Gaurtik aurrera eta hilabetez 2021eko kultura-arloko sorkuntza lanetarako diru-laguntzak eskatzeko epea zabalik dago. Laguntza neurri hauekin sorkuntza sektorea finkatzen lagundu nahi du Eusko Jaurlaritzako Kultura eta Hizkuntza Politikako sailak. Guztira 354.000 euro izango dira sei modalitate desberdin laguntzeko:
- Antzerkirako testuak: Euskal Autonomia Erkidegoko bi hizkuntza ofizialetatik edozeinetan idatzitako antzerkirako testu originalak sortzeko guztira 52.000 euro bideratuko dira.
- Zinemarako gidoiak: euskaraz zein gaztelaniaz idatzitako fikzio zein animaziozko gidoiak sustatzeko 104.000 euro erabiliko dira.
- Musika konposizioak: partitura baten edo pentagraman edo, musika elektroakustikoaren kasuan, kronograman edo interpretazio planean irudikatutako musika-konposizio originalak sortzeko helburua du 64.000 euroko partidak.
- Gazteei zuzendutako euskarazko literatura-testuak: 40.000 euro erabiliko dira 12 eta 18 urte arteko gazteei zuzendutako eta euskaraz idatzitako literatura testuak sustatzeko.
- Euskarazko ipuin eta nobela motzak: gutxienez 100.000 karaktereko euskarazko literatura-testuen (ipuinen zein nobela motzen) sormena sustatzeko 40.000 euro.
- Koreografiak: dantza profesionalaren arloko sorkuntza-proiektuei laguntzera 64.000 euro bideratuko dira.
Ondoren modalitate bakoitzeko sortuko den balorazio-batzorde banak aztertu eta ebaluatuko ditu aurkeztutako lanak.
Aurreko deialdian, 2020koan, guztira 47 laguntza eman ziren: 8 antzerki-testuak sortzeko; beste 8 gidoiak idazteko; 15 musika-lanak idazteko; 5 laguntza eman ziren gazteei zuzenduriko euskarazko literatura-testuak idazteko; beste 5 euskarazko ipuinak eta eleberri laburrak idazteko; eta, azkenik, 6 laguntza koreografiak sortzeko.
