- 2025eko mahats-bilketak %22 handitu zuen ekoizpena eta 376.000 botila baino gehiago lortzea ahalbidetu zuen, “Oso Ona” kalitate-kalifikazioarekin
- Amaia Barredo: “Arabako txakolinak gure sektoreak lurraldetik balioa, nortasuna eta etorkizunerako aukerak sortzeko duen gaitasuna erakusten du”
Eusko Jaurlaritzako Elikadura, Landa Garapena, Nekazaritza eta Arrantza Sailak Aiarako eskualdeko ardogintza sektorearekiko konpromisoa berretsi du gaur, Amurrioko Txakolin Eguna ospakizunean. Ekitaldi horrek Arabako nekazaritzako produktu berezienetako bat ekoizten duten mahastizain eta upategien lana balioan jartzen du.
Elikadura, Landa Garapen, Nekazaritza eta Arrantza sailburu Amaia Barredok Arabako Jatorri Deitura Babestuaren zeregina funtsezkoa dela azpimarratu du, Arabako Lurralde Historikoaren eta Euskadiren motor ekonomiko, turistiko eta kultural gisa, eta honakoa adierazi du: “Arabako txakolinak gure sektoreak lurraldetik balioa, nortasuna eta etorkizunerako aukerak sortzeko duen gaitasuna erakusten du”.
2025eko mahats-bilketan 441.696 kilo mahats jaso ziren, aurreko kanpainarekin alderatuta %22 gehiago, azken bi ekitaldietan izandako beheranzko joera etenez. Ekoizpen horretatik 281.620 litro txakolin kalifikatu dira ofizialki, hau da, 376.600 botila ingururi dagozkienak.
Lortutako kalitatea “Oso Ona” izan da, maila gorenera heltzetik oso gertu, eta deiturako upategi eta ekoizleek lortutako maila altua berretsiz.
Sektorearen aintzatespena
Amurrion egindako ekitaldian, Alberto Molinero sukaldaria eta Jorge Rodríguez sommelierra ere omendu dituzte, biak La Roca Taldearekin lotuak, bertako produktuarekiko duten konpromisoagatik eta Arabako txakolinaren sustapenean egindako ekarpenagatik. Molinero Michelin izarra duen sukaldaria da, eta Rodríguezek 2024an eta 2025ean Euskadiko Sommelier Onenaren aitortza jaso du. Biak ardo honen gastronomia-eremuko hedapen eta balioan jartze lanagatik izan dira sarituak.
Amaia Barredok zorionak eman dizkie Alberto Molinerori eta Jorge Rodríguezi, eta eskertu die “belaunaldiz belaunaldi produktu hau sendotzen lagundu dutenen ahalegin kolektiboa, gaur egun kalitatearen erreferente eta Arabaren enbaxadore bihurtu dena, gure mugetatik kanpo zein barruan”.
Gaur egun, Arabako Txakolinaren ekoizpenaren %30 inguru nazioarteko merkatuetara bideratzen da, Estatu Batuak, Finlandia, Mexiko, Japonia, Kanada, Erresuma Batua edo Alemania bezalako herrialdeetara iritsiz. Gainerakoa, batez ere Euskadin eta Estatuko beste merkatu batzuetan merkaturatzen da, eta deitura honen presentzia eta aintzatespena etengabe hazten ari dira.
Landa garapena, paisaia eta etorkizuna
100 hektarea inguruko mahasti-azalera, 38 mahats-ekoizle eta zazpi upategi izanik, Arabako Txakolina funtsezko elementua da Aiarako eskualdeko jarduera ekonomikoan eta landa garapenean, eta turismoa ere dinamizatzen du, paisaiarekin, gastronomiarekin eta kultur ondarearekin lotuta.
“Arabako txakolina ez da ardo hutsa. Nortasuna da, paisaia da, kultura da, jarduera ekonomikoa da eta gure landa-ingurunea bizirik mantentzeko tresna da. Horregatik, sektorea laguntzen jarraituko dugu lehiakortasunaren, jasangarritasunaren eta klima-aldaketara egokitzearen erronketan”, adierazi du sailburuak.
2026ko mahats-bilketari begira, mahastiaren bilakaerak aurreikuspen onak ditu, eta horrek aukera ematen du kanpaina berria zuhurtziaz, baina aldi berean konfiantzaz hasteko, sektoreak kalitatean, ospean eta merkatuetako presentzian aurrera egiten jarraitzeko duen gaitasunean.
