek baino gehiagok laguntza-programetan parte hartu zuten, desgaitasunen bat zuten 1.000 pertsonak baino gehiagok laguntza espezifikoa jaso zuten eta 10.000 pertsonak baino gehiagok lortu zuten lana.
Bileran, gizarte politikekin eta Europako Gizarte Funts Plusen kudeaketarekin lotzen diren arlo akademiko, instituzional eta europarreko ordezkari nabarmenek parte hartu dute. Esparru horren barruan, Europako zenbait herrialdetako gizarte-zerbitzuei egindako kontsulta baten ondorio nagusiak aurkeztu ziren, eta Europako Gizarte Funts Plusen bilakaera markatuko duten lehentasunak azaldu ziren, gizarte-zerbitzu eraginkorragoak, berritzaileagoak eta eskuragarriagoak babestera begira.
Eusko Jaurlaritzak Europako topaketa horretan izan duen parte-hartzeak aukera eman du Euskadik Europako funtsen kudeaketan pilatutako esperientzia Europar Batasuneko erakundeei eta beste eskualde batzuei helarazteko. Argitu du kudeaketa hori erakundeen arteko elkarlanean, gizarte-erantzunkidetasunean eta epe luzeko ikuspegian oinarritzen dela. Izatez, auzolanaren kontzeptuarekin bat datorren eredua da, guztion onerako lan komunitario gisa ulertuta. Pertsonak eta gizarte-kohesioa jartzen ditu politika publikoen erdigunean eta Euskadik Europa inklusiboago, kohesionatuago eta herritarrengandik hurbilago batekin duen konpromisoa indartzen du.
