Eusko Jaurlaritzak, gaurko Gobernu Kontseiluan, 2026an zehar biltzar eta bilera zientifikoak antolatzeko dirulaguntzen deialdi bat onartu du, guztira 400.000 euroko zuzkidurarekin. Zientzia, Unibertsitate eta Berrikuntza Sailaren ekimenaren helburua da Euskadi erreferentzia-polo gisa finkatzea ezagutza aurreratuaren trukean eta bere sistema zientifikoaren nazioarteko proiekzioan.
Programaren helburua abangoardiako ezagutza zientifiko eta teknologikoaren zabalkundea bultzatzea da, bai eta Euskal Autonomia Erkidegoan garatutako ikerketaren ikusgarritasun globala handitzea ere. Sailak topaketa horien balio estrategikoa azpimarratu du, bikaintasun zientifikoa indartzen dutelako eta izen handiko ikertzaileen parte-hartzea bultzatzen dutelako, bai estatuan, bai nazioartean.
Deialdiak bi ekitaldi mota aurreikusten ditu. Alde batetik, batzorde antolatzaile eta zientifikoen babesarekin, txosten saioak eta azken emaitzen aurkezpena barne hartzen dituzten kongresuak. Bestetik, adituen arteko truke teknikoa ardatz duten bilera zientifikoak.
Aurtengo edizioak genero-oreka bultzatzen du, bai eta ikertzaile gazteen parte-hartzea ere. Horretarako laguntza ekonomikoa ematea aurreikusten du, izen-emate kuotak murriztuz eta joan-etorrietako eta ostatuko gastuen zati bat estaliz.
Aurrekontu osoa 200.000 euroko bi tartetan banatzen da urteko seihileko bakoitzerako. Laguntzak 20.000 euro artekoak izan daitezke nazioarteko biltzarren kasuan. Zientzia, Teknologia eta Berrikuntzaren Euskal Sareko agente akreditatuek eskuratu ahal izango dituzte dirulaguntza horiek.
