- Elkarlan sariak zortzi ekimen aitortu ditu balio publiko eta soziala sortzeagatik, eta ahalduntzea, feminismoa, parte-hartzea eta berrikuntza sustatzeagatik
- Erakunde Harremanetarako sailburuorde Xabier Ochandianok azpimarratu du, lankidetzatik, inklusiotik eta partaidetzatik beren ingurua eraldatzeko gai diren herritar konprometituak ikusaraztea eta balioan jartzea dela sarien helburu nagusia
Xabier Ochandiano Erakunde Harremanetarako sailburuordeak eta Ana Aguirre Gobernu Irekiaren eta Gobernu Onaren zuzendariak parte hartu dute gaur Elkarlan Sariak banatzeko ekitaldian. Eusko Jaurlaritzako Gobernantza, Administrazio Digital eta Autogobernu sailak sustatutako sari hauen bitartez, balio publikoa sortzen duten, herritarren parte-hartzea indartzen duten eta gizarte kohesionatuago, solidarioago eta inklusiboago bati laguntzen dioten proiektuak aitortu nahi dira.
Gaurko ekitaldian, 2024ko eta 2025eko edizioetako proiektu irabazleak saritu dira. Proiektu guztiak herritarren, gizarte-erakundeen, komunitatearen eta eragileen arteko lankidetzaren adibide dira, eta proiektuek erakusten dute gizarte-berrikuntzatik, konpromiso zibikotik eta guztion ongia zaintzetik eratorritako ekimenen eskutik erronka kolektiboei erantzuna ematea posible dela.
Ochandianok sari hauen zentzua eta proiektuek sustatzen dituzten balioak nabarmendu ditu. Bere hitzetan, Elkarlan sariek «erantzunkidetasunean, parte-hartzean eta elkartasunean oinarritutako komunitatea eraikitzeko modu jakin bat agerian uzten dute, eta herritarren inplikazioa tarteko dagoenean eta eragile desberdinek lankidetzan jarduten dutenean, pertsonen bizitza hobetzen duten eta gizarte-kohesioa indartzen duten erantzun eraldatzaileak sortzen direla erakusten dute”. Sailburuordeak, gainera, esperientzia horiek erakundeen eta gizartearen arteko harreman-modu berriak inspiratzeko duten gaitasuna nabarmendu du, “entzute ariketak eta konpromiso partekatuak, herritarren eta erakundeen arteko konfiantza indartzen dute”.
2024ko eta 2025eko edizioetan saritutako zortzi proiektuak:
- Sare berdeak ehuntzen (adimen-desgaitasuna duten pertsonen aldeko GAUDE Elkartea). Proiektu honek ezagutza-eragile bihurtzen ditu adimen-desgaitasuna duten pertsonak, baratze ekologikoa, anfibioen urmaela, fruta-arbolak eta biodibertsitaterako espazioak dituen hiri-ekosistema baten bidez. Proiektu horretatik, eskola-taldeei laguntzen diete Garapen Jasangarriko Helburuei lotutako jardueretan.
- Ondo bizi arte egonaldia – Residencia artística del Buen Vivir (Mutur Beltz Elkartea). Ekimen kultural honek arte garaikidea, landa-praktikak eta jasangarritasuna uztartzen ditu artzain-ondarea babesteko, artilearen erabilera arduratsua sustatzeko eta artisten, artzainen eta tokiko komunitatearen arteko truke-espazioak sortzeko.
- Martin Etxea (Martin Etxea Elkartea). Beren jatorrizko herrialdeetatik alde egin behar izan duten eta Euskadin bizitza autonomo eta segurua hasteko aldi baterako babesa, akonpainamendua eta laguntza komunitarioa eskaintzen duten giza eskubideen defendatzaileentzako harrera-etxea.
- Ikerketa/ekintza parte-hartzailea inoren kargura ez dauden gazte migratzaileekin Gasteizen (Zehar-Errefuxiatuekin elkartea). Lankidetza komunitarioko esperientzia bat da gazte migratzaileen parte-hartzearekin, kulturarteko gizarte baten eraikuntzan eta partaidetzan eta elkarrekiko aitortzan oinarritutako bizikidetza bultzatzeko.
- Paiportako 51. biltegia (Valentziako DANA krisia) (Zero Hondakina Fundazioa). DANAren ondoren abian jarritako laguntza humanitario zirkular eta parte-hartzailearen eredu berritzaile batek banaketa-puntuak zituen biltegi zentral bat konektatu zuen beharrak eta stockak denbora errealean kudeatzeko aplikazio digital baten bidez, gardentasun-, ekitate- eta hondakinen murrizketa-irizpideekin.
- Irribarrez, Esklerosi Anizkoitzak gizarte inklusiboagoa eraikitzen du (Asociación de Esclerosis Múltiple de Bizkaia – ADEMBI). Esklerosi anizkoitza duten pertsonentzako “barretarapia” programa da, beren gaitasun pertsonalak indartu, jarrera positiboa sustatu eta gizarte-ingurunean, komunitate inklusiboagoak eta solidarioagoak eraikitzeko, sentsibilizazioaren bitartez.
- Etxe betea (Basque Know How Fundazioa). Emakume zinemagileei zuzendutako sorkuntza eta akonpainamendu gune bat da, lan ingurune hurbil, feminista eta talentu berriak loratzera bideratutakoa euskarazko zinema proiektuen garapena bultzatzeko.
- Etxe-langileen eskola politikoa (Gipuzkoako Arrazakeria S.O.S.). Ekimen aitzindaria da, eta indartu egin ditu etxeko langile diren emakume migratuen antolaketa kolektiboa, eskubide-kontzientzia eta parte-hartze soziala, eta afektibitatea sartu du gizartea eraldatzeko prozesuak sortzeko eragile pedagogiko eta politiko gisa.
