Etxebizitzako, Gazteriako eta Migrazio Politiketako Departamentuak ‘Alaia’ laguntzaile birtuala jarri du abian, alokairuarekin loturiko kontsultak argitzen espezializatua, herritarrekiko arreta hobetzeko eta informazio fidagarria eta eguneratua eskuratzeko helburuarekin.
‘Chatbot’ berria gaztelaniaz eta euskaraz eskura daiteke, vivienda.navarra.es web guneko alokairua atalean. Alokairu-merkatuaren gaineko zalantza ohikoenak azkar eta erraz erantzuten ditu, etxebizitza babestu eta libreei buruzko informazioa ematearekin batera.
Sistema Telekomunikazioen eta Digitalizazioaren Zuzendaritza Nagusiarekin elkarlanean garatu da, eta etxebizitzaren foru-legeriarekin entrenatutako teknologia libreak eta hizkuntza-ereduak erabiltzen ditu. Ezagutzaren oinarria etengabe eguneratzen da, eta sistema bera gai da erabiltzaileekiko interakzioetatik ikasteko; era horretan, erantzunen kalitatea pixkanaka hobetu daiteke.
Tresna honen bidez, herritarrek Merkatu Tentsionatuko Eremuari, alokairuko gehieneko prezioei, eskubide eta betebeharrei, etxebizitzak alokatzeko laguntzei eta etxebizitza arloan indarrean den legeriari buruzko informazioa eskura dezakete. Horrez gain, laguntzaile birtualak 50 dokumentu-eredu baino gehiago ditu; tartean, alokairu-mota desberdinetarako kontratuak, kontratuaren luzapen edo amaieretarako jakinarazpen-txantiloiak eta ohiko beste kudeaketa batzuk.
Era berean, ‘Alaia’ laguntzaile birtualak giza laguntza talde bat du, kontsultarik konplexuenei erantzuten dieten abokatuek osatua, eta, horretarako, beharrezkoa izango da erregistratzea. Gai horiek gehienez ordubeteko epean erantzuten dira, astelehenetik ostiralera, 8:00etatik 17:00etara, eta, horrela, arreta osoa eta kalitatezkoa bermatuko da.
Tresna berri honen bidez, Etxebizitza Zuzendaritza Nagusiak arreta arinagoa, hurbilagoa eta eraginkorragoa eskaintzearen aldeko apustua indartu du, ohiko informazio-bideak eta aurten hipotekaren eta alokairuaren arloan abian jarritako aholkularitza- eta bitartekaritza-zerbitzu berria osatuz.
