- Jarduketari esker, gaur egun ibilguaren zati degradatu bat naturalizatu ahal izango da, fauna errazago igarotzeko eta ibarreko korridore ekologikoa funtzio bera ere indartzeko
URA-Uraren Euskal Agentziak —Eusko Jaurlaritzako Industria, Trantsizio Energetiko eta Jasangarritasun Sailari atxikia—Sopuertako udalerriko Sel errekaren ingurumena lehengoratzea bultzatuko du, tren-azpiegitura zahar batek eraldatutako ibilguaren zati baten funtzionaltasun ekologikoa berreskuratzeko, inguruan ingurumen-baldintzak eta baldintza hidraulikoak hobetzeko, eta Burdinmendi bide berdearen segurtasuna areagotzeko.
XIX. mendearen amaieran Traslaviña eta Castro Urdiales arteko trenbidea eraiki zenean, lubeta handi bat egin zen, errekaren hirurogei metro ibilgu baino gehiago estali zituena, harlangaitzezko galeria baten bidez. Gaur egun, trenbide plataforma zaharra Burdinmendi Bide Berdearen zati da.
2019ko azaroan izandako euriteek kalte handiak eragin zituzten egitura horretan. Egindako ikuskapenek agerian utzi zuten lur-erorketak, albo-hormen hausturak eta hondoratutako ganga-eremuak zeudela, eta, ondorioz, apurka-apurka egoera eskasten ari zela (dela errekaren ibilguaren egoeragatik ikusita, dela bide berdea bera eusten duen betelanaren egonkortasunaren ikuspuntutik).
Egitura hori sendotuz eta buxatzeko arriskua saihestuz, bideak kaltetzea saihestu nahi da, bai eta inguruko etxebizitzei eragingo lieketen ur-lamina handitzea ere (ur askoko gertakarietan).
Ibilgua berreskuratzea eta biodibertsitatea hobetzea
Proiektuak xede du ibaiaren zaharberritzea eta errekaren konektibitate ekologikoa hobetzea. Jardueraren helburu nagusien artean, hauek nabarmentzen dira: ibilguaren jarraitutasuna berreskuratzea, faunarentzako pasabideak atontzea, aire zabaleko ibilgu-tarteak handitzea eta tokiko ibaiertzeko landaredia trinkotzea.
Horrela, errekak erabat bete ahal izango du korridore ekologiko gisa duen funtzioa, hainbat espezieren mugikortasuna erraztuz eta inguruneko ingurumen-kalitatea hobetuz.
Ingurumen-onurez gain, esku-hartzeak galeria zaharraren narriadurarekin lotutako higadura-prozesuak ezabatzen lagunduko du, eta Bide Berdearen oinarri den lubetari eragiteko arriskua murriztuko du.
Hurrengo urratsak
URAk Sopuertako Udalak bultzatutako memoria teknikoan oinarrituta garatu zuen eraikuntza-proiektua. Izapideak egin bitartean, Bizkaiko Foru Aldundiak jarduketa-eremuan dagoen fauna babesteko ezarritako ingurumen-baldintzak gehitu ziren. Baldintza horiek urteko aldi jakin batzuetan lanak egitea mugatzen dute, espezie sentikorren kontserbazioa bermatzeko.
Hala ere, URAk eutsi egiten dio Sel errekaren ingurumena berreskuratzeko konpromisoari, eta gaur egun lanean ari da jarduera bere finantzaketarekin lizitatzeko, behin beharrezko administrazio-tramitazioa amaituta.
