Barakaldoko Udalaren Osoko Bilkurak Udala TEK Barakaldo Tokiko Energia Komunitatean integratzeko akordioa aho batez onartu du gaur, Elkartearen bazkide arrunt eta babesle gisa. Neurri honekin, Udalak behin betiko bultzada eman nahi dio hiriko 850 familia eta denda txikiri autokontsumo energetikoa ahalbidetuko dien ekimenari.
«TEK Barakaldon bazkide babesle gisa sartzearekin batera, Udalak egonkortasuna bermatzen dio Hiri Agendaren garapenean udalerri aurreratu gisa kokatzen gaituen proiektuari», Amaia del Campo Barakaldoko alkateak adierazi du akordioa onartu ondoren. «Gure helburua da proiektu baten arrakasta eta hazkundea sustatzea, askoz jasangarriagoa den eta erabiltzaileentzako baldintza ekonomiko ezin hobeak dituen energia-eredu batera hurbiltzen gaituena».
Ordainetan, alde biko akordioak aurreikusten du udal eraikinetako 10 estalki lagatzea plaka fotovoltaikoak instalatzeko. Zehazki, honako eraikin hauek aukeratu dira: Udalaren eraikin nagusia, udal biltegiak, Alondegia, Clara Campoamor Gizarte Etxea, CIS eraikina, Retuertoko Kultur Etxea, Gurutzetako Gizarte Etxea, Burtzeñako frontoia, Lasesarreko kiroldegia eta
Bituritxa LHI.
Instalazio horiek aukeratzeak, kokapen estrategikoari esker, udalerriaren azaleraren % 100 inguruko estaldura-eremua bermatzen du. Horren ondorioz, energia berriztagarrietatik soilik datozen 592 kW-ko potentzia instalatua lortzea aurreikusten da, autokontsumo partekatura bideratua, 850 familia eta denda txikiri fakturan deskontuak eginez.
Instalazioak lagatzeko konpromiso horretaz gain, Udalak konpromisoa hartzen du proiektuaren onurei buruzko informazio eta kontzientziazioekintzak egiteko, eta bazkide faltagatik estali gabeko zorrak estaltzeko -gehienez ere 39.960 euro urtean-, gehienez ere 8 urtez.
AURREZPENA ETA IRAUNKORTASUNA
Elkarteak aurkeztutako bideragarritasun-txostenaren arabera, beti energia % 100 berriztagarria izatearen segurtasunaz gain, autogeneratua edo kontratatua izan, TEK Barakaldoko kide diren familiek eta saltokiek urteko energia-kostuan gutxienez % 20ko aurrezpena lortuko dute, elkarteko kide izan gabe izango luketen kostuari dagokionez.
Amaia del Campo alkateak ziurtatu duenez, «gizarte-berrikuntzako proiektu bat da, udal-estrategiarekin bat datorrena. Beraz, ekologiaren, ekonomiaren eta jasangarritasunaren ikuspegitik kontsumo iraunkorraren aldeko ezinbesteko apustua da, trantsizio energetikorantz aurrera egiteko modu inteligentea izateaz gain», esan du Del Campok.
