- “Euskal administrazioetatik entzun eta lagundu egingo dizuegu, ekiteko eta bizitzeko testuingururik onena izateko aukera ematen dizuen lan-ekosistema horretan”
- EDA Drinks & Wine Campusen jardunaldia: “Ardoaren Talentu Gazteak-Jóvenes Talentos del Vino”, Bastidan
- “Gazteen belaunaldi berri honen eginkizuna funtsezkoa da: “bitaminatzat” eta aldaketaren eragiletzat hartzen zaituztegu”
Raúl Pérez Iratxeta Eusko Jaurlaritzako Elikadura eta Landa Garapeneko sailburuordeak mahastizaintzaren eta enologiaren munduan profesionalki sartzen diren gazteak animatu ditu “talentuarekin eta lanaren bidez komunitate eta lidergo partekatuko testuinguru bat eraikitzera; euskal administrazioetatik entzun eta lagundu egingo dizuegu Euskadin ekiteko eta bizitzeko testuingururik onena izateko aukera ematen dizuen lan-ekosistema horretan”.
Pérez Iratxetak EDA Drinks & Wine Campusek Bastidan hiru mahai-ingururekin antolatutako “Ardoaren talentu gazteak” jardunaldian parte hartu du gaur goizean. Lehenengo mahai-inguruaren gaia “Ardoaren negozioa eta saltzen nola jakin” izan da, eta bertan izan dira Pérez Iratxeta, Mireia Pujol Busquets, Guillermo de Aranzabal eta Amaia Arguiñano. Topaketan Noemí Agirre Arabako Foru Aldundiko Nekazaritzako diputatua, Joxe Mari Aizega, Basque Culinary Centerren zuzendaria eta Elisa Ucar EDA Drinks & Wine Campusen zuzendaria ere izan dira.
“Jarrera izatea beti ikasten aritzea, gora egitea eta haztea da, eta sektorearen eraldaketaren lidergoa ere berekin dakar, lurraldearen aldeko konpromisotik”, esan die sailburuak Bastidako Kristo Santuaren elizaren inguruan elkartu diren ehun gazteri, eta eskerrak eman dizkie “eraikitzen ari zareten guztiagatik eta herriarekin hartutako konpromisoagatik”.
“Jarrera ekintzailea da beste pertsona batzuek oztopoak ikusten dituzten lekuan aukerak identifikatzeko gaitasuna izatea, neurtutako arriskuak hartzeko ausardia izatea, lankidetzatik lideratzeko borondatea izatea eta ekonomian, gizartean, kulturan eta lurraldean balioa sortu nahi izatea”, azpimarratu du Elikadurako sailburuordeak.
“Eusko Jaurlaritzatik aitortzen dugu gazteen belaunaldi berri honen eginkizuna funtsezkoa dela. “Bitaminatzat” eta aldaketaren eragiletzat hartzen zaituztegu. Zuen aldeko apustua egitea Eusko Jaurlaritzak, kalitatean, bikaintasunean eta bereizia izatean oinarrituta, Arabako Errioxarako nahi duen ereduaren aldeko apustua egitea da”, erantsi du.
“Horretarako, BCC Fundazioarekin, Arabako Foru Aldundiarekin eta Eusko Jaurlaritzarekin lankidetzan, EDA Drinks & Wine Campus sortu dugu, Guardian eta Gasteizen, oraingo eta etorkizuneko proiektu bat. Tresna handi gisa sortu da, ondo planifikatuta, eta emaitzak jasotzen hasi gara; euskal ekosistemaren potentziala ahalik eta gehien aprobetxatzera animatzen zaituztegu, prestakuntza sare zabala, laguntza espezifikoak, ingurune fiskal mesedegarria eta I+G+b-ren bultzada sendoa eskaintzen baitizkizue”, esanez amaitu du Pérez Iratxeta sailburuordeak Bastidan.
EDA Drinks & Wine Campusek ardoaren talentu gazteei eskainita antolatu du topaketaren laugarren edizio hau. 40 urtetik beherako ehun elaboratzaile gazteak ardogintzako hainbat eskualdetakoak dira. Guztiek prestakuntza, lanerako grina eta euren lurraldeetako bikaintasuna islatzeko nahia partekatzen dute.
Edizio honetako programan hiru mahai-inguru egingo dira, eta mahastizaintza eta ardogintza sektorearen ikuspegi desberdinak landuko dituzte 12 hizlarik. EDA Drinks & Wine Campusek komunitate sendo bat eraikitzeko eta talentu gaztea bultzatzeko konpromisoa berretsi du, funtsezko osagaia baita ardoarena bezalako sektore zorrotz baten egungo eta etorkizuneko erronkei aurre egiteko.
“Ardoaren negozioa eta saltzen nola jakin” mahai-inguruaren moderatzailea Yolanda Ortiz de Arri izan da, eta bertan izan dira Mireia Pujol (Alta Alella), Guillermo de Aranzabal (Grupo Rioja Alta), Amaia Arguiñano (K5) eta Manu Michelini (Dominio del Callao). Moderatzailea Lorea Mendizabal izan duen “Enoturismoa eta garapen jasangarria” mahai-inguruan izan dira María García (María de La Recueja), Jorge Méndez (Viñatigo), Paloma Rodríguez Moure (Abadía da Cova) eta Víctor Janer (Oller del Mas).
“Zer da mahastizain ona izatea?” panelaren moderatzailea José Ignacio Junguitu izan da, eta parte-hartzaileak Gemma Miró (Gemma Miró), Miguel Eguíluz (Cupani), Annabelle Borra (Vinos de Bellite) eta Adrián Alonso (El Serbal).Elisa Ucar, EDA Drinks & Wine Campusen zuzendaria, arduratu da topaketari amaiera emateaz.
