Barakaldoko Udalak gaur arratsaldean, ezohiko osoko bilkuran, kaleak garbitzeko eta hiri-hondakinak biltzeko kontratu berria esleitu dio Valorizari, 96,6 milioi euroko zenbatekoan, zazpi urteko aldirako. Kontratuak aldeko txosten tekniko guztiak ditu, bai eta KEAOk, Euskadiko Kontratuen inguruko Errekurtsoen Administrazio Organoak, emandako ebazpena ere. Udalaren bolumen ekonomiko handieneko kontratua da, eskaintzen dituen zerbitzuen garrantzia dela eta, eta aukera emango du hiriaren garbitasuna indartzeko, makineria berria sartzeko eta hainbat prestazio hobetzeko, bai herritarrentzat, bai zerbitzua garatzen duten langileentzat.
Berrikuntza nagusien artean, kalean utzitako altzarien eta tresnen bilketa indartzea
nabarmentzen da. Gaur egun, zerbitzu hori aldez aurretik hitzordua eskatuta ematen
da, 010 telefonoaren bidez. Bertan, erabiltzaileek egun eta ordu bat jasotzen dute
objektuak etxetik gertuen duten edukiontziaren ondoan uzteko, ondoren
erretiratzeko.
Sistema horri hilero auzoka programatutako bilketa bat gehituko zaio. Horretarako,
enpresa esleipendunak gehienez ere lau sektoretan banatu ahal izango du udalerria,
eta horietako bakoitzarentzat igande finko bat ezarri ahal izango du hilean,
herritarrek altzariak eta tresnak uzteko aukera izan dezaten, aldez aurretik hitzordua
eskatu beharrik izan gabe. Zerbitzu horrekin batera, informazio-kanpainak egingo
dira, bilketen egutegia ezagutarazteko eta behar bezala funtzionatzeko.
Makineria berria eta garbiketa gehiago eskolako jolastokietan
Kontratu berriak bideak garbitzeko makinak erabat berritzeko betebeharra ezartzen
du, ekipamendu jasangarriagoen, eraginkorragoen eta hiriaren egungo beharretara
egokitutakoen aldeko apustua eginez. Era berean, edukiontzi marroia biltzeko
maiztasuna egun batean handituko da auzo guztietan, eta edukiontzietatik kanpo
utzitako poltsetan dauden hondakinak bereizi beharko dira, birziklatze egokia
errazteko.
Ikastetxeetako jolastokien kasuan, garbiketa asteburuetara eta jaiegunetara ere
zabalduko da, egun horietan irekita dauden esparruetan. Gainera, ekorketa-orgek
lokalizazio-gailuak izan beharko dituzte, zerbitzuaren kudeaketa optimizatzeko.
Langileentzako soldata-hobekuntzak
2023an sinatu eta 2028ra arte indarrean egongo den sektoreko hitzarmenean
jasotako soldata- eta lan-hobekuntzak jasotzen ditu kontratuak. Lan-baldintzen
eguneratze hori zerbitzura bideratutako inbertsioaren hazkundean eragina izan duen
faktoreetako bat da, eta hiri-garbiketaren kalitatea eta plantillaren baldintzak
indartzea ahalbidetu du.
«Esleipen honekin oso urrats garrantzitsua egiten dugu Barakaldoko garbiketa
hobetzen jarraitzeko. Kontratu berriak hobekuntza garrantzitsuak dakartza
zerbitzuan, makineria guztia berritzea eta altzarien eta tresnen bilketa indartzea
ahalbidetuko du gure auzoetan, herritarren eskaera ohikoenetako bati erantzunez «,
adierazi du Asier Umaran Auzoetarako eta Hirirako Zerbitzuetako zinegotziak.
Umaranek, halaber, azken urteetan konplexutasun horretako kontratu bat aurrera
ateratzeko egindako lana azpimarratu du. «Udalaren kontraturik garrantzitsuena da,
duen bolumen ekonomikoagatik eta ematen duen funtsezko zerbitzuagatik. Gaur
onartutako esleipenari esker, datozen zazpi urteetan hiri garbiagoa, baliabide
tekniko hobeak eta langileentzako baldintza hobeak bermatuko ditugu «, amaitu du.
