- Ordezkaritzak zuzenean ezagutu ditu Ertzaintzaren egitura, gaitasun operatiboak eta polizia integralaren eredua 3 eguneko bisitan.
Francisco Devia Aldunate negozio-arduradun eta ministro kontseiluak eta Gonzalo Muñoz Díez koronelak, karabineroen agregatuak, osatutako Txileko enbaxadako ordezkaritzak Ertzaintzaren eta Segurtasun Sailaren hainbat instalazio bisitatu ditu aste honetan, Euskal Polizia Autonomoaren egitura, gaitasun operatiboak eta polizia integralaren eredua hobeto ezagutzeko eta erakundeen arteko lankidetzarako loturak indartzeko, jardunbide egokiak trukatzeko eta segurtasunaren, prestakuntzaren eta polizia-espezializazioaren arloetan lankidetza-bide berriak jorratzeko.
Hiru egunetan, Txileko ordezkaritzak lan-bilerak egin ditu eta Segurtasun Sailaren hainbat unitate eta instalazio bisitatu ditu, eta zuzenean ezagutu ahal izan ditu, beraz, Ertzaintzaren antolakuntza, zereginak eta espezializazio-arloak.
PROGRAMA
Bisita joan den asteazkenean, ekainaren 17an, hasi zuten Ertzaintzaren Egoitza Nagusian, Erandion, eta bertan Ertzaintzaren Burutzak hartu zuen Karabineroen agregatua. Jarraian, lan-bilerak egin zituen Ikerketa Kriminaleko eta Polizia Judizialeko Burutzarekin, interes berezia jarrita drogekin lotutako eta pertsonen aurkako delituen ikerketaz arduratzen diren ataletan. Ondoren, Polizia Zientifikoaren, Barne Arazoetako Unitatearen, Ekinbideren eta Zibersegurtasuna Koordinatzeko Burutzaren instalazioak bisitatu zituen.
Ostegunean, ekainaren 18an, ordezkari txiletarrak Iurretako Polizia Zentrora joan ziren, eta bertan Laguntza Taktikoko Burutza Nagusiarekin elkartu ziren. Bertan Brigada Mugikorraren, Lehergailuak Indargabetzeko Unitatearen eta Zaintza eta Erreskate Unitatearen eginkizunak ezagutu zituzten. Egun horretan, unitate espezializatu horien gaitasun operatiboak erakutsi zitzaizkien eta zailtasun bereziko egoeretan erantzun poliziala ematean betetzen duten eginkizuna ezagutu ahal izan zuten.
Ostegun arratsaldean bertan, Txileko enbaxadako negozioen arduradun eta ministro kontseiluarekin batera, ordezkaritza Ricardo Ituarte Segurtasun Saileko sailburuordearekin eta Jon Goikolea Polizia eta Larrialdietako Euskal Akademiaren zuzendari nagusiarekin elkartu zen, eta Segurtasun Sailaren funtzionamenduaren eta Euskadin segurtasun publikoaren esparruan gauzatzen diren prestakuntza-programen berri eman zioten.
Bisita gaur, ostirala, ekainak 19, amaitu da Polizia eta Larrialdietako Euskal Akademian, eta bertan Akademiako lan-taldeak hartu ditu, Ertzaintzako gradu eta eskala desberdinetako ikasketa-plana azaltzeko, eta, ondoren, Euskal Poliziaren Museora egin duten bisitan lagundu diete.
Bisitari esker, Ertzaintzaren eta Txilek Espainian duen ordezkaritzaren arteko lankidetza instituzionala indartu ahal izan da, eta, gainera, segurtasun publikorako estrategikoak diren esparruetan esperientziak eta jardunbide egokiak trukatzean aurrera egin da.
