- Mugikortasun Jasangarriaren sailburuaren hitzetan, hangarra eraikitzea “jarduera industriala eta teknologikoa erakartzeko ahalmenaren adierazle da”
- Azpiegitura horrek konpainiaren aire-flotaren mantentze- eta konponketa-gaitasunak sendotzeko aukera emango du. 40 milioi euroko inbertsioa egingo da, eta 2027an jarriko da martxan
Susana García Chueca Eusko Jaurlaritzako Mugikortasun Jasangarriaren sailburuak Gasteizko aireportuan DHL Express aireontzien mantentze-lanetarako hangar berria eraikitzen hasteko ekitaldian parte hartu du ostegunean. Azpiegitura berria estrategikoa da aerodromoarentzat, eta 40 milioi euroko inbertsioa izango du 2027an martxan egoteko.
Hangar berria konpainiaren Europako sareko bigarrena izango da, eta aukera emango du DHL Express hegazkin-flotak Europan dituen mantentze- eta konponketa-gaitasunak indartzeko, eta, hala, aireontzien efizientzia operatiboa eta erabilgarritasuna hobetzen lagunduko du.
Gasteizek eta Euskadik konpainiaren sare globalean duten pisua handituko du proiektuak, eta goi-mailako prestakuntzadun lanpostuak sustatzeko aukera eman.
Susana García Chueca Eusko Jaurlaritzako Mugikortasun Jasangarriaren sailburuak adierazi duenez, etorkizuneko zentroak “Forondaren indar nagusietako bat sustatuko du: karga-arloan erreferentziazko aireportu gisa duen potentziala. Aireportuak nazioarteko logistika-kateetan duen posizio estrategikoa indartzen du, eta hori aeronautika-sektoreari lotutako industria-jarduera eta jarduera teknologikoa erakartzeko gaitasunaren adierazle da”.
